Amiss Prayer (Zawgyi&Unicode) [Completed]

Part-34(ကြည်နူးမှု)

For Unicode
ကြည်နူးမှု

ဦးခေါင်းမှ ကိုက်ခဲမှုတို့နှင့် နိုးထလာသော မနက်ခင်းတစ်ခု..။ မနေ့ညမှ ငိုခဲ့သည့်အရှိန်ကြောင့်ဖြစ်မည်။ ‌မို့မောက်နေသည့် မျက်ခွံတို့ကို မှန်ထဲတွင်ကြည့်နေမိသည်။ တစ်ချိန်တည်းမှာပင်သတိရမိသည်က မနေ့ညတွင် မိမိ၏မျက်ရည်စက်တို့ကို သူဖယ်ရှားပေးနေသည့် ပုံရိပ်များပင်။ ထိုပုံရိပ်များကိုမြင်ယောင်ခိုက် နွေးထွေးလာသည့် ဘယ်ဘက်ရင်အုံ..။ ထိုအနွေးဓာတ်ဖြင့် ဆောင်းရာသီ၏အအေးဒဏ်ကို အံတုနိုင်သည်။ ထိုနွေးထွေးမှု၏ စွမ်းအားကို မည်သည့်အရာနှင့်မျှနှိုင်းယှဥ်၍မရ။

သူသာရှိနေလျှင် မည်သည့်အရာကိုမျှမကြောက် ဟုခံယူမိသည်အထိ သူ့ကိုချစ်မိသည်။ ညတိုင်းလိုလိုပင် သူနှင့်အတူတူရှိနေရသည့် အချိန်ကာလများကို သဘောကျသည်။ သို့သော်.. သူ့ကိုမတွေ့ရသည့် မနက်ခင်းတိုင်းကို အပြစ်မရှိလျက် မုန်းနေမိသည်။ ယနေ့မနက်ခင်းကိုမူ ပို၍မုန်းသည်။

နေ့အားဖြင့် တနင်္ဂနွေနေ့ဖြစ်သည်။ ဘုရားကျောင်းသွားရမည့်နေ့...။ အပြင်သို့မထွက်ချင်။ ညဘက်တွင် မ၀ခဲ့ရသည့် အိပ်ရေးကို ယခုတွင်အတိုးချအိပ်မည်ဟု စဉ်းစားသော်လည်း မေမေက လာနှိုးသွားသည်မို့ ဆက်အိပ်ရန် မဖြစ်နိုင်တော့ပြီ။ စိတ်မကြည်မှု အရိပ်ထင်နေသော မျက်နှာသည်လည်း ကြည်လင်နေမှုမရှိတော့ပေ။ ထိုမျက်နှာနှင့် မေမေရှိရာ ထမင်းစားခန်းထဲသို့ သွားမိသည်။

" သားငယ်လေး မျက်နှာကလည်းမကြည်မလင်နဲ့ပါလား။ ဘာဖြစ်လို့တုံး "

" ခေါင်းက နည်းနည်းကိုက်နေတယ်မေမေ.. အဲဒါကြောင့်ပါ "

" ဆေးရုံသွားမလားသားလေး... အရမ်းကိုက်နေလား.."

" ဆေးရုံကိုမသွားချင်ပါဘူး မေမေရယ်။ ခဏလောက်နားလိုက်ရင်သက်သာသွားမယ်ထင်တယ်။ "

" အေးအေး နားလိုက်နော်။ ဘုရားကျောင်းမလိုက်နဲ့တော့ "

" ဟုတ်မေမေ "

