Amiss Prayer (Zawgyi&Unicode) [Completed]

Part-52(ယိုင်နဲ့ခြေလှမ်း..)

For Unicode
ယိုင်နဲ့ခြေလှမ်း

ယခုတစ်လောလမင်းကိုကိုအဖို့ရာ ပြဿဒါးနေ့ရက်များ ပိုပို၍များလာသည်။ နေသူရိန်နှင့်တွေ့ဆုံသော ရက်တိုင်းတွင် လမင်းကိုကိုသည် တစ်ခုမဟုတ် တစ်ခုဖြစ်နေတတ်သည်။ တစ်နေ့တွင် နှစ်ယောက်သား လမ်းယှဉ်လျှောက်နေစဉ် ခွေးတစ်ကောင်က လမင်းကိုကိုအားလာကိုက်သည်။ နောက်တစ်နေ့တွင်လည်း နေသူရိန်နှင့်လမင်းကိုကိုအပြင်သွားစဉ် လမင်းကိုကိုအား ကားတိုက်မိမလိုဖြစ်ခဲ့ပြန်သည်။ ဤသို့ဖြစ်ရသောအကြောင်းအရင်းများအား ကောင်းစွာနားလည်သူက နေသူရိန်ပင်..။ ထိုကြောင့် သူသည် ပို၍စိတ်မကောင်းဖြစ်ရသည်။

“ ကျွန်တော်နဲ့တွေ့တိုင်း ကိုကို တစ်ခုမဟုတ်တစ်ခုဖြစ်နေတယ်နော် "

“ အခန့်မသင့်လို့ဖြစ်တာပါ "

“ အခန့်မသင့်တာလား.. တိုက်ဆိုင်မှုလား.. ကံကိုက ကျွန်တော်တို့ကိုမျက်နှာသာမပေးတာလား.. စဉ်းစားမရတော့ဘူး.."

“ အရမ်းမတွေးပါနဲ့... Sunပဲ ကာကွယ်ပေးမယ်ဆို.. "

“ ကာကွယ်ပေးမှာပေါ့.. ခင်ဗျားလေးကိုလေ.. ကျွန်တော့်အသက်ပေးပြီး ကာကွယ်ရမယ်ဆိုရင်တောင် ကျွန်တော်ပျော်ပျော်ကြီး အသေခံမိမှာ..။ ခက်တာက ကာကွယ်ပေးနေရင်းကို ထိခိုက်နေတာမြင်ရတော့ ရင်ထဲမှာ အဆင်မပြေတော့ဘူး "

နဖူးပေါ်သို့ဝဲကျနေသော ဆံစလေးများအား သပ်တင်ပေးရင်း ဆိုလာသည့် သူ၏စကား..။ ဝမ်းနည်းမှုအရိပ်အယောင်တို့ကို သူ၏မျက်ဝန်းများမှတစ်ဆင့်ခံစားမိပါသည်။

“ Sun အတွေးလွန်နေတာပါ.. အချိန်ကြာလာလို့ အတူတူဖြတ်သန်းသွားနိုင်ရင် အဆင်ပြေသွားမှာပါ "

“ ကိုကိုအခုလိုတွေဖြစ်နေမယ့်အစား.. ကျွန်တော်သာ သေလိုက်ချင်တယ်"

“ Sun... အဲဒီလိုသေမယ့်စကားတွေ ခဏခဏမပြောနဲ့..။ ကိုယ့်အချစ်တွေကို ဝန်ခံလာနိုင်အောင် Sunက သတ္တိတွေပေးခဲ့တယ်..။ အခုကိုယ်က Sunနဲ့အတူတူဖြတ်သန်းဖို့ သတ္တိရှိနေပြီလေ.. Sunလည်း အဲဒီလိုသတ္တိတွေရှိနေရမှာပေါ့ "

“ အင်းပါ.."

အားပေးနေတဲ့ ကိုကိုစကားကြောင့် အားတွေတော့ရမိပါရဲ့။ ဒါပေမဲ့.. သူထိခိုက်တာကို ခဏခဏမြင်နေရတာ အဆင်မပြေတော့‌ဘူးလေ..။ ကျွန်တော့်အတွက်နဲ့ သူနာကျင်ခဲ့ရတာ တစ်ဘဝတည်းမှမဟုတ်တော့တာ..။ အဲဒီအကြောင်းတွေ ပြန်တွေးမိတိုင်း မွန်းကျပ်တယ်..‌ ဒေါသထွက်မိတယ်..။ ကျွန်တော် တော်တော်အသုံးမကျခဲ့တာပဲ..။ ချစ်ရသူကို မကာကွယ်ပေးနိုင်ခဲ့ဘူး..။ ကိုယ်ကြောင့်ပါနာကျင်မှုတွေ ထပ်တိုးခဲ့ရတယ်လေ..။