يضحك عبدو حتى شدتو الكحة...
-والله بش تقتلني انت....يهديك منين غول؟؟؟راني زوالي والله....
وشدني من يدي الصالة يكركر في ويضحك وانا نحترم وراه...نكذب كان نقول مش خايفة...صحيح نحبو ونعشقو ملي ريتو وهو ساكن في مخي ودخل لقلبي...اما رهبة اللحظات هذي حقيقة مؤكدة مهما تكون تحبو وروحك معلقة فيه...نمشي وساقي مخبلة في بعضها ومخي واقف ما نحبش نتصور اللي جاي..بدني بكلو مكبوس والرعشة مش حابة تسيبني..
دار عبدو جا مقابلني وضمني لصدرو بكل قوتو و بدا يتمايل مع الموسيقى بكل هدوء مش عارفة منين جابو...يا لندرا يتصنع فيه ولا حقيقي؟؟...وبالشوية هديت ووليت نتمايل معاه في تناغم وهو ساكت مش حاب يتكلم ولا يوترني...و لقيت روحي هديت و اتكيت على صدرو نتنفس في ريحتو...ريحة الرجولية المعطرة بشريحة البرفان...وكانتلي انفاس مهدئة حاولت بيها ننسى الظرف متاع عرسي وكل ما هو محيط بي...حاولت اني ما نرى كان وجه الراجل اللي حبني وحب نكون نصفو الثاني...خدو على خدي وشادلي يدي ويدو لأخرى على خصري نتموجوا في ثنائية راقصة تحاول السعادة تطرشق من كل شيرة منها لكن ثمة موانع بعد تو نفهمها انا وياكم...
وتسلل صوتو في وذني ...باعذب كلمات وارق معاني خلاني نذوب ونتخلى على دفاعاتي ونرمي احترازاتي لكل وراي:
...ياقلب رفقا بالحبيب فإنه
مثل الندى فوق الزهور تبخترا
عين إذا هام الحبيب بلحظها
لمعت نجوما بين أحلام الورى
الثغر مبتسم يعانق خده
والوجه من فيض الجمال تمرمرا
العود مثل الخيزران تمايل
والحسن وصف للجمال محيرا
طيف الحبيب إذا يحرك مهجتي
فأذوب عشقا إذ اراه تحيرا
رفقا فقلبي في هواها متيم
إنى أرى في الحب كأسا مسكرا
ياحظ من سكن الغرام بداره
ينبوع عشق في الفؤاد قد سرى....
...ظلمتي...ما حنش قلبك؟؟؟...ما رفش؟؟؟...
بعد بكشتي تكلمت:
-والله تخلع قلبي اعبدو اخي...
-هههههههههههه يعطك سخطة بش تقتلني راك بتبهليلك...يا بنتي تكبس...
-وانت خليت في عظم صحيح نتكبس بيه...
-زايد مالا...جيتك منا جيتك منا شي...ايا سيدي نتوكل على ربي...
-فاش تعمل؟؟؟لا عاد بالله خليني تو نتكبس...عبدو بجاه ربي بيت النوم لا...-وهو هازني في حملتو وانا نتملص-...عبدو خلينا نشطحوا ماني اخيتك...
-ماكش اختي ..مرتي...و الليلة يا قاتل يا مقتول...
-وووه علاه هالفال؟؟؟...باهي اسمعني خليني نلبسلك اك المعترة ونجيك...باللي يعز عليك خوذني على قد عقلي... ايا هبطني...
-برا اسيدي...هاني نستنى فيك...
وما صدقت نفذت بجلدي و لقيت فرصة بش نلم روحي...دخلت و سكرت الباب بالمفتاح...نحيت اك الفوال و ما تابعو...و سلت اك الروبة و نتفرج في الربع ميترو اللي شاريهولي...رجعتها و حليت الدراسينغ نلوج في حاجة مستورة...بعد نعلت شيطاني و استهديت بالله الراجل يستنى وما نعرفش بعد هالليلة مازلت نشوفو ونتلم عليه ولا...عاودت مديتها ولبستها.
سيبت شعري الملموم ورشيت شوية برفان وخرجتلو..
مربوثة ومترددة دوب ما شافني عبنيه لمعت وقاملي..
كان منحي سوريتو وفيستو وقعد في خلعة...اك الصماصم يلمعوا في الضو زدت دخت ولساني تلكون..
-ما شاء الله على زين مريتي...الله يبارك...
قعد وقعدني في حجرو وبدات ايديه طالعة هابطة وانا قلبي يرج في رجان...و شفايفو ترفرف على وجهي دافية تلهج...بوسات بدات هادية وعمال تقوى ايقاع لقاءنا يتصاعد.وايديه تطوف تزور في بدني.تناغم اجسادنا ونسيت خوفي وحل محلها لهفتي و طارت الفجعة ونسيت الدنيا ووقف الوقت بخبرتو وطاقتو...ولقيت روحي نتجاوب ونتفاعل في وسط اهات ومد وجزر...ما نعرفش كيفاش وصلت للفرش وبيت النوم ولا كيفاش تم اللقاء ووليت زوجة رسميا لعبودي...هزنا النوم وانا مخدرة كيني في حلمة...مع خيوط الفجر لولى ما زلنا دايخين...حس ساقين تجري وتسركل في الدار...و عبدو كان حاضر حل عينيه ووقف وذنيه على حس تكتيك الزناد استعدادا لبدء حرب...حرب ما نعرفش شكون بش يكون فيها الرابح والخاسر اما المؤكد اني هزيمتي انا هي الفادحة...حليت عيني نسأل ونرى في عبدو شاد سلاح...كيفاش وعلاش....ضايعة وحصل ما في الصدور#منو
✴✴✴✴
أنت تقرأ
⛺غربة عشاق⛺
Romanceبيب بيب وسعو?😎💀👿👹رجعتلكم بكرونيك ناار 🔥🔥🔥كرونيك صاروخ 🚀♨قصة عسل🔞🔞😗😘👀 موضوع مشوق 💋👄أحداث جريئة غير متوقعة 👫💏 أفكار غير مألوفة 😥😆😉 الكاتبة متاعها تميزت بأسلوبها الفريد 😘😗 عندها قلم مبدع 😍😋ديما تبحث على المواضيع الجديدة 👍👍❌تب...
