Amiss Prayer (Zawgyi&Unicode) [Completed]

Part-24(ခက်ခဲမှု)

For Unicode
ခက်ခဲမှု

အိမ်တော်ကြီး၏ မနက်စာစားဝိုင်းတစ်ခု..။ ပုံမှန်အတိုင်း စကားပြောဆိုခြင်းမရှိ တိတ်ဆိတ်လို့နေသည်။ အဘယ့်ကြောင့်များ တိတ်ဆိတ်နေရပါသနည်း။

တခြားသူများပြောသည်မှာ မနေ့က သခင်လေးပြန်ရောက်ပြီး‌သောအခါ သခင်မကြီးနှစ်ဦးနှင့် သခင်လေးတို့ စကားအချေအတင် ပြောကြသည်ဟု ဆိုသည်။ အိမ်တော်ရှိလူများ ကြားရသည့်တစ်စွန်းတစ်စသည်က သခင်လေးထံတွင် ချစ်သူရှိကြောင်း သခင်လေးက ထိုသူအား အလွန်ချစ်ကြောင်းပြောကြသည် ဟုဆိုသည်။

ဘယ်သူလဲ.. သခင်လေးချစ်ရတဲ့သူက ဘယ်သူများလဲ။ ကျွန်တော်များလား... ဟုတ်ပါ့မလား...။ ကျွန်တော်သာဖြစ်ခဲ့ရင် ဘယ်လောက်ကောင်းလိုက်မလဲ။

အတွေးလေးနှင့်သာပျော်နေသည့် နန္ဒသည် မနေ့မှ သခင်လေးတို့ စကားများရသည် အကြောင်စုံကိုသာသိလျှင် မည်သို့သော ခံစားမှုများ ဖြစ်နေမည်နည်း။

ဖြစ်ပုံသည်က ထိုနေ့တွင် စိုင်းထွဋ်ခေါင်ပြန်လာပြီးနောက် ဒေါ်နန်းသီရိနှင့် ဒေါ်နန်းသီတာက စိုင်းထွဋ်ခေါင်အား စကားပြောရန် ခေါ်လိုက်သည်။

“ တူတော်... ခဏလာပါဦး တိုင်ပင်စရာရှိလို့ “

“ ဟုတ်ကဲ့ ရီးတော် ပြောပါ...”

“ တူ‌တော်နဲ့ စောကလျာရဲ့ ဆက်ဆံရေးက ဘယ်လိုလဲ..”

သခင်မကြီးဒေါ်နန်းသီတာ၏ စကားအသွားအလာကို စိုင်းထွဋ်ခေါင် ရိပ်မိပါသည်။ သခင်မကြီးနှစ်ဦးသည် စိုင်းထွဋ်ခေါင်နှင့် စောကလျာဟူသော အမျိုးသမီးကို နီးစပ်စေချင်သည်။ စိုင်းထွဋ်ခေါင်သည်က ထိုအမျိုးသမီးအား မည်သို့သော ခံစားချက်မျှ မရှိသောကြောင့် သခင်မကြီးဒေါ်နန်းသီတာ၏ အမေးကို ပြန်ဖြေလိုက်သော စိုင်းထွဋ်ခေါင်၏ အဖြေသည် အလွန်ပြတ်သားပါသည်။

“ မိတ်ဆွေပါ အရီးတော်..။ အဆင့်ပိုခဲ့ခြင်း ပိုနေခြင်း လုံး၀မရှိပါဘူး..။ နောက်လည်း ပိုလာမှာမဟုတ်တဲ့အတွက် မစိုးရိမ်ပါနဲ့ “