မေမေထံမှ ခွင့်ပြုချက်ရပြီးနောက် အိပ်စက်ခြင်းဆီသို့ တစ်ဖန်ပြန်သွားမိသည်။ ပြန်သွားမိသည့် အိပ်စက်ခြင်းတွင် အတိတ်၏ ပျော်ရွှင်ဖွယ်အရိပ်အရောင်များကို မြင်တွေ့ရနေသေးသည်။ ကျေနပ်မိပါသည်။ ထိုအရိပ်အယောင်များကို မကြာခဏအလည်ခေါ်ချင်မိပါသည်။ သို့သော် နာကျင်မှုအရိပ်အယောင်တို့ကိုတော့ အလည်မလာစေချင်။ ထပ်၍လည်း မဖြစ်စေချင်။ ထို့ကြောင့်သာ နှစ်ဦးသားလုံးသည် နှလုံးသား၏ စေခိုင်းရာအမိန့်တို့ကို လွန်ဆန်နိုင်ခြင်းမရှိဘဲ လိုက်နာနေခဲ့သည်။ ဘ၀ချင်း ခြားနားနေသည်ကိုမေ့၍သာ..။

ခေတ္တပျော်ရွှင်ကို လိုချင်၍လော.. တစ်သက်တာပျော်ရွှင်မှုကို မျှော်မှန်း၍လော.. ထိုသူနှစ်ဦးလုံး သေချာစွာမသိ။ ‌အကြင်သူတို့သိနေသည်က ချစ်ခြင်းတစ်ခုသာဖြစ်သည်။

အိပ်စက်မှုသည် ကြာရှည်သွားကာ ညနေခြောက်နာရီအချိန်မှသာ ပြန်နိုးလာသည်။ လူတစ်ဦးမှ လာနှိုး၍ဖြစ်သည်။ မိမိကြားနေကျ ယောက်ျားတစ်ယောက်၏ အသံမျိုးမဟုတ်။ ထိုအသံကြောင့် မျက်လုံးတို့ကို အားယူကာဖွင့်ကြည့်မိသည်။ မိမိရှေ့တွင်ရပ်နေသော ထိုလူသားသည် ဆရာ၀န်စိုင်းသန့်ဇင်ဖြစ်နေသည်။

" နိုးပြီလား.. မနက်ကတည်းကအိပ်နေတာဆို "

" ဟုတ်ပါတယ်.. ဟိုလေ ဘယ်လိုလုပ် ဒီကိုရောက်လာလဲဟင်။ မေမေတို့‌ခေါ်လိုက်တာလား "

" ဒေါ်ဒေါ်တို့က မခေါ်ပါဘူး။ ဆေးရုံကအပြန် ဒီလူနာကို တစ်ချက်၀င်ကြည့်တာ။ လမ်းလည်းကြုံနေလို့လေ။ ကျွန်တော်လာကြည့်တာမှန်သွားတယ်။ မြတ်သူခေါင်းကိုက်နေတယ်ဆို "

" ဟုတ်.. ညက အိပ်ရေးမ၀လို့ပါ။ အခုအိပ်လိုက်တော့ သက်သာသွားပါပြီ "

" ညဘက်စောစောအိပ်နော်။ အရမ်းအိပ်ရေးပျက်တာ မကောင်းဘူး "

" ဟုတ်ကဲ့ "

ဆရာ၀န်နှင့် ကျွန်တော်စကားပြောချိန်တွင် မေမေသည် ကော်ဖီနှင့် မုန့်တချို့ကိုယူလာကာ ကျွန်တော့်အခန်းထဲသို့ လာခဲ့သည်။ အခန်းထဲသို့ ၀င်လာသည့်မေမေက ဆရာ၀န်အား ရင်းနှီးစွာခေါ်ဝေါ်လိုက်သည်။

" သားလေး စိုင်းသန့်ဇင်.. ကော်ဖီလေးသောက်ပါဦး "

" ဒေါ်ဒေါ်ကလည်း အားနာစရာကြီး "

" အားနာစရာလားသားရဲ့။ သားက ဒေါ်ဒေါ်တို့အပေါ်မှာ ကျေးဇူးတွေအများကြီးရှိနေလို့ ဒေါ်ဒေါ်တို့ကသာ အားနာနေရတာ "

