Amiss Prayer (Zawgyi&Unicode) [Completed]

Part-17(ကံကြမ္မာ)

For Unicode
ကံကြမ္မာ

သခင်လေးပေးခဲ့သည့် အနမ်းနွေးနွေးကို ယခုချိန်ထိမေ့မရခဲ့။ သခင်လေးလည်းမိမိကို မေတ္တာရှိနေကြောင်း သိရရုံဖြင့် မိမိသည် ဤကမ္ဘာပေါ်၌ အပျော်ရွှင်ရဆုံး လူသားတစ်ဦးဖြစ်ခဲ့ရသည်။

မနက်ခင်း.. သခင်လေးထံကိုခစားဝင်တဲ့အခါ သခင်လေးဘယ်လိုများဖြစ်နေမလဲ။ သူ.. ညက ပြုခဲ့တဲ့ အပြုအမူအတွက် ရှက်နေမလား။ ဒါမှမဟုတ်.. ကျွန်တော်ကိုပိုပြီးတော့များ ကြင်နာနေမလား။ အတွေးနဲ့တင် အလွန်ပျော်စရာကောင်းနေပါပြီ။

ပျော်ရွှင်သောအတွေးငယ်ဖြင့် သခင်လေးထံခစားဝင်ရန် အခန်းထဲသို့လာခဲ့သည်။ မိမိဝင်ဝင်လာချင်းပင်ပြုံးပြသော သခင်လေး၏အပြုံးသည် အခန်းထဲတွင်ဖြာကြနေသော နေရောင်ခြည်နုနုထက် ပို၍တောက်ပနေသည်။

" သခင်လေး.. အစောကြီးနိုးနေတာလား "

" အင်း... "

ပထမအတွေးများတွင် သခင်လေးရှက်နေမည်ဟု တွေးမိခဲ့သည်။ ယခုအခြေအနေတွင်မူ အရှက်ပိုနေသူမှာ မိမိဖြစ်နေသည်။ ရှက်စိတ်ကြောင့်ပင် သခင်လေးအနားသို့ မသွားရဲ..။ ခပ်ဝေးဝေးမှသာရပ်နေမိသည်။

" မင်းက အဲဒီအတိုင်း ရပ်နေတော့မှာလား "

" ဗျာ.. "

" မဗျာနဲ့.. ဒီအနားလာခဲ့ "

အနားသို့ တဖြည်းဖြည်းရောက်လာသောနန္ဒကို စိုင်းထွဋ်ခေါင် သည်စိတ်မရှည်စွာ လက်မှလှမ်းဆွဲလိုက်သည်။

" ဘာဖြစ်နေတာလဲ နှေးတုံ့နှေးတုံ့နဲ့ "

" ဘာမှမဖြစ်ပါဘူး "

" မင်းဘာဖြစ်နေတာလဲ.. နေမကောင်းဘူးလား မျက်နှာတွေရဲနေတယ် "

" နေကောင်းပါတယ်.. ဒီအတိုင်း... "

" ရှက်နေတာလား... "

" ဟာ.. မဟုတ်ပါဘူး.. သခင်လေးကလည်း.."

" ဟုတ်လို့လားကွာ.. "

" ဟုတ်ပါတယ်ဆို.. "

" ဟက်.. ဟုတ်ပါပြီ... မရှက်ဘူးပဲထားပါတော့.. အခုဘယ်နှနာရီရှိပြီလဲ.. "

" အခုက ခြောက်နာရီရှိပါပြီ "

" မယ်မယ်တို့က မနက်စာကို ခုနှစ်နာရီကျော်မှစားတာနော် "

" ဟုတ်ပါတယ် "

" ဒါဆို တစ်နာရီကျော်ကျော်အချိန်ရသေးတာပဲ။ မင်းမှာဘာလုပ်စရာရှိသေးလဲ.. အားရဲ့လား "

" ဘာမှလုပ်စရာမရှိသေးပါဘူး.. အားပါတယ်.. သခင်လေး ဘာခိုင်းစရာရှိလို့လဲ "

" အင်း.. ရှိတယ်.. ငါခိုင်းမယ့်အလုပ်က မင်းဘယ်မှမသွားဘဲနဲ့ ငါ့အရှေ့မှာဒီအတိုင်းထိုင်နေပေး "

" ဟမ်.. ဘယ်လို "