“ အဆင့်မပိုလာတာကို အရီးတော်နဲ့ မင်းမယ်မယ်က စိုးရိမ်နေတာတူတော် “

အစကတည်းကပင် မကြည်လင်သောစိတ်တို့သည် အရီးတော်၏စကားကြောင့် ပို၍နောက်ကျိလာရသည်။ မသာယာသောစိတ်တို့၏ အရိပ်အယောင်သည် မျက်နှာတွင် တဖြည်းဖြည်းထင်ဟပ်လာသည်။ အလိုမကျမှုများထင်ဟပ်သော မျက်နှာဖြင့် အရီးတော်နှင့် မယ်မယ်တို့၏စကားအား ဆန့်ကျင်သောစကားကိုသာ ဆိုမိသည်။

“ မယ်မယ်နဲ့ အရီးတော်တို့ကို စိုးရိမ်စေမိတဲ့အတွက် တောင်းပန်ပါတယ်...။ အဲဒါဆိုလည်း တောင်းပန်လက်စနဲ့ ကြိုပြီးတောင်းပန်ပါဦးမယ်။ ဘယ်တော့မှ အဆင့်ပိုလာမှာမဟုတ်တဲ့အတွက် ကြိုတောင်းပန်ပါတယ် “

ထိုအခါ ဒေါ်နန်းသီရိက ဒေါသအလွန်ထွက်သွားသည်။

“ သားတော်... ဘယ်လိုပြောလိုက်တာလဲ။ မယ်မယ်တို့ရဲ့ လုပ်ငန်းအ‌ခြေအနေကို သားတော်သိတယ်မဟုတ်လား..။ ဒီအတိုင်းတစ်ယောက်အားနဲ့ ရှေ့ဆက်လို့ မရတော့ဘူးဆိုတာ သားတော်အသိပါ..။ ခေါင်းမမာချင်စမ်းပါနဲ့ကွယ် ”

“ သားတော်.. ဒီနည်းလမ်းနဲ့ မတူတဲ့ တခြားနည်းလမ်းရှာနေတာမို့ မယ်မယ်မစိုးရိမ်ပါနဲ့...။ စိုးရိမ်ရမယ့်အစား မယ်မယ်တစ်ခုပဲသိထားပေးပါ..။ သားတော် သူနဲ့ မနီးစပ်နိုင်ဘူး ”

“ မနီးစပ်လို့မရဘူးသားတော်.. လူကြီးတွေ အားလုံးပြောထား ဆိုထားပြီးပြီ..။ အခုက သားတော်တို့မင်္ဂလာကိစ္စကို ဆွေးနွေးဖို့ခေါ်တာ...”

မချစ်သော သူနှင့်ပေါင်းဖက်ရမည်။ ချစ်သောသူနှင့်ကွေကွင်းရမည်။ ဤဆင်းရဲခြင်းတို့သည် မည်မျှပူလိုက်မည်နည်း။ ထိုအပူမီးထဲသို့မခုန်ဆင်းခင်ကတည်းက ရိုက်ခတ်လာသော အပူငွေ့လေးကပင် ယခုအချိန်မှစတင်ကာ ပူလောင်နေရပါသည်။ ပူလောင်ခြင်းတို့သည် စိတ် နှလုံးသားတို့ကို စိုးမိုးလာကာ ဒေါသအသွင်သို့ပြောင်းစေသည်။

“ ဘယ်လို... လူကြီးချင်း ပြောထားဆိုထားပြီးနေပြီ... ဟုတ်လား..။ ဒါဆို မယ်မယ်နဲ့ အရီးတော်နဲ့က သားတော်ကို ဆွေးနွေးဖို့ခေါ်တာမှမဟုတ်တာ.. အသိပေးဖို့ခေါ်လိုက်တာပဲ...”

“ သားတော် ဘယ်လိုဖြစ်လို့ မယ်မယ်တို့ကို ကလန်ကဆန်လုပ်နေတာလဲ။ ဘယ်တုန်းက မယ်မယ်တို့ကို အဲဒီလိုတွေပြန်ပြောဖူးလို့လဲ...”