" အားမနာပါနဲ့ ဒါတွေက ဆရာ၀န်လုပ်ရမယ့် တာ၀န်တွေပါ ဒေါ်ဒေါ် "

" ဟုတ်ပါပြီကွယ်။ အခုလည်း လာပေးတာကို ကျေးဇူးနော် "

" ဟာ.. ဒေါ်ဒေါ်ရယ် ကျွန်တော့်ကို မနေတတ်အောင် ပြောနေပြန်ပါပြီ "

" အေး‌ပါအေးပါ။ မကြာခဏလာလည်နော်သား "

ဆရာ၀န်အား သား ဟုခေါ်နေသည်ကို မိမိစိတ်ထဲတွင် သိပ်ဘ၀င်မကျလှပေ။

" မေမေကလည်း ဆရာ့ကိုသားလို့ခေါ်နေတာ အားနာစရာကြီး "

" မဟုတ်တာ။ ကျွန်တော်ကိုက အဲဒီလိုခေါ်တာကို သဘောကျတာပါ။ မိဘတွေကလည်းဆုံးသွားပြီ.. ဆွေမျိုးတွေကလည်း တစ်နယ်စီ။ အိမ်မှာကလည်း အကြီးဆုံးအကိုဖြစ်နေတော့ အခုလိုအခေါ်မခံရတာကြာနေပြီ "

" ဪ.. ဟုတ်ကဲ့ "

ဤသို့ မေမေ၊ ဆရာ၀န်နှင့် ကျွန်တော်တို့၏စကားဝိုင်းသည် ကျွန်တော့်အခန်းတွင် အချိန်ကြာခဲ့သည်။ ထိုစကားဝိုင်းကို မေမေနှင့် ဆရာ၀န်တို့ ဆက်လက်ဖန်တီးနေခိုက် ကျွန်တော်သည် ထိုစကားဝိုင်းကို အာရုံမရောက်။ အခန်းထောင့်ရပ်နေသော သူထံကိုသာ စိတ်ရောက်နေမိသည်။ ထိုသူသည်ကျွန်တော့်ကို ခန့်ညားစွာ ပြုံးပြနေသေးသည်။ ထိုသူကို မေမေနှင့် ဆရာ၀န် မမြင်ခဲ့။ သူနှင့်သက်ဆိုင်ကြောင်း မူပိုင်ခွင့်တံဆိပ်ခတ်နှိပ်ထားသည့် ကျွန်တော်သာ မြင်ရပါသည်။

ခေတ္တမျှစကားပြောပြီးနောက် ဆရာ၀န်သည်လည်းပြန်ကာ မေမေလည်းအခန်းထဲမှထွက်သွားသည်။ ဆရာ၀န်သည် ပြန်ခါနီးတွင် မိမိ‌၏ဆံပင်‌တွေကို သပ်ပေးကာ ကျန်းမာရေးဂရုစိုက်ရန်နှင့် သူမကြာခဏလာမည့်အကြောင်းတို့ကိုပြောသွားသေးသည်။ တောက်ပစွာပြုံး၍သာ..။ ထိုအပြုံးတို့ကို အခန်းထောင့်မှကြည့်‌နေသည့် ချစ်ရသူကြီး သဘောကျနိုင်မည်လော..။

မေမေတို့ထွက်သွားပြီး မိမိအရှေ့သို့လျှောက်လှမ်းလာသော မိမိချစ်ရသူ..။ မိမိအနီးနားသို့ရောက်လာသောအခါ မိမိသည်သူ့ကို ခါးမှဖက်ထားမိသည်။ သူ၏ရင်ခွင်ထဲတွင် ခေါင်းမှီထားသေးသည်။ သူသည်လည်း မိမိနဖူးထက်သို့ အနမ်းတစ်ပွင့်ခြွေချလိုက်သည်။

" ကောင်လေး.. နေမကောင်းဘူးလားဟင် "

