Amiss Prayer (Zawgyi&Unicode) [Completed]

Part-39(ချုပ်နှောင်မှု)

For Unicode

ချုပ်နှောင်မှု
   
ခုတင်ထက်တွင်ထိုင်နေသော ရုပ်သေးရုပ်...။ ပန်းချီကားနှင့် ဓားကိုသာ ငေးကြည့်နေလျက် အတွေးနယ်တို့၌ အဆမတန် ‌ခြေလွန်နေသည်။
   
ဆုံးဖြတ်ချက်တို့ ခိုင်မာခဲ့ပြီ...။ ထိုဆုံးဖြတ်ချက်တို့ခိုင်မာရန် နာကျင်နေသောနှလုံးသားကို လျစ်လျူရှုရသည်မှာ သိပ်တော့မလွယ်ကူလှ။ အတိတ်ဘဝမှ ဆုတောင်းခဲ့သည်ကိုသာ မျှော်ကိုးမိလျက် ယခုတွင်သူ့အား စွန့်လွှတ်ရမည်။
   
ကျွန်တော့်ရဲ့ အတိတ်ဘဝကဆုတောင်းတွေ ပြည့်မယ်မဟုတ်လား။ ဘဝဆက်တိုင်း ပေါင်းဖက်ရဖို့ ကျွန်တော်ဆုတောင်းခဲ့တယ်လေ ပြည့်မယ်မဟုတ်ဟင်။ ပြန်ဆုံဖို့ အခွင့်အရေးလေး ရှိဦးမယ်မဟုတ်လား။ အခုကျွန်တော့်ရဲ့တောင်းဆိုချက်တွေကို သူလက်ခံပါ့မလား..။ လက်မခံလည်း လုပ်သင့်တာတော့ လုပ်ရမှာပဲလေ..။

မြတ်သူ၏အတွေးလွန်ပုံကို အခန်းထောင့်လေးတွင်ရပ်နေသော စိုင်းထွဋ်ခေါင်မြင်ပါသည်။ စိုင်းထွဋ်ခေါင်ကိုသာ မြတ်သူမမြင်ခဲ့။

ကောင်လေး၏အတွေးနယ်တို့ ကျယ်‌ပြောနေသည်ကိုရိပ်မိပါသည်။ သို့သော်မည်သည့် အကြောင်းကိစ္စတို့ကြောင့် အတွေးနယ်ကျွံနေရကြောင်း မိမိမသိခဲ့။ ကောင်လေးအား အတွေးနယ်တို့မှရုန်းထွက်စေရန် သူ၏နောက်ကျောမှ ဖက်ထားလိုက်သည်။ သူသည် မိမိအားနွေးထွေးမှုပေးသည်။ သူ၏နွေးထွေးမှုကိုလည်း မိမိသည်က သဘောကျမြဲပင်။ မတရားသည်က မိမိသည်သာ သူ့ကိုအေးစက်မှုများ ပေးနေမိသည်။

“ ကောင်လေးက ကိုယ်ဖက်လိုက်တဲ့အချိန်တိုင်း ကိုယ်ကိုနွေးထွေးမှုတွေပေးတယ်နော်..။ သဘောကျလိုက်တာ "

“ အင်း... ကျွန်တော်လည်း ခင်ဗျားရဲ့အေးစက်မှုတွေကိုသဘောကျပါတယ်... "

“ ဟုတ်ပါပြီ.. အခုလိုနားလည်ပေးလို့ အရမ်းချစ်‌တယ်နော် "

“ ကျွန်တော်လည်း ချစ်ပါတယ်... ဒါပေမဲ့.. ဒီအတိုင်းကြီးဆက်သွားနေလို့.. နှစ်ယောက်လုံးအတွက် အဆင်ပြေပါ့မလား "

“ ချစ်ခြင်းတစ်ခုမှာ တစ်ယောက်နဲ့တစ်ယောက် ချစ်နေရင် ပြီးပြီမဟုတ်လား။ ကျန်တာတွေက အရေးပါလို့လား။ အရေးမပါတာတွေကို မေ့ထားလိုက်ပါလား "