Amiss Prayer (Zawgyi&Unicode) [Completed]

Part-19(အတိတ်ဘ၀)

For Unicode
အတိတ်ဘဝ

“ သခင်လေး.. ဒီနေ့ ပန်းချီစဆွဲမှာနော်.. “

“ သိတယ်လေ “

“ အဲဒါအဝတ်အစားလေးကို ပိုပြီးခန့်ညားအောင် ဝတ်ထားနော် “

“ ဘယ်ဟာဝတ်ရမှာလဲ မင်းရွေးပေးလေ “

သခင်လေး၏ အမိန့်အတိုင်း သခင်လေးဝတ်မည့် အဝတ်အစားများကို ရွေးနေခဲ့သည်။ ရွေးနေစဉ် မိမိ၏အမြင်အာရုံထဲတွင် အမြင်ကျနေသည်က အမည်းရောင်ပိုးဖဲသားပေါ်တွင် နဂါးတစ်ကောင်ရစ်ခွေသည့် အင်္ကျီကိုသာ...။

“ သခင်လေးက ချောပြီးသားဆိုတော့.. ဒီနဂါးပုံပါတဲ့ အမည်းရောင်အင်္ကျီနဲ့ဆိုရင် ပိုခန့်ညားနေမှာ “

“ ဒီကောင်လေးနှယ်.. စကားတွေသိပ်တတ်နေပါရော။ အဲဒီအလှနှုတ်ခမ်းလေးကို ဆုတွေပေးချင်မိတယ်..။ ဒီအနားကို လာပါဦး “

မိမိကခေါ်လိုက်သောကြောင့် မိမိအနားသို့ရောက်လာသော နန္ဒအား လက်မှလှမ်းဆွဲကာ ပွေ့ဖက်ထားလိုက်သည်။

“ ကောင်လေး... “

“ ဗျာ... “

“ မင်းကို မြင်တိုင်း.. ဘာလို့နမ်းချင်တဲ့စိတ်တွေက ထိန်းချုပ်မရ ဖြစ်နေတာလဲမသိဘူး... “

“ ကျွန်တော့်ကို သခင်လေးပိုင်ပြီးသားမို့... သခင်လေးအလိုကျ ထိတွေ့ခွင့်ရှိတာမို့... ဘာကိုမှထိန်းချုပ်မထားပါနဲ့နော် “

စကားဆုံးသည်နှင့်တစ်ပြိုင်နက် မိမိကိုဦးဆောင်သွားသည့် ကောင်လေး၏အနမ်းချိုချိုများသည် သိပ်ကိုနွေးထွေးလွန်းသည်။ ကောင်လေး၏ အနမ်းချိုချိုအောက်မှာ မိမိသည် အကြိမ်ကြိမ်ကျရှုံးပြီးသားပင်။

ဒါကိုကောင်လေးက မသိလို့များလား..။ သိရဲ့နဲ့များ တမင်ပြုစားနေတာလား..။ သိပ်ချစ်တယ် ကောင်လေးရယ်။ နှုတ်ဖျားက ‘ချစ်တယ်..’လို့ ရဲရဲတင်းတင်းမပြောခဲ့ရသေးပေမဲ့.. မင်းကိုချစ်တဲ့အချစ်တွေက ကိုယ့်ရင်ထဲမှာအပြည့်ရှိနှင့်ပြီးသားပါ။

အတော်ကြာသည်အထိ နမ်းရှိုက်ပြီးသည့်နောက်။ မိမိတို့နှစ်ဦးကြား လေလိုအပ်လာသည်ဖြစ်၍ အနမ်းလှလှတို့ကို လက်စသတ်ခဲ့ရသည်။ အခန်းငယ်အတွင်၌ မိမိတို့အကြား လုံလောက်စွာမပေးနိုင်သည့် လေကိုသာ အပြစ်တင်မိသည်။