" မနက်က နည်းနည်းခေါင်းကိုက်တာပါ။ အခုတော့ ခင်ဗျားကိုမြင်ရလို့ သက်သာသွားပြီ "

" ဒီကောင်လေး စကားတွေတတ်နေလိုက်တာကွယ်.. တကယ့်အချွဲလေးပါလား "

" အဲဒီလိုချွဲတာကို မချစ်လို့လားဟင်.. "

နှုတ်ခမ်းလေးစူကာပြောနေသည့် ထိုလူသားလေးသည် ဘုရားစူးနှစ်ဆယ့်နှစ်နှစ်အရွယ် ကောင်လေးဖြစ်သည်။ အသက်နှစ်ဆယ်ကျော်ကောင်လေးသည် နှစ်နှစ်သားအရွယ်ကလေးကဲ့သို့ မိမိအား‌ကပ်ချွဲနေသည်မို့ ပို၍အချစ်ပိုနေရသည်။

" ချစ်တာပေါ့ဗျာ.. "

" ပြီးတာပဲ.. အခုတော့ ရေသွားချိုးလိုက်ဦးမယ်.. ဒီမှာနေခဲ့နော် လိုက်မလာနဲ့ "

ရေချိုးရန်ထွက်သွားသည့် ထိုလူသားလေးကိုကြည့်ကာ အပိုင်သိမ်းထားချင်သည့်စိတ်တို့သည် တားမရဆီးမရ..။

ရေချိုးပြီးနောက် ခေါင်းရေစိုဖြင့် ၀င်လာသောကောင်လေးကိုကြည့်ကာ သူ၏အလှတရားတို့ကို စာဖွဲ့နေမိသည်။ နက်မှောင်နေသာ ဆံနွယ်တို့ထက်မှ ကျလာသော ရေစက်တို့သည် စိန်ပွင့်လေးသဖွယ် တောက်ပလို့နေသည်။ ထိုရေစက်အချို့တို့သည် နေမြဲနေရာတွင်မနေ။ ကောင်လေးအား ပို၍ဆွဲဆောင်မှုရှိစေရန် ဖန်တီးနေသေးသည်။ ထိုရေစက်တို့သည့် ဆံနွယ်တို့မှတစ်ဆင့် နှင်းဆီနီရောင်နှုတ်ခမ်းပေါ်နှင့် မျက်တောင်စင်းစင်းပေါ်သို့ ခုန်ဆင်းနေသည်။ ရေစက်တို့ဖြင့်အလှဆင်ထားလျက် အလှကြီးလှနေသော ထိုလူသားသည် မိမိအပိုင်လူသားဖြစ်သည်။ တန်းဖိုးရှိလှသော မိမိ၏ပိုင်ဆိုင်မှုတစ်ခုဖြစ်သည်။

သူ၏ အလှတို့တွင် စီးမျောရင်း သူ့ကိုပင်ငေးကြည့်ကာ မည်သည့်စကားမျှမဆိုနိုင်ဖြစ်နေချိန်တွင် ထိုလူသားလေးပြောလာသည့်စကားကြောင့် စီးမျောမှုတို့မှ ရုန်းထွက်လိုက်သည်။

" ဘာတွေ အဲဒီလောက်တောင်ကြည့်နေတာလဲ.. ဟင် "

ကောင်လေးသည် ခေါင်းပေါ်သို့ သဘက်လေးတင်ကာ မိမိအနားသို့ရောက်လာသောအခါ သူ၏ခါးကိုကိုင်ထားလိုက်ပြီး သူ၏မျက်နှာလှလှလေးကို မြတ်နိုးစွာကြည့်မိသည်။

" အရမ်းလှနေလို့ "

" ယောက်ျားလေးတစ်ယောက်ကို လှတယ်လို့ပြောတာ နားထဲမှာ ကန့်လန့်ကြီး၀င်သွားသလိုပဲ "

" အဲဒီလှတယ်ဆိုတဲ့စကားက တခြားယောက်ျားလေးတွေအတွက်မလိုက်ဖက်နိုင်ဘူး..။ ဒါပေမဲ့.. ဒီကကောင်လေးအတွက်တော့ တကယ်လိုက်ဖက်နေတယ်။ ဒါပေမဲ့ အပြည့်အစုံလိုက်ဖက်နေတာတော့ မဟုတ်ဘူး "

" ဘယ်လို.."

