⛺غربة عشاق⛺

💭الحلقة 36...💭

...وصلني لوسط المدينة هبطت شديت تاكسي وروحت...هبطت قدام القصر نكركر في ساقي مالباب عرضتني حركة متاع ناس داخلة بعضها...الحراسة والعساسة والدنيا ماكلة بعضها...انا دخلت وبابا يعرضني يعيط ويصيح وكشاكشو طالعة:
-وين كنت للا؟؟؟وليت تخرج وتبات مرة وحدة؟؟؟
عندي معلومات اللي انت كنت مع راجل شكونو وقول لحقيقة لنقتلك؟؟؟
-ما كنتش ...كنت مع صاحبتي حرقنا مع بعضنا وتقابلنا استدعاتني ومشيت معاها وغفلت الحراسة
-شبيك ما تكلمتش؟؟:
-تليفوني تسكر...
-بش نحسب روحي بهلول ونصدقك أما انت ما تعرفنيش عندك حق...تو نطلعها التاقزة اتهنى...برا اطلع وان شاء الله تطلع صادقة...
تلفتو وطلعت الدروج نكركر في ساقي تكركير وفي شطرها قدقد تكلم:
-اعمل حسابك جمعة اخرى تروح هذا اذا كان موش قبل.
-مليح....وطفيتو وطلعت لبيتي...ما صدقت طبقت الباب على روحي...دخلت للدوش...نحيت حوايجي ودخلت تحت الماء ونغزر لآثار عبدو عيني تعباو بالدموع...فيسع ما خرجت لبست وتمديت...لا نجمت نرقد ولا نجمت نقص التخمام...هكاكا ودخلت علي خالتي علياء نقزت:
-طمني جيتك بجاه ربي...عبدو؟؟؟
-لباس...تعدات سلمات...قالك بوك الليلة عشا رجال اعمال يحبك تحضر وفي ابهى صورة...
بستها وعنقتها بالقوي:-يبشرك بالخير يا وجه الخير...
تضحك:-هههههههههههه يا وحيدة...ايا مبروك لبنتي... ننصحك ما تظهرش عيش بنتي....
وخرجت والتاني في اسعد حالاتي بعد ما كنت في اتعسها...ايا تعدى النهار بالخف... استعديت ولبست روب قصيرة للركبة روز صدرها عريان للشطر كيما ظهرها...ايا قلت نتمتع بيها مادام زوجي مش هوني ومكيجت ومتعت روحي عروسة جديدة يا ديني...
ايا ريقلت اموري ومع وقت العشا هبطت قعدنا في الصالة وحاسة الجماعة عندهم ما يقولولي وساكتين طفيت الضو ما عيني في تقنقين...تمدت طاولة منا لغادي الخدام يهزوا ويرصفوا تعبات انواع واشكال...
لحظات وبدات تهل الضيوف...اغلبهم مناظر ريتهم في الحفلة منهم اك الماسط اللي استدعاني للعشا وطفيتو ملي دخل وهو عينيه تاكل في ماكلة غزلني...شوية اخرى ودخل راجل غول نحاول نتذكر وين شفتو خاطر وجهو مش غريب علي...مازلت نتذكر ونعصر في مخي وعبدو دخل وراه...عيني تحلوا على اخرهم..
اش جابو واش يعمل معاه؟؟؟...سلم وقعد بجنبو وانا مخي متبلنتي...والله ما يكون كان دخل لدومان الغبرة وانا نكذب وانسي...اه شومك اه نارك يا ظلمة والله ظلمتها على روحك...ناكل في روحي ماكلة واعصابي واقفة...ما هزش عينو معاي ولا عبرني وانا كان لي نشد نشولقو و ناكلو ماكلة...وباقي نفركس عالراجل وين ريتو وين؟؟؟...قاموا للعشا قمت نزرب وجهي احمر مغصورة واك اللصقة ادريانو وراي يجبد في بالهدرة جبدلي كرسي قعدت وقعد بجنبي وسي راجلي قاعد مقابلني...شوية وتليفوني نوقز مساج:
-اطلع بدل الشوليقة اللي لابستها...والبقة اللي بجنبك ريضو لنقلب عليكم الطاولة في زوز...
شدني كريز ضحك والجماعة لكل يتبسموا يسألوا شبيني...شديت روحي بالسيف وقتلهم لا حاجة تدغدغ في من ظهري....هههههههه وواصلت نضحك ما نجمتش نشدها حتى. ضحكتهم لكل معاي...
ايا الناس لكل تتعشى وانا اولهم عدني كليت الصحن اصلا مالغزول و بونتو في عبدو اللي ساعة ساعة نسرق النظر نلقاه يبلع ويغص ومش منجم ياكل...
وزيد كملت عليه اختي لاصقة فيه وتحاول تحكي معاه بكل الطرق وهو كلمة وقص...وفات مراسم العشا ورجعوا للصالون بش يحكيوا قبل ما ينقلوا لبيرو بابا وين يحكيوا في امور الخدمة...دارت الكيسان وهنا عادي بالنسبة ليهم مع الماكلة...خلطلي التورني وعبدو قلي براسو لا ما تشربش وانا قلت الا ما نعملها بالعاني
ياخي بابا عيط علي وقلي بالعربي بش ما يفهموهش:
-اشرقت لا نحي من يدك...وقام فك الكاس...عبدو تنفس وانا غزلت عليه اكثر...شوية وبابا قام بش ينقلوا لبيروه و ادريانو تكلم:
-لحظة مسيو لطفي قبل ما نحكيوا في امور خدمة..
انا نحب نستغل المناسبة هذي وقدام الناس لكل وكان ما تراش مانع...نحب نطلب ايد بنتك اشرقت...
انا بهت ولبدت في بلاصتي...عبدو شرق وولى يكح روحو بش تطلع والمصفارة اختي مشات تجري تجيبلو في الماء...الناس لكل سكتت ومرت بابا تبسمت توكلنا:
-مفاجأة حلوة شنوة رايكم؟؟انا موافقة وعز ما تاخذ..
وبداو اصحابو يتكلمو يدعموا في رايها...الا بابا وجهو حمار و تغصر وما عرفش يجاوب. قلت ما نفضها كان انا ونبعدو مالاحراج قتلو:
-طلبك يسعدني لحقيقة...اما راني مازلت ما نحبش نرتبط توة...
-خوذ وقتك واعطيني فرصة اعرفني فيها وبعد قول لا ولا ايه...نحب تعطيني فرصة غدوة نخرجوا نتعشاوا وبعد قرر...اش ىقلت؟؟؟
تكلمت للا مرت بابا:
-أكيد اخرجوا واتفرهدوا وان شاء الله تكملوا مع بعضكم...
مازلت نستوعب في ردها وفي اللي صار لكل  وتليفوني ضرب مساج اكيد عبدو قبل حتى ما نحل..
قريت كلماتو امر وتسلط ونفذ من غير نقاش:
-توة تطلع لبيتك وما تهبطش مهما يصير...والحساب تحت التوتة...#منو

✴✴✴✴