Amiss Prayer (Zawgyi&Unicode) [Completed]

Part-58(ဝေခွဲရခက်ခြင်း)

For Unicode
ဝေခွဲရခက်ခြင်း


မီးမထွန်းသောအခန်းငယ်..။ ထိုအခန်းငယ်အတွင်းရှိ ထိုင်ခုံထက်ဝယ် ကျွန်မတစ်ယောက်တည်းသာ တွေဝေခြင်းပေါင်းများစွာဖြင့် ထိုင်နေလျက်..။ တွေဝေနေသည်ဟု ဆိုသော်ငြားလည်း အသိစိတ်တို့တွင် တစ်စုံတစ်ခုမျှမရှိသည့်နှယ်။ အရာရာသည် ဗလာနတ္ထိ..။ မှိုင်းရီနေသော ကောင်းကင်ကိုသာ ပြတင်းပေါက်မှတစ်ဆင့် ငေးကြည့်လျက်..။ ကောင်းကင်ကိုသာငေးကြည့်နေသည်ဟုဆိုသော်ငြား ကောင်ကင်းယံအားသတိမထားမိ..။ ကြည့်မြဲသာကြည့်နေသည်။

ယခင်တွင် အဖော်မဲ့ခြင်းအား သဘောမကျသည့်ကျွန်မသည် ယနေ့တွင် အထီးကျန်‌မှု‌တွင် နေသားကျနေသယောင်။ တိတ်ဆိတ်နေသောအခန်းငယ်တွင် အလင်းရောင်မဲ့စွာ တစ်ဦးတည်းသာထိုင်နေရသည်မှာလည်း အရသာတစ်ခု။ ထိုအရသာအား စားသုံးနေမိသည့် ကျွန်မသည် သာယာနေ၍မဟုတ်။ ပင်ပန်းခြင်းတို့ဖြင့်သာ။

နေသူရိန်‌နှင့်လမင်းကိုကိုတို့အကြား ဝင်ရောက်လေသည့် မိမိ၏နှလုံးသားသည် နည်းနည်းမျှမရာမထင်။ ပေးဆပ်‌မိသော အတိတ်ကာလတို့အား ပြန်တွေးလျက် ရှက်စိတ်တို့ထုံမွမ်းနေသည်။ ထိုစိတ်ကြောင့်ပင် စီးဆင်းလာသည့် မျက်ရည်စသည် ပါးပြင်ထက်တွင် နေရာယူလျက်ရှိနေသည်။ မိမိသည်က ထိုမျက်ရည်စတို့အား မဖယ်ရှားမိသောကြောင့် ပါးပြင်ထက်၌ အချိန်အတော်ကြာသည်အထိ နေရာယူနေဆဲ..။ အေးစက်ခြောက်သွေ့လွန်းသည့် နေဝင်ချိန်တွင် နွေးထွေးမှုမရရှိသည့် မိမိ၏နှလုံးသားသည်လည်း အေးစက်လာလေပြီ။ ‌ပျောက်ကွယ်သွားသော နေရောင်ခြည်နှင့်အတူ သူရိန်၏ချစ်ခြင်းအားရလိုသည် ဟူသောမျှော်လင့်ချက်ရောင်ခြည်သည်လည်း ပျောက်ကွယ်လေပြီ။

ပင်းပန်မိသည်။ ဝေခွဲရခက်ခြင်းတို့အကြား အသက်ရှူရမည်အား မေ့လျော့သည်အထိ ပင်ပန်းမိသည်။ မည်သည့်နည်းလမ်းကိုသာ ရွေးချယ်သည်ဖြစ်စေ သေချာသည်မှာ ကျွန်မသည် သူရိန့်အား ဆုံးရှုံးရမည်သာ။

သဘောထားကြီးစွာ ထိုသူတို့၏အခက်အခဲအား ဖြေရှင်းပေးပါကမူ သူရိန့်အား တစ်ပါးသူ၏လက်ထဲသို့ ထည့်လိုက်ရမည်။ အတ္တကြီးစွာ ထိုသူတို့၏အခက်အခဲအား မကူညီခဲ့ပါကမူ သူရိန်သည်မိမိအား မုန်းတီးသွားနိုင်သည်။

