⛺غربة عشاق⛺

💛الحلقة 5...💛

قلبي ضرب في صدري ضربات بش يخلعو...حملتها و نرج فيها فماش ما تجاوب...نكلم فيها وهي مسلمة:
-قوم..فيق..يا اشرقت....قوم وصلنا...أشرقت....مخيب اسمك وما ارزنو....تي كي بش يتربجوا بيك اش يقولوا؟؟؟....تي قوم وحل عينيك والله وصلنا...يا اظلمت....
تكح وتعاود:-يظلمها عليك....شكون قالك تربج بي....
نتبسم برغم تنبز....حمد الله عليها كي تكلمت..فجعتني عليها فجعة هي بيدها...من فرحتي بيها لزيتها لصدري بمعزة وهي ترجف مالبرد...
-سيب عاد قداش تستغل في الفرص...هبطني وانت لاصقني ملي ريتني...
عالنبزة سيبتها جات ملوحة وما البحر طشنا الزوز:
-قد روحك واخلط تراه..الحق في نعامل فيك بلحسنى
تكح وتضرب في الما بغزول...جاتها تلويحة على غفلة:
-يعطك سخطة...هكاكا ترميني...اه يامي ساقي ماعادش هازيني...
بركت ولا حبت تتحلحز...عارفها تاعبة وما تنجمش أما على لسانها الموذي...بعد ما قدمت خطوات رجعتلها...تو احنا مع بعضنا ووصلنا مش توة بش نجي ونخليها....رجعتلها هزيتها وانبه:
-فمك ما عادش تحلو حتى يحلها ربي...
لبدت ساكتة....مكبشة في ولاصقة....نستحلى في قربها..مانيش عارف اش لزني عليها...حتى نتحمل مسؤولية روحي في بلاد الناس خلي هي معاي..الله يعلم اش يستنى في نزيد نكمل على روحي بيها؟؟؟هاني عاونتها ووصلنا حد هنا ويزي...هكا عقلي يقلي وفمة حاجة دخلاني تقلي لا ما تخليهاش...وليت ننفخ مش وقت عركة بين عقلي وقلبي توة...وهي مش حاسة ولا فاهمة اللي قاعد يدور عندي...
هي: آخر محطة من الشط طوالت ورزنت على قلبي...نستنى وقتاش نوصل للبر وساقي تمس تراب الارض...ساقي اللي ما عادش هازيني...مستحلية ضمتو ومعاونتو لي برغم نكابر ونعارك وننبز...أما هو زادة مرجني بدكو ومساطتو...في لحظات سلمت وايست وذقت حرارة الموت...حسيت اني فقدت كل قدرة وطاقة على الاستمرار....وقت دمعي تحجر وقلبي دقاتو ضعفو وانفاسي تسللت مني...لقيتو في جنبي هزني وكركرني وعام بي....حسيتو ظهر نتكى عليه وقت الشدة برغم ما عطيتوش لسان حلو اما ما خلاهاش بي....ما نجمش يمشي ويخليني...صورتو كبرت ولمعت وتاطرت في نظري...أما الى متى؟؟؟اكيد مسطر برنامجو وعندو وين يمشي...اكيد يخليني ونتفارقوا وكل حد يشد ثنيتو....ثنية الغربة والشقا...
لابدة عندو نكمل في لحظات اخيرة في احضان راجل لأول واخر مرة...حضن عمري ماذقتو ولا استطعمتو..عشت عمري لكل محرومة منو ومعقدة....
واخيرا وبعد عذاب بعد رحلة موت ومواجهة وصلنا للبر....هبطني...وقفت وما نجمتش ناقف ساقي ماعادش هازيني وما عادش حاسة بيهم...بركت لوطة وهو تلوح بحذاي ممدود على طولو يتنفس بالقوي كينو واحد تسحبت انفاسو منو يعبي في رواريه بالهوا...قعدنا مشوار باهي مطيشين نرجعوا في النفس ونرتحوا في مفاصلنا اللي بيلت....الدنيا ظلام وضاع منا الوقت....ساكتين كان النفس طالع هابط...قطعو:
-شنية برنامجك يا ظلمة؟ عندك وين ماشية بالضبط؟
-وفيتش مالدك؟؟اسمي أشرقت مش ظلمة...
-بالله نحب نفهم علاه هالاسم..؟من قلة الاسامي؟
-ياخي عندك مشكلة معاه؟يعجبكش زادة....دبر في بابا علاش سماوني اكاكا....سكت شوية....ما عنديش لشكون ماشية أما ت ندبر راسي اش عندك في....
-معناها هذاكا حد نيتك.جاية لبلاد الناس لا عندك برنامج ولا عارفة اش بش تعمل؟؟؟تي هاك ظلمة الرسمي وما كذبتش عليك...
الظلام ما يخلينيش نشوف تفاصيلو أما غزلني علخر..
وذكرني اني فعلا جاية وما عنديش وجهة محددة....
ممكن ما كنتش نتصور روحي نوصل...كان هروب كهو من واقعي المر وتصورت اني نهايتي في البحر...لا نعرف حد نمشيلو ولا نسقت اموري قبل ما نجي...كان كل اللي يهمني نخرج ونشوف حل لحياتي اللي تحطمت من بدايتها....
-يزيتش توة....برا على روحك...عاونتني يعطيك الصحة...وصلنا برا تلقى الخير....
-شو ما اقبحها ....تسحت في ...جيت لداركم ولا بش ناكل من جقالتكم....اسكت اسكت خير....هيا نبدلوا حوايجنا و نشوفوا حل خلي تضوى الدنيا ويعمل ربي.
هو قال نبدلو وانا وجهي لخلخ...في الخلا هكاكا بين هوا وفضا وهو معاي....يا شومي...
-أما نبدل؟؟هنا؟؟وانت معاي؟؟
نسمع فيه يضحك باعلى صوتو.....
-هاك تشوف ظلام...وانا طامع فيك....زوز والشيطان ثالثنا...انا وياك يا حبي في الصحرا ومعانا ربي....هههههههههههه
وووه يجبد علي بدم بارد....كسرلي كرايمي....قمت هزيت صاكي وندهت بش نخليهالو واسعة وعريضة...
نمشي مرهوجة مانيش فاهمة وين ولا فاهمة الطريق..
اعصابي واقفة وهو يعيط وراي....ما على باليش بيه....مواصلة نزرب في خطواتي....وصياحو قبب وراي....حسيت روحي وليت نجري هاربة منو ومن بلادتو...صوتو ضاع وما عادش نسمع فيه...بعد الشط وحس الموج واجهتني غابة كبيييييرة....انا في مدخلها...منين بش نبدا وكيفاش وحدي؟؟؟؟مخي وجعني وعيني داروا والخوف تمكن بي....أنا في مواجهة غابة وحدي؟؟؟

✴✴✴✴