" ကောင်လေးက လှတယ်ဆိုတာထက် ပိုနေလို့။ လှတယ်ဆိုတဲ့စကားထက် ပိုလေးနက်တဲ့စကားရှိနေရင်တောင် ကောင်လေးအတွက် မလုံလောက်သေးဘူးထင်တယ် "

" ဒီလူကြီးကတော့လေ ပိုပိုချစ်အောင် ပြောနေပါရောလား "

" အင်း.. ပိုပိုချစ်ပေးပါ။ လက်လွှတ်မခံနိုင်တဲ့အထိ ချစ်မိနေတာမို့ ကိုယ့်အနားက ထွက်မသွားနိုင်အောင် ပိုပိုချစ်ပေးပါ "

ဆုံးရှုံးရခြင်း၏အရသာကို တစ်ကြမ်တစ်ခါ စားသုံးဖူးရုံဖြင့် ခါးသက်နာကျင်ကြောင်းကို သိခဲ့ရပြီမို့ ထပ်၍မခံစားလိုပေ။

" စိတ်ချပါ.. ဒီအတွက်က ခင်ဗျားမတောင်းဆိုလည်း ဖြည့်ဆည်းပေးမှာမို့လို့ စိတ်မပူပါနဲ့ "

တစ်ဦးနှင့်တစ်ဦး တင်းကျပ်စွာဖက်ထားခိုက်တွင် ကောင်လေးထံမှာ နှာချေသံကြားလိုက်ရသည်။

" ကောင်လေး ခေါင်းကိုရေခြောက်အောင် မသုတ်လာဘူးလား။ ဖျားနေတော့မှာပဲ .. "

" ရေသုတ်ရမှာ ညောင်းလို့.. ခင်ဗျားကြီးသုတ်ပေးလေနော် "

" ဟုတ်ပါပြီဗျာ "

စိုင်းထွဋ်ခေါင်သည် မြတ်သူနှင့်မျက်နှာချင်းဆိုင်ကာထိုင်၍ သူ၏ဦးခေါင်းကို ရေသုတ်ပေးခဲ့သည်။

" စောစောကလာတဲ့သူနဲ့ အရမ်းရင်းနှီးလား "

" အရမ်းတော့မဟုတ်ဘူးပေါ့။ ကျွန်တော်ဆေးရုံမှာ သတိမေ့နေတုန်းက တော်တော်ဂရုစိုက်ပေးတယ်လို့ပြောတယ်။ အဲဒါကြောင့်မေမေတို့နဲ့ ပိုရင်းနှီးတယ်.. "

" ဪ.. ကောင်လေးကို သူဂရုစိုက်ပေးတာ‌နေကို.. ကောင်လေးမေမေက သဘောကျနေပုံပဲ။ ကိုယ်ကတော့သဘောမကျဘူး "

" ဟမ်.. ဘာလို့တုံး "

" မသိဘူး။ သဘောမကျတာတော့ သေချာတယ် "

" ဘာလဲ သ၀န်တိုနေတာလား "

" အင်း "

သူ၏ ခပ်ပြတ်ပြတ်စကားတစ်ခွန်းကြောင့် ကျွန်တော်ရယ်မိသည်။ ခန့်ညားမှုတို့နှင့်ပြည့်စုံနေသည့် မျက်နှာသည် တစ်ချိန်တည်းမှာပါပင် အလိုမကျသည့်ကလေးတစ်ယောက်၏မျက်နှာကဲ့သို့ ပြောင်းသွားသည့်သူသည် သူ၏ခန့်ညားမှုတို့ကိုမှ အားမနာ...။