ဟုတ်ပါသည်။ ယခင်က စိုင်းထွဋ်ခေါင်သည် မိဘများအား ဤသို့မပြောဖူးပေ ။ ထို့ကြောင့် သခင်မကြီးနှစ်ဦးတို့သည် ပို၍အံ့ဩရပါသည်။ မိဘဆိုသမျှ အားလုံးနီးပါး နားထောင်နေသော သားလိမ္မာလေးအား ‌ဤသို့ပြောင်းလဲစေသည့်အရာသည် မည်သို့သောအရာဖြစ်သနည်း။ အချစ်.. ဟုတ်ပါသည်။ အချစ်ပင်ဖြစ်ပါသည်။

“ အရင်က မပြောပေမဲ့ အခုပြောမိတယ်မယ်မယ်..။ သားတော်လည်းလူပါ တစ်ခါတလေတော့ သားတော်ဆန္ဒအတိုင်း ဖြစ်ခွင့်မရှိဘူးလား.. “

စင်စစ် စိုင်းထွဋ်ခေါင်၏မိခင် ဒေါ်နန်းသီရိသည် သားတော်ကိစ္စနှင့် ပတ်သက်လာလျှင် မာကျောချင်ယောင်နှင့် နူးညံ့တတ်သည်။

မိမိ၀မ်းနှင့်လွယ်ကာ မွေးခဲ့ရသည်မဟုတ်လော။ ခင်ပွန်းဖြစ်သူ၏အမွေလုပ်ငန်းအား ဆက်လက်တည်တံ့ရန်၊ မိသားစုအခက်အခဲများဖြေရှင်းရန် သားတော်အား မချစ်မနှစ်သက်သောသူနှင့် ပေါင်းဖက်စေခြင်းကို လုပ်ဆောင်ချင်သော်လည်း တစ်ခါတစ်ရံအတင်းအကျပ် မလုပ်ဆောင်ချင်ပါ။

ထို့ကြောင့် သားတော်နှင့် စကားအချေအတင်ဆက်မပြောဘဲ သက်ပြင်းချ၍ ထိုစကားဝိုင်းမှ ထွက်လာလိုက်သည်။

သို့သော် အရီးတော်ဒေါ်‌နန်းသီတာကမူ ထိုစကားဝိုင်းမှမထွက်သေးဘဲ ဆက်လက်ဖန်တီးလိုက်သည်။အရီးတော်သည် ပြတ်သားသည်။ အရာရာကို သူ၏ဆန္ဒအတိုင်းမရမက ပုံသွင်းတတ်သည်။ ထက်မြက်သည်။ စိတ်ဓာတ်မာသည်။

“ ဖြစ်သင့်တာကိုတော့ ဖြစ်ခွင့်ရှိတယ်တူတော် “

“ တူတော်နားလည်တယ်.. မဖြစ်သင့်တာမဖြစ်ရအောင်လည်း တူတော် ကိုယ့်အစွမ်းအစနဲ့ကိုယ် ထိန်းချုပ်နိုင်တယ်။ အခုလည်းထိန်းချုပ်နေတယ်..။ အဲဒါကြောင့် တူတော်ကို သိပ်ပြီးမထိန်းချုပ်ပါနဲ့အရီးတော်..။ သိပ်ထိန်းချုပ်ခံရလွန်းတဲ့ကလေးက လွတ်လမ်းကိုရှာတဲ့အခါ ဘယ်အရာမဆိုဖြစ်သွားနိုင်တယ်.. ပျက်စီးသွားနိုင်တယ်..‌‌ ”

“ အဲဒီစကားကို သူများတွေအတွက် ပြောတယ်ဆိုရင် အရီးတော်လက်ခံ‌ပေးလိုက်မယ်..။ တူတော်အတွက် ဆိုရင်တော့ အရီးတော်လက်မခံဘူး..။ တူတော်ကတော့ အဲဒီလိုဖြစ်လို့မရဘူး...။ ဘာလို့လဲသိလား...။ တူတော်က ကလေးမဟုတ်တော့ဘူး...။ တူတော့်ကိုသင်ပေးထားတဲ့ ပညာတွေက အရာရာကို မိုက်ရူးရဲဆန်ဆန်လုပ်တတ်အောင် တွေးတတ်ဖို့ သင်ပေးထားတာမဟုတ်ဘူး..”

