ကြောင်စာထုပ်ကလေး တလှုပ်လှုပ်တယမ်းယမ်းကိုလက်မှာဆွဲကာလမ်းလျောက်လာနေရင်း ရပ်မလိုတုံ့မလို တဆတ်တောက်တောက်ဖြစ်နေသည့်ရှေ့ကကားကို ညီမင်းညိုကမျက်မှောင်လေးကျုံ့လျက်ကြည့်နေမိပါသည် ။
ဘာဖြစ်နေတာပါလိမ့် ......
ခပ်ဖြည်းဖြည်းချင်းလိမ့်သလိုသွားနေရင်းက တနေရာမှာတော့လုံးလုံးလျားလျားကိုတုံ့ရပ်သွားသည့်ကားကို သူကစောင်းငဲ့အကဲခတ်ကာ ဘေးနားကကျော်လာခဲ့သည် ။ ကားမှန်မည်းမည်းတွေနဲ့ကြည့်လည်းပဲအထဲကိုမြင်ရတာမှမဟုတ်တာကို ။
'' ဟေ့. . ဟေ့ . . ညီလေး . . ညီလေး . . အရှေ့က . .''
ပထမတော့ကိုယ့်ကိုခေါ်သည်မထင် ဒါပေမယ့်လည်း ညီမင်းညိုကခြေလှမ်းကိုအနည်းငယ်တုံ့နှေးစေကာ လည်ပြန်လှည့်ကြည့်လိုက်ပါသည် ။ ရပ်နေသည့်ကားဘေးမှာ တံခါးဖွင့်လျက်လူတစ်ယောက်ရှိနေခဲ့ပြီး သူ့ကိုလက်ယပ်ကာလှမ်းခေါ်နေပါသည် ။
'' ဟုတ် . . ဘာဖြစ်လို့လဲ . .''
'' ဟို . . ''. . . . . . '' ရပ်ကွက် ကဘယ်နားမှာလဲ ညီ . .''
'' ဒီဟာပဲလေ . . အစ်ကိုရောက်နေတာ ဒီရပ်ကွက်ပဲ ''
'' ဟာ ဒါဆို . . ၃ လမ်းကကောဘယ်ကိုသွားရမလဲ ညီ ''
သူမေးနေတာ ညီမင်းညိုတို့လမ်းပဲ ။
'' အခုဒီလမ်းမကြီးအတိုင်းဆက်သွား ရှေ့ကမြင်နေရတဲ့လမ်းမှာဘယ်ဘက်ချိုး ပထမဆုံးတွေ့တဲ့လမ်းကို ညာဘက် ''
စကားမဆုံးခင်တစ်ဖက်လူက ရယ်ကျဲကျဲဖြစ်လာကာ ခေါင်းကုတ်လိုက်သည်မို့ ညီမင်းညိုလည်း လမ်းညွှန်ရပ်သွားရပါသည် ။
'' ဒီဘက်ကလမ်းတွေက နည်းနည်းမျက်စိလည်တယ်နော် ကိုယ် ခုနက အဲ့ဘက်ရောက်ပြီးပြီ လမ်းပိတ်ကြီးဖြစ်နေလို့ပြန်ထွက်လာတာ . .''
'' အဲ့ဒါ အစ်ကို ၂ လမ်းထဲဝင်သွားတာဖြစ်မယ် အဲ့လမ်းကတစ်ဝက်မှာအပိတ် ''
တဖက်လူက ဘာမှဆက်ထွက်မလာပဲ ခေါင်းကုတ်ဖင်ကုတ်အီးအီးအဲအဲဖြစ်နေလျှင် သူလည်းသွားရမလိုမသွားရမလို ။
'' ဟိုလေ ညီ . . အပန်းမကြီးဘူးဆိုရင် . . ကိုယ့်ကိုလမ်းလေးတစ်ချက်လောက်လိုက်ပြပေးလို့မရဘူးလား . . ပြီးရင်ညီ့ကို အိမ်အထိကိုယ်ပြန်လိုက်ပို့ပါ့မယ် . . အကူအညီတောင်းပါတယ် ညီရာ . .''
