'' နင့်မောင်အလုပ်ရှုပ်နေတယ် သမီးရဲ့ . . ဘာဖြစ်လို့တုန်း . . ''
'' . . . . . ''
'' အေးပါ . . အေးပါ . . ခဏနေဦး . . ''
ဧည့်ခန်းထဲကနေကြားနေရသောစကားသံတွေက တရွေ့ရွေ့နီးလာကာ အိပဲ့ပဲ့တုံ့နှေးနှေးနဲ့ပဲ မီးဖိုချောင် ပန်းကန်ဆေး လက်ဆေးသုံးသည့်ဘေစင်ဘေးမှာ ပိုက်ဆက်တွေဖြုတ်ဆေးနေသည့် ခေါင်ဘုန်းဘေးကိုခြေသံတဖျတ်ဖျတ်ဖြင့် မေမေရောက်လာသည်။
'' နင့်အစ်မ သားကြီး . . ဖုန်းကိုင်လိုက်ဦး . . ''
'' လက်တွေပေနေတယ် . . မေမေရဲ့ ''
'' အဲ့ဒါတွေခဏထားပြီးကိုင်လိုက်စမ်းပါ သားရယ် . . ပုလဲတစ်ယောက်ဟာ ဘာတွေဂျီကျနေမှန်းကိုမသိဘူး . . ''
မြတ်ခေါင်ဘုန်းကသက်ပြင်းတစ်ချက်ကိုချကာ ပေရေစွတ်ဆိုနေသည့်လက်တွေကို ဘေးကအဝတ်စုတ်မှာပွတ်သုတ်ပြီး ဖုန်းကိုလှမ်းယူလိုက်ရပါသည်။
'' အင်း . . မမ ပြော . . ''
'' နင်ဘာလုပ်နေလို့ဖုန်းမကိုင်တာလဲ . . ''
အမ်း . . . လာပြီ . .
'' မမဖုန်းခေါ်နေလို့လား . .''
'' ခေါ်နေတာပေါ့ . . ဘယ်နှစ်ခေါက်ရှိနေပြီလဲ . . နင်ဘယ်ရောက်နေတာလဲ ''
'' အိမ်မှာပါပဲ . . ဘေစင်ရေပိုက်စို့နေလို့ ပြင်နေတာ . . ဖုန်းကအခန်းထဲမှာကျန်ခဲ့လို့ . . မမဘာအရေးကြီးလို့လဲ ''
'' ဟဲ့ . . ငါကအရေးတကြီးကိစ္စရှိမှ အိမ်ကိုဖုန်းဆက်ရမှာလား . . ''
ခေါင်ပုလဲရဲ့မလုံမလဲ လေသံကို ဒီတစ်ခါတော့မြတ်ခေါင်ဘုန်းကမအောင့်အီးနိုင်ပဲ အသံကျယ်ကျယ်ရယ်ချပစ်လိုက်မိရင်း။
'' လုပ်မနေပါနဲ့ မမရယ် . . ပြော ဘာလဲ . . ကျွန်တော်ဘာလုပ်နေလဲ ညီမင်းဘာလုပ်နေလဲ လှမ်း check တာမဟုတ်လား . . မဟုတ်ရင်မမဘယ်တုန်းကအိမ်ကိုအလကားနေဖုန်းလှမ်းဆက်နေတတ်လို့လဲ ''
'' မဟုတ်ပါဘူး . . ''
'' ဘာမဟုတ်တာလဲ . . ''
'' သြော် မဟုတ်ပါဘူးဆို . . နင်နဲ့ငါနဲ့ဒီအကြောင်းအကျေအလည်ဆွေးနွေးပြီးသားမဟုတ်လား . . ဘာထပ်ပြောစရာ လှမ်းစစ်နေစရာလိုသေးလဲ . . အဲ့ဒီကိစ္စကပြီးသွားပြီ ''