ဆုံးရှုံးရသည်ခြင်းတူသော်ငြား ကွာခြားသည်က တစ်ခုသာရှိသည်။ ဤသည်မှာ ပထမနည်းလမ်းကိုရွေးချယ်ခဲ့ပါက သူ၏ပျော်ရွှင်ခြင်းကိုသာကြည့်၍ ဆုံးရှုံးရမည်။ ဒုတိယနည်းလမ်းအား‌ ရွေးချယ်ခဲ့ပါက သူ၏နာကျင်ခြင်းနဲ့ မုန်းတီးခြင်းကိုသာကြည့်၍ သူ့အားဆုံးရှုံးရမည်။

နင်ငါ့ကို ဝေခွဲရခက်တဲ့အလုပ်တွေ သိပ်လုပ်ခိုင်းတာပဲသူရိန်ရယ်..။

မိမိတစ်ယောက်တည်းသာ အတွေးကမ္ဘာထဲဝယ် ချာချာလည်နေစဉ် အခန်းအပြင်မှ တံခါးခေါက်သံကို ကြားရသည်။ ထိုအသံကြောင့် တံခါးဖွင့်၍ကြည့်လိုက်သောအခါ တံခါးခေါက်သူသည် ကိုတေဇဖြစ်နေသည်။

“ ငါတို့ စကားပြောရအောင်.. အောက်ထပ်ကိုခဏလောက်ဆင်းခဲ့ပါလား “

“ စကားပြောမယ်တဲ့လား..။ ထူးထူးဆန်းဆန်းပါလား “

“ နင်နဲ့စကားပြောချင်နေတဲ့ ငါ့စိတ်က ထူးဆန်းနေတာ ငါသိပါတယ် “

“ ဆေးမှားသောက်ထားတာလား..။ ကိုတေဇနဲ့ ဇာဇာတို့အကြားမှာ မျက်နှာချင်းဆိုင်ပြီး စကားပြောစရာ ဘာအကြောင်းမှမရှိဘူးလို့ထင်တယ် “

ဤသည်က သဉ္ဇာထက်နှင့်တေဇတို့၏ ပုံမှန်ဆက်ဆံရေးဖြစ်သည်။ ထိုသူတို့၏ပုံမှန်ဆက်ဆံ‌ရေးသည် လူအများ၏အမြင်တွင် ထူးဆန်းနိုင်သည်။ တစ်ဦးနှင့်တစ်ဦး အမြင်မကြည်သည်မို့ မျက်နှာချင်းဆိုင်၍ စကားပြောရသည်မှာ မရှိသလောက်နည်းပါးသည်။ မျက်နှာချင်းဆိုင်လျှင်လည်း တစ်ဦးနှင့်တစ်ဦးအချင်းများရုံမှတစ်ပါး ကျန်သောအရာများဖြစ်မလာခဲ့။

“ ရှိလို့ခေါ်တာပေါ့ ဇာဇာရယ်.. “

“ ရှ်ိခဲ့ရင်လည်း အဲဒီကိစ္စအတွက် ဇာဇာမအားဘူးလို့ ကြိုငြင်းပါရစေ “

ထိုသို့ပြောပြီးနောက် တေဇအားကျောခိုင်း၍ အခန်းတံခါးပိတ်မည့် သဉ္ဇာထက်၏လက်တို့သည် လမ်းတစ်ဝက်တွင်သာရပ်တန့်ကုန်သည်။ အကြောင်းမှာ တေဇ၏နောက်ဆက်တွဲ စကားကြောင့်သာ..။