" သ၀န်မတိုနဲ့လို့ မတားဆီးပါဘူး။ တစ်ခုတော့ယုံပေးနော်.. ကျွန်တော့်နှလုံးသားထဲမှာ ခင်ဗျားတစ်ယောက်တည်းကိုပဲ ကမ္ဗည်းအက္ခရာတင်ထားတယ်ဆိုတာ "

သိပ်စကားတတ်လှသည့် ကောင်လေး၏နှုတ်ခမ်းလေးအား အနမ်းဆုချရင်း.. မိမိကပါ ဆုလာဘ်ရယူမိသည်။ ထိုဆုလာဘ်၏အရသာသည် မည်သည်နှင့်မျှမလဲနိုင်။ နွေးထွေးလွန်းပါသည်။ သူ၏အနမ်းချိုချိုသည် မိမိရုန်းမထွက်နိုင်သည့် ရပ်၀န်းများပင်။

မိမိ၏အနမ်းတို့ကို သူကလည်းတုံ့ပြန်လာ၍ အယဥ်မှသည်အရိုင်းသို့ကူးစက်ကာ ကောင်လေး၏အသက်ရှူသံတို့သည် တစ်စထက်တစ်စ ပြင်းထန်လာခဲ့သည်။ အနမ်းကြမ်းကြမ်းတို့ကိုပုံပေါ်ရင်း သူ၏နှုတ်ခမ်းကိုကိုက်မိသွားကာ သွေးစအချို့ထွက်လာသည်။

" တောင်းပန်ပါတယ်နော်... ကိုယ်လေ "

" ဘယ်သူက တောင်းပန်ခိုင်းနေလို့လဲ "

ထိုစကားဆုံးပြီးနောက် ကောင်လေးဖန်တီးလာသည့် မပီပြင်သည့်အနမ်းတချို့။ သူ၏နှုတ်ခမ်းမှ သွေးစတို့သည် မိမိစားသုံးဖူးသမျှညစာထဲတွင် အကောင်းဆုံးသောအရသာတစ်ခု...။

ကောင်လေး၏မပီပြင်သော အနမ်းတို့ကို မိမိကစိတ်မရှည်..။ ထို့ကြောင့်ကောင်လေးကို အိပ်ရာထက်သို့ဆွဲလှဲလိုက်ကာ သူ၏အပေါ်မှ အုပ်မိုးထားလိုက်သည်။ မိမိ၏အနမ်းကြမ်းကြမ်းတို့တွင် သာယာနေသောကောင်လေးသည်လည်း မိမိ၏ကျောပြင်တို့ကိုဖက်တွယ်ထားသည်။

ထိုအချိန်တွင်ကောင်လေးအတွက် အလုံအလောက်မပေးနိုင်သောလေကို အပြစ်တင်မိသည်။ ရွှေလည်တိုင်ထက်သို့ နီညိုရောင်ပန်း ပန်းချီကားအား ရေးဆွဲလိုက်သည့်အခါ ကောင်လေး၏ ညည်းသံချိုချိုတို့ထွက်ပေါ်လာသည်။ ‌ထိုအသံသည် မိမိနား‌ထောင်ဖူးသော တေးဂီတသံတို့ထက် ပို၍သာယာဖွယ်.. နှစ်သက်ဖွယ်ကောင်းလှသည်။

ထို့နောက် အကြည့်တို့ဆုံမိလျက် မိမိ၏ မျက်၀န်းစကားကို သူနားလည်ခဲ့သည်။ မိမိ၏တောင်းဆိုမှုကို ထိုလူသား‌ လိုက်လျောပြီးနောက် မိမိတို့၏အချစ်ညသည် ရှည်ကြာခဲ့သည်။