လေသံအေးအေးနှင့် မိမိ၏ စကားတိုင်းကို တစ်လုံးချင်းစီ ပြန်ချေပနေသော အရီးတော်သည် တည်ငြိမ်မှု အပြည့်နှင့် ...။

“ တူတော်ပြောပါသေးတယ်.. ‘သိပ်ထိန်းချုပ်ခံရတဲ့ကလေးက လွတ်လမ်းကိုရှာလာတဲ့အခါ ဘယ်အရာမဆိုဖြစ်သွားနိုင်တယ်’ ဆို.. အဲဒီစကားက အလကား‌တူတော်..။ တကယ်ထိန်းချုပ်ခံရလွန်းတဲ့ကလေးက မိဘတွေကို ဖိန့်ဖိန့်တုန်အောင်ကြောက်နေရတာမို့လို့ လွတ်လမ်းရှာရဖို့ စဉ်းစားချိန်တောင်မရှိဘူး..။ စဉ်းစားခဲ့သည်ရှိသော်.. ရှေးဆက်ဖြစ်လာမှာတွေကို ကြိုတွေးပြီး ဘာကိုမှမလုပ်ရဲတတ်တော့ဘူး..”

“ အဲဒါဆို တူတော်က ထူးချွန်ပြီး ဒါတွေကိုလုပ်မယ်ဆိုရင်ရော...”

“ တူတော်သာလုပ်ရဲရင် အရီးတော်တို့ကို အခုလိုတောင်ပြောနေပါ့မလား..။ လုပ်ပြီးတာကြာရောပေါ့..။ တူတော့်ကို အရီးတော်ထိန်းချုပ်ခဲ့တဲ့နှစ်တွေက နည်းမှမနည်းတော့တာ..”

ဟုတ်ပါသည်။ မိမိမလုပ်ရဲပါ ။ ရှေ့ဆက်ရမည့်မိမိဘ၀ထက် သူ့ကိုနာကျင်မည်ကိုစိုးရိမ်သောကြောင့် မိမိမလုပ်ရဲပါ။

“ အရီးတော်က တကယ်ထက်မြက်တာပဲနော်..။ ဟုတ်ပါတယ် တူတော်မလုပ်ရဲပါဘူး..”

သူထိခိုက်မည်ကို တွေးရုံဖြင့် ရင်ထဲတွင် မွန်းကျပ်လာသောခံစားချက်ကြီးသည် မသက်သာလှ။ သူထိခိုက်မည်ကိုစိုး၍ လမ်းခွဲရသောအခါ နှလုံးသားက ပြစ်ဒဏ်ပေးသော နာကျင်မှုသည်လည်း သိပ်မသက်သာလှ။ မွန်းကျပ်မှုနှင့်နာကျင်မှုတို့ သိပ်သည်း ပေါင်းစပ်လာသောအခါ မျက်၀န်းတစ်စုံမှ မျက်ရည်ဓာတ်ပေါင်းလေးသည် ချောင်းငယ်သဖွယ် စီးဆင်းလာသည်။

“ မဟုတ်သေးဘူး မလုပ်ရဲတာမဟုတ်ဘူး..။ မလုပ်ရက်ခဲ့တာ..။ ဘာလို့လဲသိလား..။ သူနာကျင်မှာစိုးလို့.. သူထိခိုက်မှာကိုစိုးလို့.. သူ့ကိုသိပ်ချစ်ခဲ့လို့ဗျ...”