“ နေသူရိန်တို့ကိစ္စဆိုရင်တောင် နင်ငြင်းဦးမှာလား “

သူရိန့်နာမည်ကြားသည်နှင့် ရပ်တန့်သွားသော ခြေလှမ်းတို့အား မုန်းမိပါသည်။

“ ကောင်းပြီလေ.. ဇာဇာအောက်ထပ်ဆင်းခဲ့မယ် “

ထို့နောက်တေဇသည် ဧည့်ခန်းထဲသို့ ဦးစွာသွားနှင့်၍ ‌ဝိုင်ခွက်နှစ်ခွက်နှင့် ပန်းသီးတို့အားပြင်ဆင်ထားသည်။ သဉ္ဇာထက်ရောက်လာသောအခါ တေဇသည် ဝိုင်ခွက်တစ်ခွက်အား သဉ္ဇာထက်၏အရှေ့သို့တိုးပေးသည်။ ကျန်တစ်ခွက်အား တေဇသည် ဆိုဖာကိုမှီလျက် သုံးဆောင်နေသည်။ တေဇ၏ခေါ်ဆိုမှုကြောင့် ဧည့်ခန်းထဲသို့ရောက်လာသော သဉ္ဇာထက်သည် တေဇ၏စကားအား နားထောင်လို၍မဟုတ်။ နေသူရိန်ဟူသော အမည်ကြောင့်သာ။

“ပြောတော့ ကိုတေဇ.. နေသူရိန်တို့ကိစ္စဆိုတာလေး “

“ သူတို့အကြောင်းစမပြောခင် ငါတို့ရဲ့ခံစားချက်တွေကို အရင်ဝန်ခံရအောင်..။ ငါက လမင်းကိုကို ကိုသဘောကျတယ်..။ လမင်းကိုကိုနဲ့ ပတ်သက်နေတဲ့ နေသူရိန်ကို ငါမုန်းတယ် “

“ ဇာဇာကတော့ သူရိန့်ကိုသဘောကျတယ်..။ ဒါပေမဲ့ လမင်းကိုကို ကိုဇာဇာမမုန်းမိဘူး “

“ သူ့ကိုမမုန်းတာ အဆင်ပြေပါတယ်..။ ဘာလို့လဲဆိုတော့ သူကငါနဲ့ပတ်သက်ပြီး.. ငါတို့မိသားစုဝင်တစ်ဦးဖြစ်လာမှာ ဆိုတော့ “

သူရိန်နှင့်လမင်းကိုကိုတို့၏ ချစ်ခြင်းသံယောဇဉ်အား မိမိခံစားမိသည်။ ခိုင်မာလွန်းသည်။ ထိုခိုင်မာမှုကိုမသိ.. သူ၏စိတ်ကူးယဉ်ကိုသာ ပြောပြနေသည့် ကိုတေဇ၏စကားသည် မိမိအဖို့ရာ ဟာသတစ်ခုသာ..။

“ ဟက်.. သေချာလို့သား ကိုတေဇ.. “

“ ဒါပေါ့..။ ငါ့မှာ အစီအစဉ်တွေရှိပြီးသားပါ “

“ ကိုတေဇအချစ်တော်လေးက သူရိန်မှသူရိန်ဖြစ်နေတာနော် “

“ နေသူရိန်သာမရှိခဲ့ရင်ရော.. ငါ့အချစ်တော်လေးက သူ့ကိုတမ်းတနေပါ့မလား “

ဒေါသထွက်မိသည်။ သူ၏စကားသည် မိမိချစ်ရသူအား ပျောက်ကွယ်သွားစေချင်သည့် ရည်ရွယ်ချက်တို့ရှိကြောင်း သိသာပါသည်။

“ ရူးနေလား ကိုတေဇ..။ ဇာဇာသဘောကျရတဲ့သူကို မရှိစေချင်တဲ့အကြောင်း.. ဇာဇာ့‌အရှေ့မှာ ပြောရဲတယ်လား “

“ ဟိုး ဟိုး.. စိတ်လျော့ပါဇာဇာရယ်...။ တ‌စ်လှေတည်းစီးမယ့်ခရီးသည်တွေပဲ.. အဲဒီလောက်ထိ ငါ့ကို ဒေါသမထွက်ပါနဲ့ “

ဆိုဖာကိုမှီထားမှထလိုက်ကာ သူ၏ဝိုင်ခွက်နှင့် မိမိ၏ဝိုင်ခွက်ကို ထိလိုက်သည့် အပြုအမူသည် မုန်းချင်စဖွယ်..။

