⛺غربة عشاق⛺

👣الحلقة 24...👣

...وقفت نتفرج في العز اللي عايشين...في قصر الدهشة عايش هو و عايلتو وانا وامي في دار كرا ، حتى كان جات دار...بيت انا وامي فيها و وسطية صغيرة عاملينها يجيناش حد ولو انو ما عنا حد يدق علينا الباب كان جيرانا واحبابنا...كوجينة ما توقفش زوز في وسطها...نفتقروا لابسط ضروريات الحياة.. شوية يويو ولا بشكوتو هذاكا مصروفنا اليومي...حتى القراية ما كنتش نحب لا نقرا ولا نوصل غير على خاطر امي شدت صحيح فيها...عشنا الحاجة و التعب وقلة الحيلة أما الصبر و العزة و القناعة زادة...وييييين احنا ووين هو؟؟زعمة ما خممش ولو للحظة وقال بنتي اك اللي خليتها اك العام اش احوالها ووين حيها زعمة حية ولا ميتة؟؟؟؟زعمة ما خطرتش على بالو حتى لحظة؟؟؟؟زعمة عندو قلب ولا لا قلب ولا مرارة كيفما تقول امي؟؟؟....وحق ربي وحق سنين القهر الا ما ناخذ حقي بيدي لو ما يستعرفش...الا ما نوجعو و نردلو وجعات عمري...عمري لكل الناس تستخايلني بنت حرام لا بو ولا اهل ولا امالي...ندور ومضموني معاي...اهي راني بنت بابا وامي وما جيتش غلطة حتى وان كنت غلطة غير مباشرة...عمري لكل وانا نبرر راني بلقب بو و راني مش بلا جذور وعروق... تعبت وعييت وخليت اللي وراي بش نقلو هذا الكل..
لميت شتات نفسي وقدمت لباب القصر وجاوني يتجاراو كيف كلاب الدم:
-تفضل اش حاجتك؟؟
-حاجتي بموسيو لطفي بن ابراهيم بكار...مش هذي دارو؟؟
-اش حاجتك عندو؟؟؟قول تو نوصلولو...
-لا يلزمني نقابلو...انا بنتو اشرقت بن لطفي بكار..
ضحكوا ضحكوا وتمقعروا علي حتى قالوا يزي...
فار دمي و غلا في عروقي دزيت واحد منهم...
-اي...تضحك على شنوة؟؟؟؟بنتو وكان عجبك وبعد أو كيف تعرف تو تاكل صوابعك على مساطتك...
في بالي بش يوخر و يوقف ياخي كمل في ضحكو... ضحكتو تلعلع وترتلي اعصابي وخلاتني نرعش بكلي من غلبي...دزيتو مرة اخرى حتى طاح ياخي قام ضربني..هو يضرب وانا ندز ونخبش ونعيط...حسيت بالقهرة...قهر عمري ما حسيتو بالمرارة اللي ذقتها توة.. تكتلوا علي الزوز يدزوا ويضربوا حتى  رماوني بعيد عالقصر...خلاوني مطيشة بركت على حرف الكياس نبكي ودمعي ما حبش يكف على الظلم و تطييح القدر وقلة القيمة...بلي نحكي شنوة في قلبي وقتها ما نجمش نعبر ولا نوفي حق الاحساس اللي قتلني واستنفر عروقي...من قوة وشدة القهر طحت نضرب في وجهي وفي صدري ونعيط...نصيح بأقوى ما عندي نفرغ في طاقتي وفي الظلم اللي حسيتو...
بردت بعد مدة اما ما تحركتش قعدت كالصمبة نستنى في كرهبة تدخل ولا تخرج...مانيش متحركة من هوني الا ما ناخو حقي...وتفكرت عبدو اااااه لو كان جا معاي مالا نتمس ولا نتضرب؟؟؟صحة ليهم ما جاش معاي...زعمة وينو وشنوة رد فعلو كيف لقى الورقة؟؟؟زعمة مش تسرعت كيف رديت الفعل هكاكا الله غالب شي اقوى مني لا نحب شكون يتسلط علي ولا يظلمني او يتعدى علي...حد ما يحقرني ولا يتعدى على خاطرني وحدي وقليلة حيلة حتى لو نحبو وروحي معلقة فيه...وانا سارحة بخيالي و غصرات قلبي ترج في وحس كرهبة جاية لباب القصر... كنت قاعدة وسارحة وطرت ساقي اعلى من راسي ما نمشي من هنا الا ما ناخذ حقي حتى لو بالموت كل شي استوى عندي توة...ترميت قدام الكرهبة ضرب فران قوي زعمة ضربني جاب ربي منقص في السرعة خاطر بش يدور لباب الدار...هبط الشوفور يعيط و حراس الباب جاوا يتجاراوا و كل واحد يعارك من شيرة وانا ولا نسمع ولا هاممني ندق على بلار الباربريز بش الراجل اللي نشوف فيه لداخل يغزرلي وينتبهلي...وجات العين في العين...ما عرفنيش ولا عبرني...راجل حفظت تقاسيم وجهو عن ظهر قلبي ومخبيتها في داخلي كيما يحافظ اي واحد فينا على هويتو خوف لا تضيع منو...تشلت حركتي وخمد لساني وتعقد وما نجمتش نعمل حتى رد فعل ولا نتكلم...عمل مجرد اشارة بيدو حطلي الشوفور فلوس في كفي ودزني بش يكركروني رجالو رابطين ايدي الزوز وهو يرجع يسوق بيه ويدخل لقصرو....قمة الخذلان ومرارة علجم...المرة هذي نبكي بسكات... تشوييييييت و نار تحرق في لظاها من داخل... بو ما يعرفش بنتو يستخايلها طلابة رمالها كمشة اوراق وتعدى...ما تحيرش فيه رابط الدم!!!ما زعزعوش احساس الابوة!!!!ما تحرك فيه حتى شي!!!!شنوة الكلام اللي بش يوصل دماري الداخلي:؟؟؟؟ولا كلمة...
نكركر في ساقي واحساسي منعدم في داخلي...خواء ووجيعة تحوم في ذاتي ما عادش نشوف قدامي...
عهدي بروحي نمشي والمشهد اللي عشتو يتكرر مرة واثنين....فقدت احساسي ببدني وخذلتني حتى ساقي وما عادش واعية بالدنيا....طحت وما في ذاكرتي حتى شي كان حس طيحتي وعيطة خرجت مني تزلزل الدنيا بقدر الخراب اللي خلاه السيد الوالد ورجالو في.....#منو

✴✴✴✴