“ အရီးတော်ပြောတာမှန်တယ်မဟုတ်လား.. ရှေ့ဆက်ဖြစ်မယ့်ကိစ္စကိုကြိုတွေးပြီး မလုပ်ရဲဘူးဆိုတာလေ..။ သူထိခိုက်မှာကိုစိုးပြီး မလုပ်ရက်တာပဲဖြစ်ဖြစ်.. တူတော်ထိခိုက်မှာကိုစိုးပြီး မလုပ်ရဲတာပဲဖြစ်ဖြစ်.. အဓိကက တူတော်တို့ရှေ့ဆက်မတိုးရင်ပြီးပါရောလား..။ နောက်ပြီး.. အချစ်ကို ဘုရားသခင်လိုလို ဖန်ဆင်းရှင်လိုလိုနဲ့.. ချစ်ရဲ့တန်ခိုးတွေကို အရီးတော်ရှေ့မှာ စာဖွဲ့မနေစမ်းနဲ့...”

“ ဟူး.. တကယ်မွန်းကျပ်ရလွန်းလို့.. ရူးသွားရင်ကောင်းမယ်...”

“ ဒီလောက်နဲ့ရူးရအောင် တူတော်က အမတော်မွေးကတည်းက ဉာဏ်ရည်မမီနဲ့သူမဟုတ်ဘူးလေ..။ ဉာဏ်ရည်ပြည့်တဲ့သူ တစ်ယောက်ဖြစ်နေလို့ ရူးစရာမလိုဘူး..”

“ ဒီလောက်နဲ့ ဆိုပါလား... မချစ်ရသူနဲ့ပေါင်းဖက်ပြီး ချစ်ရသူနဲ့ကွေကွင်းရတာ နည်းတဲ့ဒုက္ခလားဗျ..”

“ တူတော်ကို အစက စိုင်းထွဋ်ခေါင်လို့ပဲသိထားခဲ့တာ...။ တကယ်တော့ တူတော်ကခေတ်သစ်မင်းနန္ဒာပဲ... ချစ်တတ်လိုက်တာလွန်ပါရော...”

“ အရီးတော်က မချစ်ဖူးတော့ ဘယ်သိပါ့မလဲ..”

“ အချစ်နဲ့ပတ်သက်ပြီး တရားလာမဟောပြနဲ့တူတော်။ အရီးတော်က တူတော့်ကိုတရားပြန်ပြမယ်..။ လူတိုင်းက တစ်နေ့သေရမှာပဲ..။ သေတဲ့အခါ ခွဲခွာရတာကြီးပဲ..။ အခုတူတော်နဲ့ တူတော့်အချစ်တော်လေးက မသေခင်နည်းနည်းလောက် ကြိုခွဲခွာရတယ်လို့ သဘောထားလိုက်..။ တရားသဘောနဲ့ခွဲရတာမို့ တွေးတတ်ရင်.. ဖြေတတ်ရင်.. အေးအေးချမ်းချမ်းနေလို့ရတယ်..”

ထိုဖြစ်စဉ်သည် အိမ်တော်မှအစေခံများပြောနေသည့် စိုင်းထွဋ်ခေါင်နှင့် သခင်မကြီးနှစ်ဦးတို့၏ စကားအချေအတင်ပြောကြပုံပင် ဖြစ်သည်။ စိုင်းထွဋ်ခေါင် ပြောသည့် ချစ်ရသူဆိုသည်မှာ တခြားသူမဟုတ်..။ နန္ဒပင်ဖြစ်သည် ။

သူ့အတွက်နှင့် စိုင်းထွဋ်ခေါင်သည် ဤသို့တိုက်ပွဲ၀င်နေကြောင်းကိုသာသိခဲ့လျှင် ထိုလူသား.. မည်မျှပျော်နေမည်နည်း။ သူနာကျင်မည်ကိုစိုးရိမ်၍ စိုင်းထွဋ်ခေါင်သည် စစ်ပွဲရှုံးနိမ့်သွားရကြောင်း၊ စိုင်းထွဋ်ခေါင်သည်လည်း နာကျင်နေရကြောင်းကိုသာ ထိုလူသားသိခဲ့လျှင် မည်မျှ၀မ်းနည်းနေမည်နည်း။