“ ငါကလည်း အဲဒီလောက်ထိမရက်စက်တတ်ပါဘူး..။ ငါ့ညီမတစ်ယောက်လုံး ကြေကွဲရမှာကို ငါကလုပ်ရက်ပါ့မလား “

“ ကိုတေဇကဇာဇာ့ကို ဘယ်တုန်းက ညီမလို့သတ်မှတ်ခဲ့လို့လဲ။ ညီမလို့မသတ်မှတ်ထားတဲ့အတွက် ဇာဇာကြေကွဲရမယ့်ကိစ္စတစ်ခုကို ကိုတေဇအလွယ်လေးလုပ်နိုင်တာ ဇာဇာသိတယ် “

“ အရင်ကမသတ်မှတ်ပေမဲ့ အခုကတော့ လမ်းတူခရီးသည်တွေမို့.. ညီမလို့သတ်မှတ်ထားတယ်။ စိတ်ချပါ နင်အရမ်းချစ်တဲ့သူရိန်ကို မထိခိုက်စေရပါဘူး “

“ ကိုတေဇ ကတိတည်ပါစေ.. သူရိန့်ကိုလုံးဝမထိခိုက်ပါနဲ့။ ကတိမတည်ခဲ့ရင် ဇာဇာ့အဆိုးမဆိုနဲ့ “

“ ဟုတ်ပြီ.. ကတိပေးတယ်..။ ငါတစ်ခုမေးချင်တယ်။ နင်ချစ်တဲ့သူရိန်ကို နင်ပိုင်ရမယ်.. ငါလည်း ငါချစ်တဲ့လမင်းကိုကို ကိုပိုင်ဆိုင်ရမယ့် နည်းလမ်းရှိတယ်။ အဲဒီနည်းလမ်းအသုံးချဖို့ကို နင်ကူညီမှဖြစ်မယ်။ အဲဒီနည်းလမ်းက..”

ကိုတေဇ၏စကားသည် ယုတ္တိမရှိ။ သူ၏စိတ်ကူးယဉ်တို့အား နားထောင်ပေးရန်မထိုက်တန်..။ ထို့ကြောင့် စကားဖြတ်ပြောခဲ့မိသည်။

“ တော်တော့ ကိုတေဇ..။ နည်းလမ်းပေါင်းစုံကိုတွေးပြီး သူတို့နှစ်ယောက်ခွဲမယ်ပေါ့..။ အဲဒီလိုခွဲတော့ရော.. ကိုတေဇက လမင်းကိုကို ကိုပိုင်ဆိုင်ရမှာတဲ့လား။ ဇာဇာကရော သူရိန်ကိုပိုင်ဆိုင်ရမယ်လို့ ကိုတေဇအာမခံရဲလား “

“ အာမခံတယ်ဆိုရင်ရော..”

“ ‌‌ထားတော့.. အကွက်တွေ သိပ်စေ့လို့ ပိုင်ဆိုင်ခဲ့ရရင်တောင်.. နှလုံးသားမပါလာတဲ့ လမင်းကိုကိုကိုပဲ ကိုတေဇပိုင်ဆိုင်ရလိမ့်မယ်။ ဇာဇာကလည်း ခံစားချက်မရှိတော့တဲ့ ‌သူရိန်ကိုပိုင်ဆိုင်ရလိမ့်မယ်။ အားလုံးက အပေါ်ယံတွေချည်းပဲ ပိုင်ဆိုင်ရလိမ့်မယ်..။ ဇာဇာလိုချင်တာက သူရိန်ရဲ့အချစ်..။ အချစ်မရှိတော့တဲ့ သူရိန်ကို ဇာဇာမပိုင်ဆိုင်ချင်ဘူး။ နောက်ပြီး သူဝမ်းနည်းနေရမှာကို ဇာဇာမကြည့်ရက်ဘူး “