" ငါ့ရှေ့မှာဒီအတိုင်းထိုင်နေပေး... မင်းမျက်နှာကို အသေးစိတ်မှတ်သားပြီး ကြည့်ချင်လို့ "

" ဟမ်... "

" ဘာဖြစ်နေတာလဲ.. တဟမ်ဟမ်နဲ့ "

" ဘာမှမဖြစ်ပါဘူး.. နည်းနည်းထူးဆန်းနေသလားလို့ "

" ထူးဆန်းတယ်ဆိုပြီး မင်းကမလုပ်ချင်ဘူးလား "

" ဟမ်... "

" ကြည့်.. လာပြန်ပြီ အဲဒီဟမ်က "

" ကျွန်တော်က သခင်လေးရဲ့အခိုင်းအစေတစ်ဦးပါ.. သခင်လေးခိုင်းတာမှန်သမျှ ဘာမဆိုလုပ်ပေးရမှာပါ "

" အင်း.. အဲဒါဆိုဒီအတိုင်းထိုင်နေ.. ပြီးရင်ငါ့ကိုကြည့်နေ.. "

" အမိန့်အတိုင်းပါ "

ထိုင်နေရုံနဲ့ပြီးသွားတဲ့ ကိစ္စမဟုတ်ဘူး..။ သူ့ကိုပါကြည့်နေရမယ်တဲ့လား..။ သူ့အနားကပ်လာလို့ လူကပူထူနေပါတယ်ဆိုမှ အခုလိုအကြည့်ချင်းဆုံနေတော့ ချက်ချင်းကို အငွေ့ပျံချင်နေပါပြီဗျာ..။ မနေတတ်တာနဲ့ အကြည့်ချင်းလွှဲလိုက်တိုင်း ကျွန်တော့်အနားကို ပိုပိုပြီးတိုးလာတဲ့ သခင်လေးကြောင့် အနေခက်ရချီရဲ့..။

" သခင်လေး.. ကျွန်တော့်ကို မကျီစားပါနဲ့လား "

" ဘာလို့လဲ "

" အစကတည်းကမှ သခင်လေးကြောင့် ကျွန်တော့်နှလုံးသားက အရည်ပျော်နေပြီသားပါ "

" ဒီလိုစကားလုံးလှလှလေးတွေလည်း သုံးတတ်တာပဲလား "

" ချစ်ခြင်းကြောင့် ဖြစ်တည်လာတဲ့စကားလုံးလှလှတွေပါ "

" စကားတတ်လိုက်တာ... ကိုယ်ကအခု မျက်နှာမသစ်ရသေးတဲ့အတွက် နည်းနည်းညစ်ပတ်မယ်နော် "

ထိုစကား၏အဆုံး၌ မိမိ၏နှုတ်ခမ်းပေါ်သို့ကျရောက်လာသည့် သခင်လေး၏အနမ်းနွေးနွေး..။ နူးညံ့သည်။ ချိုမိန်သည်။ မိမိ၏စိတ်ကူးယဥ်အိပ်မက်များသည် လက်တွေ့ဖြစ်တည်လာသောအခါ အပျော်လွန်မိသောကြောင့် အိပ်မက်ဖြစ်‌ကြောင်း.. လက်တွေ့ဖြစ်ကြောင်းပင် မခွဲခြားတတ်တော့သည်အထိ ပျော်ရွှင်မှုအတိဖြစ်တည်နေသည်။ ထိုအထိအတွေ့လေးအား သဘောကျမိ၍ ယခုဖြစ်တည်နေသည့် အခိုက်အတန့်လေး.. ပျောက်ပျက်မည်ကို စိုးရိမ်မိသည်။

ချစ်တယ်သခင်လေး..။ အရမ်းချစ်တယ်..။ ကျွန်တော့်ကို သခင်လေးကချစ်ကြောင်း ဖွင့်မပြောသေးပေမဲ့ သခင်လေးရဲ့အပြုအမူနဲ့တင် နားလည်ပေးနိုင်တာမို့ ကျွန်တော်အဆင်ပြေပါတယ်..။ အဆင်ပြေတယ်ဆိုပေမဲ့ သခင်လေးနှုတ်ဖျားက ချစ်ကြောင်းဝန်ခံတာကို မသေခင်တစ်ခါလောက်တော့ မိုက်ရူးရဲဆန်ဆန် ကြားချင်သေးပါရဲ့။ ကျွန်တော့်ဆန္ဒတွေပြည့်ဝပါ့မလား သခင်လေး..။

