Amiss Prayer (Zawgyi&Unicode) [Completed]

Part-38(မလှပသော)

For Unicode
မလှပသော

အနာဂတ်တို့ ပျောက်ဆုံးနေသည့် လူသားတစ်ဦး..။ ဝေခွဲမရမှုနှင့် နာကျင်မှုတို့ တပွေ့တပိုက်နှင့် ထိုလူသား။ မှားယွင်နေကြောင်းသိလျက် ရှေ့ဆက်တိုးမိနေသည့် ထိုလူသားသည် လွယ်ကူနေလိမ့်မည်မဟုတ်။ သူ့ထံတွင် တည်ရှိနေသောအခက်အခဲကို ထိုလူသားမှအပ ကျန်သောသူများနားမလည်။

ဆုံးဖြတ်ချက်တို့ခိုင်မာဖို့အတွက် ကျွန်တော်အကြိမ်ကြိမ်ကြိုးစားဖူးတယ်။ သူ့မျက်နှာကိုတွေ့ရတဲ့အခါ သူ့ကိုပဲပိုင်ဆိုင်ချင်မိနေတယ်။ မိဘမျက်နှာမြင်တွေ့ရတဲ့အခါ သူ့ကိုစွန့်လွှတ်ချင်မိတယ်။

တစ်ဖက်က ချစ်ရသူနဲ့ကမ္ဘာ...။ တစ်ဖက်က မိသားစုနဲ့ကမ္ဘာ...။ ဘယ်ကမ္ဘာကိုပဲ သွားနေပါစေ.. အချိန်တန်ရင် ကျွန်တော်က သူတို့ထက်အရင် ထွက်သွားရမယ့်လူ‌လေ..။ ကျွန်တော်သိတာပေါ့... အခုတစ်လော ခေါင်း‌တွေအဆမတန် ကိုက်ခဲနေတာကို..။ ကျွန်တော်သိပ်သိတာပေါ့... အခုတစ်လော ကျွန်တော့နှလုံး‌တွေ စူးအောင့်နေတာကို...။ ကျွန်တော်နားလည်တာပေါ့... ဒီလောကက ကျွန်တော့်ကို အချိန်သိပ်‌မပေးဘူးဆိုတာကို...။ သိပ်မကျန်တော့တဲ့ အချိန်လေးအတွင်းမှာ ကျွန်တော်ဘယ်ကမ္ဘာနဲ့ ပျော်ရွှင်ရမလဲ...။

အနှစ်နှစ်အလလက စောင့်စားခဲ့ရတဲ့ နှလုံးသားပိုင်ရှင်နဲ့လည်း အတူနေချင်တယ်။ ချစ်ရတဲ့မိသားစုလေးနဲ့လည်း ပျော်ပျော်ရွှင်ရွှင်ဖြတ်သန်းချင်နေပြန်ရော။ တကယ်လို့သူသာ ကျွန်တော်တို့နဲ့ ဘဝတူခဲ့ရင် ဒီလောက်ခက်ခဲမှာမဟုတ်ဘူးနော်..။ ခင်ဗျားဟာလေ... အစွဲအလမ်းသိပ်ကြီးတယ်။ အခု.. ခင်ဗျားရဲ့အစွဲအလမ်းတွေကပါ ကျွန်တော့်ကို ချုပ်နှောင်ထားပြန်တယ်...။

ခက်ခဲမှု.. ပင်ပန်းမှု.. နာကျင်မှုတို့ ရောထွေးလာသောအခါ ပါးပြင်ထက်သို့ စီးကျလာသည့် ပူနွေးနွေးမျက်ရည်တို့ကို အေးစက်သည့်လက်တစ်စုံက ဖယ်ရှားပေးလာသည်။

" ဘာဖြစ်လို့ ငိုနေတာလဲကောင်လေးရယ်.. "

" ကျွန်တော်ပင်ပန်းနေတယ်။ ဒီနေရာက တင်းကျပ်နေရော "

သူ၏လက်များနှင့် ဆုပ်ကိုင်ထားသည့်နေရာမှာ သူ၏နှလုံးသားရှိရာ ဘယ်ဘက်ရင်အုံဆီတွင်...။