“ နင်ချစ်ပုံကြီးကလည်း ထူးဆန်းလိုက်တာဟာ.. “

ဇာဇာသည်က တေဇ၏အစီအစဉ်တို့အားလက်ခံခြင်းမရှိ။ တေဇတစ်ယောက် အခက်တွေ့လေပြီ..။

“‌ဇာဇာ့အချစ်က ထူးဆန်းတယ်ပဲထား.. ကိုတေဇအချစ်လိုတော့ မယုတ်မာဘူး “

“ နင်ပြောသလို ငါ့အချစ်က ယုတ်မာတယ်ပဲထား..။ အနည်းဆုံးတော့ ငါချစ်ရတဲ့သူကို ငါပိုင်ဆိုင်ရမှာပဲလေ “

“ ဘာလဲ.. အဆုံးထိ သူရိန့်လက်ထဲက လမင်းကိုကို ကိုလုယူဦးမလို့လား “

“ သေချာတာပေါ့ “

“ ကိုတေဇသိဖို့ တစ်ခုပြောပြမယ်။ သူရိန်တို့က ကိုတေဇကြိုးဆွဲရာကိုကမယ့် ရုပ်သေးရုပ်မဟုတ်ဘူး။ ကိုယ့်ကိုကိုယ် မထိခိုက်ပါစေနဲ့လို့ ဆုတောင်းထားပါ “

သေချာတယ်။ ‌ဒီပုံစံနဲ့ဆိုရင် ဇာဇာကိုလုံးဝညှိလို့ရမှာမဟုတ်ဘူး..။ မတတ်နိုင်ဘူးလေ.. နောက်ထပ်အစီအစဉ်တစ်ခု ထပ်ပြောင်းရမှာပေါ့။ ကိုယ်က အချစ်ကိုပိုင်ဆိုင်ခြင်းလို့ ခံယူထားတဲ့လူတစ်ယောက်။ အဲဒါကြောင့် ကိုယ်ကလမင်းကိုပိုင်ဆိုင်ရဖို့အတွက် အစွမ်းကုန် ကြိုးစားနေမိဦးမယ်ထင်တယ်။ လမင်းကို ကိုယ်ချစ်ခဲ့တာ လွယ်လွယ်လေးချစ်ပစ်ခဲ့တာမှမဟုတ်တာ။

ဒဂုံတက္ကသိုလ်ကို ယောင်လည်လည်နဲ့ ရောက်လာခဲ့တဲ့ ပထမဦးဆုံးရက်မှာကတည်းက လမင်းရဲ့နွေးထွေးမှုကို ကိုယ်ခံစားခဲ့ရတယ်။ မိသားစုရေးအဆင်မပြေတဲ့ကိုယ့်ကို အားပေးခဲ့တာ.. ကိုယ့်ကို စာကြိုးစားဖို့တိုက်တွန်းခဲ့တာ.. လမင်းတစ်ယောက်တည်းရှိတယ်။

မိသားစုရေးအဆင်မပြေပုံက.. တခြားတော့မဟုတ်ပါဘူး။ ‌ကျွန်တော့်ရဲ့မွေးစားအဖေဖြစ်တဲ့ သဉ္ဇာထက်ရဲ့အဖေရယ်.. သဉ္ဇာထက်ရယ်က ကျွန်တော့်ကိုမကြည်ဖြူဘူးလေ။ ကျွန်တော့်အဒေါ်အရင်းလည်းဖြစ်.. မွေးစားအမေလည်းဖြစ်တဲ့ သဉ္ဇာထက်ရဲ့အမေကတော့ ကျွန်တော့်ကိုချစ်ရှာပါတယ်။ မွေးစားအမေက ကျွန်တော့်ကို မြှောက်စားလွန်းတာနဲ့ ပတ်သက်ပြီးခဏခဏပြဿနာဖြစ်ရတယ်။ ပြဿနာဖြစ်တဲ့အခါ ကျွန်တော့်မွေးစားအမေနဲ့ကျွန်တော်နဲ့ကတစ်ဖက်.. ကျွန်တော့်မွေးစားအဖေရယ်.. သဉ္ဇာထက်ရယ်ကတစ်ဖက်ပေါ့။

