نمشي ونجي بين ايديه وعلى ايقاع خطواتو نتمايل و انفاسو تتواتر وقلبي يرج في من قوة الاحساس اللي عايشتو...كل ما يعمل دورة بي نتوه في دنيتو في عرض صدرو في صفاوة عينيه في حلاوة شفايفو...
نستعذب في لحظات قصيرة حسيتها دهر معاه في عالم انا وياه فيه وحدنا متوحدين نتمايلوا كينا جسد واحد على انغام موسيقى هادية راقصة وضو خافت...
وماني ديما لساني ما يهنينيش:
-عبدو...ظاهرلي بش يصيرلي كيف سندريلا...نص الليل نهرب نجري ونخلي صباطي...بربي خلطو انت علي....
شدو الضحك وما حبش يبين في وسط الناس:
-والله مضبعة ومخك ضايع مالفرجة...
وقرب لوذني يوشولي بصوت لاهث وانفاس حارقة:
-ظلمتي والله نحبك...توحشتك وتوحشت بلادتك...محلاك وما ابن زينك يا جويدة...حديدتي ما تخليش ايديهم تمسخك و قبل ما توفى الشطحة اتصرف غدوة العشية وايج لاحمد تو يجيبك...وجرب ما تجينيش...
ولقيت روحي مرة اخرى في ايدين اخرى نشطح وقلبي يخض...اول مواعدة غرامية مع عبدو...فرحانة وخايفة و مخلطة عندي الدنيا لكل...نخمم كان كيفاش بش انجم نفلت مالحراسة وشنوة بش نلبس لعبدو وزعمة شنوة بش يقلي وعلاه حارص على مقابلتي؟؟
كملت السهرية ضايعة و تايهة مانرى في حد في الصالة كان عيون عبدو وبدن عبدو مغطي عالناس الحاضرة لكل مسحها ولا كينها موجودة...قهرني كل مرة يعملي غمزة ومرة يبعثلي بوسة عالطاير مع تبسيمتو لعبت علي الدوخة ونستنى وقتاش توفى السهرة ونطلع لبيتي لعالمي الخاص...خاصة واللصقة اختي واحلة فيه بالضبط...بداو الضياف يروحوا و عبدو حسيتو يماطل بش يزيد يقعد يلقاش فرصة بش نحكيوا...اما شي وهاك اللصقة لابدة معاه...بدات تفرغ الدنيا جا سلم علينا وعينيه معبية كلام ووعود... وخرج وروحي خرجت معاه...عبدو النقطة اللي تضوي في اللي صارلي لكل كالمنارة اللي تدل للثنية والاتجاهات...عبدو قلبي اللي ينبض والروح اللي ساكنتني والليلة فهمت اكثر قيمتو ومكانتو في حياتي...وندمت اني ما وافقتوش وارتبطت بيه... مع خطواتو اللي خارج بيهم عيني ما نجمتش تفارق خيالو نحفظ في تفاصيلو في داخلي...بعدو فديت وحسيت ما عادش عيني لا بش نقعد ولا نزيد نسهر...
استأذنت مالجماعة بش نطلع وتحججت بأني تعبت.. لكن في الاثناء يرجع سي ادريانو ويقول قدام الجماعة لكل:
-سي لطفي بعد اذنك نحب نستدعى اشرقت للعشا غدوة لو تسمح...
هو غزرلي يشوف في رايي وانا كلام عبدو جا في وذني وكلام خالتي علية أما يلزمني نتصرف بلباقة..
قتلو:
-مرسي على الدعوة اما راني غدوة عندي ما نعمل مرة اخرى ان شاء الله...
مد يدو بش يسلم علي...والسلام ولى بوسة على يدي خلاتني نتقزز ونتزرفل منها وقلي:
-ما نعطلكش اما مصر بش نراك تو نتصل بمسيو لطفي ونحدد موعد اخر.
تبسمتلو ووميتلو براسي سلم عالكل وخرج...ومونيكا خرجت من سكاتها اخيرا:
-فرصة ذهبية ما تتفلتش راهي ولد ثاني اغنى راجل في ايطاليا...وسيبك مالتوانسة والفقر...
مازلت بش نرد عليها وحاستها تترومز والوالد رد:
-التوانسة اللي مش عاجبينك كنت تتمنى تعفس على ترابهم وكان نسيت نذكرك...و ما عندكش حتى دخل ببنتي هي حرة وحد ما يؤثر عليها...
وقرب عنقني وباسني من خدي ووشوشلي:
-تصبح على خير برنسيستي برا ارتاح....
طلعت نجري ومانيش مصدقة...قلبي بالدقداقة...عبدو وهو فرد ليلة ياسر علي...اول رد فعل بحنان بو ومعزتو لبنتو...اول بوسة وتعنيقة...مانيش مصدقة... في شطر الدروج درت ورجعتلو نجري ترميت في عنقو ولفيت ايدي عليه بكل قوة وبستو...زاد لزني ليه بالقوي والعينين لكل تغزرلنا اللي بهتة واللي غزول واللي لامبالاة...ما على باليش ومستمتعة بحضنو... ما سيبتو كان كيف وشوشلي:
-اشرقت عمتلك اللي حبيت عليه ومن قلبي...ما نحبكش تخالط طلاين ولا تدخل في معامعهم...يزيك حد هنا...نهيرات كملهم معانا وروح لناجية...
قتلو باهي وهزيت روحي لبيتي نجري وانا طالعة بش نراجع احداث ليلتي المتواترة...دخلت طبقت الباب و دورت مفتاحي فيه بش ما يقاطع خلوتي حد... واتكيت عليه مغمضة عيني ويدي على قلبي اللي يتهز ويتنفض داخلي...مانيش مصدقة اللي صار لكل.. شفت عبدو اخيرا وعنقني وباسني وشطحت معاه... بابا عطاني شوية من قلبو ومن حنو علي...فرحتين في ليلة وحدة ياسر علي....تنهدت من عروش قلبي حاستها فرحة اكبر من طاقتي...حليت عيني و العينين اللامعة تحت الحاجب المضروب قدامي...جيت بش نعيط مالصدمة وهو سكتلي فمي وحط يدو عليه ووشوشلي:-اسسسسس ما تفضحناش...
-اش تعمل عبدو في بيتي كيفاش عرفتها ومش روحت انت ياخي؟؟؟
-قداش تسأل اش يهمك في كيفاش وعلاش.ما نجمتش نروح قبل ما ناخو بوسة تصبيرة لغدوة...
-مسكين..متأكد انت اللي انا جايتك غدوة ومصدق اني مسلمة وتبوس وتعاود؟؟؟
-ههههه بربي لا تضحكني لنتفضحوا..متأكد اللي بش تجيني وما تجينيش نجيبك.وعينيك تقلي اللي انت تحبني ومسلمة ورجفة شفايفك تقلي ارويني ورعشة بدنك تقلي دفيني...قول لا تراه #منو
✴✴✴✴
أنت تقرأ
⛺غربة عشاق⛺
Romanceبيب بيب وسعو?😎💀👿👹رجعتلكم بكرونيك ناار 🔥🔥🔥كرونيك صاروخ 🚀♨قصة عسل🔞🔞😗😘👀 موضوع مشوق 💋👄أحداث جريئة غير متوقعة 👫💏 أفكار غير مألوفة 😥😆😉 الكاتبة متاعها تميزت بأسلوبها الفريد 😘😗 عندها قلم مبدع 😍😋ديما تبحث على المواضيع الجديدة 👍👍❌تب...
