⛺غربة عشاق⛺

⛺الحلقة 7...⛺

...كملنا ساكتين حتى لين وصلنا للمجزرة....والله مجزرة باتم معنى الكلمة...وخرت نرد لين قلبي بش يطلع...عبدو تلهى يفركس في الكرهبة و اللي ثمة وانا وخرت لتالي وعطيت بالظهر....
هو:...هذي بداية ما تفرحش....حضرنا على حرب دموية بأتم معنى الكلمة...ناس ملوحة هنا وغادي...دم مطشوش في كل بلاصة...وأنا ندور بيناتهم تذكرت اك الرابح اللي يلم في الغنايم بعد هزيمة خصمو وظهرلي اللي أنا الرابح...لميت اللي جا قدامي....وفركست في الكراهب...هزيت اللي لقيتو يعاوني ورجعتلها كركرتها وهي في حالة....بعدنا مليييح عليهم بعد ما هزينا صيكانا وتوغلنا في الغابة في يدي تورش لقيتها....
-يزينا حد هنا والله عييت عبدو...خلينا نرتاحوا...ما عادش انجم نزيد حتى خطوة...
-بالله كيفاش بش يجينا نوم في غابة؟؟نورمال انت؟
-ما نرقدش اما نرتاح...ساقي ما عادش هازيني...
-الصبر للعالي...ايج نقعدوا هنا...
حطينا صيكانا وقعدنا عليهم ظهوراتنا لشجرة مالشجر
كتفي عند كتفو...إيه ملا راحة...
-ما جبت معاك شي يتاكل؟؟لقيت بسكويت في كرهبة منهم تأخذ،؟؟
-لا ما نحبش اش لزنا عليهم؟جبت حكيكة بسيسة...
-هههههه مد مد...كول البسيسة والتمر يا مضنوني..
-اسكت وانت الدك يجري في دمك...ظرف متاع غنا حتى هو....شد كول...
غطسنا في هاك الحكة لقينا فيها العز وقتها...بعدما كملنا قعدنا ساكتين مشوار...حس ذيب يعوي لصقت في عبدو نوتوت:
-تسمع في اللي نسمع فيه؟؟؟
-مش نسمع برك كيني شفت عينين تلمع في الظلمة...
لبستو اصلا وهو مدور ايديه علي بكل قوة بود بخوف ما نحبش نأول ولا نخمم لبعيد...أما احضانو دنيا اخرى...
هو: الحقيقة لا ريت عين ولا سمعت أما حابب نستغل كل فرصة نعنقها فيها نستعذب في قربها ودفاها...ما تخممش مرتين قبل ما تترمى عندي...محوطها بذراعاتي كيني نحمي في روحي مني...محلا قربها ...
-مازالت العينين؟؟
-هههه بهلولة....مشات...
بدات تتملص بش تسيب روحها مني وانا مكبش:
-اي سيب عاد وانت ملي ريتني معنقني...
-عاد انا نعنق وحدي ولا انت تترمى عندي؟؟
-بربي يزي مالدك....وقلي اش ناوي بعد هالليلة؟
جبدت سيقارو من باكو لقيتو شعلتو النفس لول والثاني ومخي سارح في اللي جاي:
-نخرجوا من هالغابة نوصلوا لأقرب عمران نتفارقوا...
بش نمشي لصاحبي نعدي بحذاه مديدة حتى نتصرف وانت؟
-لحقيقة ماني قتلك ماني ماشية لحد معين اما أو نتصرف المفيد وصلت...
-تستخايل ساهل وانت لا اوراق لا شي...والله بهتني...
تحكيش طليان عالاقل؟
-ايه عملتو مادة اختيارية ودرجة في الفاك و انت؟
-انا قريتها قبل لا نجي عام كامل...بربي مش بش تقلي شنية حكاية أشرقت؟؟ماهواش اسم تونسي تحسو شرقي...زعمة ما عندكش خيط مصري ولا الزون اللي بحذاها؟؟؟
-لا تونسي ابرد ومش بش نقلك...واسكت خلينا نرتاحوا حتى تضوى الدنيا...
سكت سارح في افكاري وهي لابدة في جنبي...حبيت ناكدلها وما نخليهاش تحلم اللي بش نكملوا مع بعضنا وهو في الحقيقة انا انبه في روحي...ما يلزمنيش نعلق روحي بيها ولا غيرها...لحد الساعة وقفت معاها بما فيه الكفاية نخرجوا منا وكل واحد يشد ثنيتو...
هي: وجعني قلبي عالاخر كيف قال نتفارقوا...صعب علي اني نتصورها ونستوعبها أما حقيقة مرة يلزم نتقبل مش بش نثقل عليه... انا زادة جاية لوجهتي و ثنيتي ومن غادي معملة على روحي...أما والله فمة حاجة دقتني كيف قال اكاكا قررت نسكت وما نزيدش نحكي....فيه البركة..لا نبني امال ولا نكون احلام....الواقع اللي يستنى في مر وصعيب ويلزمني تتهيأ...سرحت بفكري في اللي جابني وأسبابي...ما فقتش بروحي كيفاش هزني النوم....مطمانة بيه في جنبي...فقت على يدو ترجعلي في شعري لتالي بحنية
حليت عيني على عينيه...عينين كحلة ظلام ما تضويلكش بنظرة غامضة يزيدها غموض بحاجبو اللي فيه ضربة...من عينيه هبطت بنظراتي لشفايفو كبار مزمومة حازمة...شخصية ظاهر عليها الصعب درا كيفاش عدالي خوفي وهبالي...للحظات تعلقت العين بالعين والدنيا ضوات...كل واحد فينا نظراتو تمسح وتحفظ في قسمات لاخر...تنحنح وقلي:
-ايا للا قوم خلي نتوكلوا...
-صبح اخي الناس تقوم الصباح تقول صباح النور...
-انا لحقيقة حبيت نقول حاجة اخرى في المباشر...وعينيه تغزر لشفايفي...أما استهديت بالله.
صباح الخير هيا قوم...
تربثت وقمت ننفض في حوايجي وندور في وجهي في كل بلاصة الا وجهو ما نحبش نقابلو...هزينا صيكانا على ظهوراتنا ومشينا...
نقدموا في وسط الغابة في سكات...كل واحد منا يستنى وقتاش يبان مخرجها و نرتاحوا...خطواتو متسارعة وفحجتو كبيرة بلي حاولت نخلط عليه وديما سابقني...وليت نلهث و والنفس قريب يتقطع علي تثنيت شادة ركايبي نجبد في النفس بالسيف وهو ما فاقش بي كمل في الطويل...تلفت ما لقانيش بدا يعيط ورجع يكركر في وراه وانا نخرنن بش يسيبني...حتى بانت فجوة كبيييرة وحس كياس وكراهب...وأخيرا وصلنا لمفترق طرق وكل واحد بش يشد ثنيتو....

✴✴✴✴