ကျွန်တော့်ဆန္ဒတွေ မပြည့်ဝမှာကို တကယ်ကြောက်မိတယ်သခင်လေး။ ကျွန်တော်တို့နှစ်ယောက်လုံးက အမျိုးသား ဆိုတဲ့ဖြစ်တည်မှုခြင်းတူနေတယ်။ အဆင့်အတန်းတွေ သိပ်ကွာခြားနေတယ်။ ဒါပေမဲ့.. သခင်လေးသာ ကျွန်တော့်အနားမှာရှိနေရင် အရာရာကိုရင်ဆိုင်ရဲတယ်။

အဲဒါကြောင့် အခုချိန်မှာ.. ကျွန်တော်ရဲ့ဖြစ်တည်မှုတွေကို ခဏမေ့ထားလိုက်တယ်။ ချစ်တယ်သခင်လေး။

" မျက်နှာသွားသစ်တော့နော်.. သခင်မကြီးတို့ စောင့်နေတော့မယ် "

" အင်း... "

ထို့နောက် သခင်လေးသည် ကိုယ်လက်သန့်စင်ပြီး ပြန်ထွက်လာသောအခါ ထုံးစံအတိုင်း မိမိကအင်္ကျီဝတ်ပေးရသည်။

" မင်းကိုမှာစရာရှိတယ်။ အသစ်ရောက်လာတဲ့ မိန်းမအနားကို သိပ်မကပ်ပါနဲ့.. ကိုယ်မကြိုက်ဘူး.. "

" ဟုတ်ကဲ့.. သခင်လေးရဲ့ အမိန့်တော်အတိုင်းပါ "

သဝန်တိုနေသည့်သခင်လေးက အဘပြောဖူးသည့် ရက်စက်တတ်သော သခင်လေးနှင့် လားလားမျှမသက်ဆိုင်။ ခန့်ညားလွန်းနေသည့် သခင်လေးကို တစ်ကြိမ်တစ်ခါမျှ ရဲတင်းစွာ မိမိဘက်မှစတင်၍အနမ်းတစ်ပွင့်ပေးချင်မိပါသည်။ ထို့ကြောင့် မိမိထက် ခေါင်းတစ်လုံးစာမျှ ပို၍အရပ်ရှည်သော သခင်လေးအား ခြေဖျားလေးထောက်ကာ ပါးပြင်ထပ်သို့နမ်းခြွေမိခဲ့သည်။

" သိပ်အတင့်ရဲနေပါလား ကောင်လေး "

" ချစ်တာကို... "

" ကျွန်တစ်ယောက်အနေနဲ့ သခင်တစ်ယောက်ကို ချစ်မိတာ.. မင်းသိပ်မိုက်မဲလွန်းတယ်ကောင်လေး..။ အခု.. မင်းရဲ့မိုက်မဲမှုက ကိုယ့်ကိုပါကူးစက်တော့မှာလား "

" ကူးစက်ခံလိုက်ပါသခင်လေး.. ဘယ်အရာတွေဘယ်လိုပဲ ကာဆီးနေပါစေ.. သခင်လေးနဲ့အတူတူ ရဲရဲဝံ့ဝံ့ကြီးရင်ဆိုင်ချင်တာမို့.. ကူးစက်ခံလိုက်ပါသခင်လေး "

ထိုသို့ပြောပြီးနောက် ရင်ခွင်ထဲတိုးဝင်လာသည့် ကောင်လေးအား အလိုက်သင့်စွာ ဖက်ထားလိုက်မိသည်။ သူ့ထံမှ တစ်စွန်းတစ်စသော သတ္တိများ မိမိထံ ကူးစက်လို ကူးစက်ငြား ထွေးပွေ့ထားမိသည်။

သူသိပ်သတ္တိရှိနေသည်..။ မိမိအတွက် ရဲရဲဝံ့ဝံ့ရင်ဆိုင်ရဲနေသည်။ သို့သော် မိမိသည် ထိုမျှလောက်သတ္တိမရှိသေး..။ မရဲဝံ့သေး...။

ဤတစ်ခါတွင်မူ ကောင်လေးအား လေးစားမိသည်။ မင်းထံမှသတ္တိ‌များ.. ကိုယ့်ကိုပေးသနားလှည့်ပါ.. ကောင်လေး..။