အဆင်မပြေမှုတွေနဲ့ အဖော်မဲ့နေတဲ့ကိုယ့်အနားမှာလာထိုင်ရင်း သူငယ်ချင်းအဖြစ် နွေးထွေးခဲ့တယ်။ ကိုယ်က လူအများကြီးနဲ့နေရတာကိုသဘောမကျဘူး။ စကားပြောနေရတာကိုလည်း မကြိုက်ဘူး။ လူတိုင်းကို ကိုယ့်လိုမဟုတ်ဘူးလို့တွေးပြီး ရှောင်ဖယ်နေတတ်တယ်။ အဲဒီလို လူအများနဲ့မတူတဲ့‌.. အေးစက်တဲ့စရိုက်ရှိတဲ့ ကိုယ့်ကိုနားလည်ပေးခဲ့တာ လမင်းပဲရှိခဲ့တယ်။ ကိုယ့်အပေါ်ကို နားလည်ပေးနိုင်တဲ့ တစ်ဦးတည်းသောလူသားကို ပိုင်ဆိုင်ချင်မိတာ ကိုယ်မမှားဘူးထင်တယ်လမင်း။ သိပ်နွေးထွေးလွန်းတဲ့ လမင်းရဲ့အပြစ်ပေါ့..။

အချင်းများပြီးနောက် သဉ္ဇာထက်နှင့် တေဇတို့သည်ထိုဧည့်ခန်းမှ ကိုယ်စီထွက်ခွာခဲ့ကြသည်။ တေဇသည်လည်း သူ၏အခန်းထဲသို့ ပြန်လာခဲ့သည်။ သဉ္ဇာထက်သည်လည်း သူ၏အခန်းထဲသို့သာ ဒေါသထွက်လျက် ပြန်လာခဲ့သည်။

ရင်ထဲတွင်လောင်မြိုက်နေသော ဒေါသမီးတို့အား ငြိမ်းလိုငြမ်းငြား.. ရေသောက်ရန် အခန်းထဲရှိစာကြည့်စားပွဲပေါ်မှ ရေဘူးအားကြည့်လိုက်သောအခါ ရေမရှိသည်ကိုတွေ့ရသည်။ ထို့ကြောင့်ရေဘူးယူရန် အခန်းထဲမှထွက်လာခိုက်.. ကိုတေဇ၏အခန်းအရှေ့မှ ဖြတ်မည်အပြုတွင် ကိုတေဇစကားပြောနေသည့်အသံကို ကြားရသည်။ ဖုန်းပြောနေဟန်တူသည်။

ထိုစကားသံတွင် လမင်းကိုကိုဟူသော အမည်ကိုကြားရသောကြောင့် ဆက်၍နားထောင်နေခဲ့သည်။ အခန်းတံခါးသည် အနည်းငယ်ဟနေသောကြောင့် ကပ်၍နားထောင်သောအခါ သူ၏စကားတို့အား ရှင်းလင်းစွာကြားရသည်။ ရှင်းလင်းစွာ ကြားရသည့်ထိုစကားသံတို့သည် လမင်းကိုကိုအား မေ့ဆေးဖြင့်အုပ်၍ ခိုးပြေးရန်ကိစ္စအား သူ၏သူငယ်ချင်းဖြစ်သူနှင့် ဖုန်းပြော၍ တိုင်ပင်နေခြင်းသာဖြစ်သည်။

ထိုစကားတို့ကို ကြားရသောအခါ ကိုတေဇအား အလွန်စိတ်ပျက်မိသည်။ လမင်းကိုကိုနှင့်သူရိန်တို့ကို စိုးရိမ်မိသည်။ သူရိန်သည် လမင်းကိုကိုအား အလွန်ချစ်ပုံရသည်။ အကယ်၍သာ ကိုတေဇ၏အကြံအစီများ အောင်မြင်၍လမင်းကိုကိုအား သူ.. ပိုင်ဆိုင်ရပါက သူရိန်အလွန်နာကျင်ရနိုင်သည်။ မိမိသည် သူရိန့်ကိုချစ်သော်ငြား သူရိန်တို့၏ချစ်ခြင်းကိုမခွဲရက်။ အကြောင်းမှာ သူရိန်ခံစားနေရမည်အား မကြည့်ရက်သောကြောင့်သာဖြစ်သည်...။

ကျွန်မအချစ်က သူ့ကိုပျော်စေချင်တာပါ..။