شدوني في السبيطار...البيبي مش راكح...ودم وسكر طالعين...اكهو عاد خلاوني الجماعة وروحوا وبديت رحلة تمرميد السبيطارات...تحاليل ودوايات...وادهى ما فيهم الريجيم الغذائي...مت بالشر...ماكلة بالحساب لوش من اي نوع عجين ما تفوتش تبدا بالسلاطة بالمغرفة و قدمة خبز قد اربعة صوابع...نبكي مالشر (ههههه والله عشتها...) وليت ارنب من ماكلة الخضرة وضعفت و تعبت...في الليل تولي حلق وضحك وجو وفي النهار رحلة عذاب الدوايات ...ايا ولينا امالي الدار نخرجوا ندوروا في السبيطار ونطلوا عالمرضى ونعاونوا اللي ما يقدرش باللي انجموا...وامي تطل و لبنات مش مقصرين واحمد مرجلي الكبدة حتى وليت ما عادش نهز عليه...وامي وين تراني تجبدهولي وتقلي خوذ ونيس دار الدنيا وانا لا اسمع لا ارى لا اتكلم.....وانا غادي طلبوا بش نعمل تحليل التشوه الخلقي خوف من اثر السكر والدم في باستور وهزوني بش نعملو...لحقيقة مشيت نرقل بكلي خايفة لا تطلع بيها حاجة بنوتي وزيد خفت كي قالولي تصحح على تنحيتها لو طلع التاست بوزيتيف...ماشية وقلبي يرجف وخطوة لقدام وعشرة لتالي...جبدولي الماء من كرشي وقالولي 10ايام ما تتحركش ريسك كبير يطيح البيبي...خرجوني مرهوجة على كرسي... وفي هاك الساحة لكبيرة نغزر لفخامة نعرفها...صماصم ريتهم وحافظتهم عن ظهر قلب...البدن هو بيدو...ايه هو...اما الوجه بلا ملامح...وجه مقلوب بسمايل اخرى ما عقلت فيها شي خاطر ملفوف شطرها في الفاصمات...ما صدقتش عيني وكذبت نحك فيهم نحب نحلهم ونوعى اللي ريتو...ما كملت وهزيت عيني الا ما الجهامة اللي ريتها اندثرت...وانا في حالة ما تسمحليش بش نقوم ولا نتحرك...قلبي خض خضان بش يتقلع ولهاثي علا وصوتي ضاع...ما نجمتش نعيط ولا حتى نقول اسمو....همسة صغيرة خرجت من جواجي...عبدو.....
روحوا بي شبه فاقدة للوعي...حاولت نفقد ذاكرتي ونكذب اللي ريتو لكن ما نجمتش...احساسي والهيئة تقول هو...لكن هو ميت...ريتهم يهبطوا فيه ودمعي متحجر...كان نحكي إلا ما يكذبوني وما يصدقني حد ويقولوا هبلت...خزنت الحكاية في صدري وسكت...
كملت ايامات السبيطار وروحت...امي تمشي وتجي علي وكل موضوع تقلي احمد ...وكلمة منا وكلمة من غادي ترد المسلمة يهودية...كبشت وشدت صحيح في مشيت صبية وحرقت وجيت بصغير في مش مصدقينك لعباد في الناس كلاتلي وجهي في صغيرة ووحدانية في زوز ولايا وحدنا والمعبوكة هي بيدها صباح وليل حتى رخيت وقتلها خلي نولد وبعد يعمل الله دليل...نستنى في نتيجة التحليل بطلوع الروح خاطر تقعد شهر وانا اك الشهر طوال علي وتمرجت وقتلني الخوف على بنتي...نهار النتيجة خذيت تاكسي لباستور طلعت للمخبر متاعو مدوهولي في جواب مسكر وقالولي هزو لطبيبتك تقلك...يا اولادي طمنوني شي...زاد طيحولي الماء في ركايبي...هزيت اك الجواب وخرجت ساقي داخلة بعضها ونمشي بالقدرة..هابطة الجروح نلهث قلي ها مشومة نقلك هاني هنا...نرى في الدنيا مضببة وايدي ترعش بهاك الجواب تخلبزت و ادعثرت في اخر درجة نجي كف وغرزة في حملة راجل....حلييييلي نا اوما حليييلي...
راجل هو....الريحة نعرفها وساكنة مراكز الحس في داخلي....الاكتاف والرمانات هما...الشعر هو...ضربة الحاجب هي....الشفايف هي زادت حلاتها ضربة على الشفة الفوقانية....اما العينين مش هي...عينين زرق بحر فيهم لمعة ما عرفتهاش....عبدو أما موش عبدو...كينو تفرمط والنسخة التونسية ولات طليانية.... حليلي من ابو عيون زرق...في مخي وحدي وانا مازلت في حملتو والموجات تتهز و تتنفض بيناتنا قلت بالك لونتي...نسمعو برك نتأكد...همستلو:
-عبدو... وايدي تجس في اكتافو...حمحم و تكلم بصوت مبحوح مش هو صوتو مش هو:
-غالطة مدام...ربي يوصل بالسالم...
وقيمني ومشى خلاني شبه ضايعة ...مخي وقلبي مش قابلين اللي هو مش عبدو...هو أما تقول متوحم على التوريست...روحت طول نسيت الطبيبة ونسيت التاست وقعدت جوارحي بكلها عند ابو عيون زرق...
وقت دخلت للدار سألتني أمي على النتيجة وقتها تذكرت طلبت احلام بالتليفون ومليت عليها الخلاصة وقتلي لباس حمد الله على اساس غدوة نرجع بتحليلي لطبيبتي...اما كلو كوم و عبدو الطلياني كوم
...زعمة شنية لحكاية؟؟؟زعمة تكوخرت سايي ولا كيفاش؟؟؟زعمة ضيعت مخي وفات الفوت؟؟؟...قلت ما نبرد الا ما نحكي قلت لأحلام قتلي حليلي على اخيتي اصبر الصبر باهي...قلت لامي ضربت كف بكف وقتلي قتلك خوذي راجل هانك خجيت سايي... منين بش نردها انا توة؟؟؟ما عاد بيها وين قلت نمشي لادارتو نزيد نتأكد...من غدوة الصباح قلت ماشية للطبيبة وانا وجهتي اخرى...لبست وتهندمت وركحت حجابي...وجهتي ادارة عبدو نحب خبر يبرد قلبي ولا يقتل اخر أمل عندي....#منو
✴✴✴✴
أنت تقرأ
⛺غربة عشاق⛺
Romanceبيب بيب وسعو?😎💀👿👹رجعتلكم بكرونيك ناار 🔥🔥🔥كرونيك صاروخ 🚀♨قصة عسل🔞🔞😗😘👀 موضوع مشوق 💋👄أحداث جريئة غير متوقعة 👫💏 أفكار غير مألوفة 😥😆😉 الكاتبة متاعها تميزت بأسلوبها الفريد 😘😗 عندها قلم مبدع 😍😋ديما تبحث على المواضيع الجديدة 👍👍❌تب...
