...فقت مرهوجة ما فاهمة شي...عبدو واقف وعينيه حمرا تقدح نار...بش نتكلم شاورلي بش نسكت بصبعو و عملي براسو حركة بش نتبعو...قمت و نسمع في حس ساقين تدور و تسركل في البيت...شاورلي نمشي وراه بهاك الربع ميترو اللي مدهالي البارح...وين الدراسينغ وخر الحوايج اللي معلقة ودخل وجبدني وانا حالة فمي في الحيط فمة دورة كيما متاع بوانيي باب دور فيها مفتاح وتحل باب صغير على دهليز جبدني دزني لولى وهو وراي و صاك في يدو عاود سكر كل شي و قلي: امشي....
مصدومة ولا فاهمة حاجة من اللي يصير قعدت كالبهلولة من صدمة لصدمة نمشي ونتكركب خايفة لنتكب على وجهي...يوشوشلي:
- ازرب شوية خلينا نبعدوا من هنا...
انا نحس في عروق مخي بش يطرشقوا مالغزول نبكبك وحدي و نتكرم:
-هذي الصباحية مباركة يا عرسان؟؟؟!!! هكا في دهليز و بالخلعة اللي عاطيهالي البارح؟؟؟
-سامحني حبي...نعرف فرحتنا مسروقة...نعوضهالك حبي...اقف البس الساعة وبعد نكملوا مازالت الثنية طويلة...
وقفت حل هاك الصاك قاري حسابو يعني وحاضر للمفاجات الكل ومتوقع اللي قاعد يصير...
-باقي ماكش بش تفسرلي ولا تقلي شي...ورد بالك تقلي مش وقتو...
-ايه مش وقتو جملة...واركح خليني نلبسك..
ظاهر متوتر من عيطتو لبدت لبسني حوايجي من فوق و كملت انا السروال وما تابعو و السبادري..هبط ريقل ربايطو و لبس هو في سكات بالخف و رجعنا نمشيو هو سابقني و الضو في يدو وشادني باليد لاخرى...سكات مخلط بغش ولوم...
-ظاهرلي عرست بغبار مادام الصبحية طلعت بالسلاح ودهليز و ....
-اشرقت...كلمة لا ...ما تزيدش تكمل على ما بي... اسكت خلي نلقاوا حل...
-والله انا اللي مضيعة مخي ونتبع فيك...والمصيبة كان نحبل من اولها وانت تغبر وترصيلي نبكي ونربي في صغيرك وحدي كالكرونيكات لكل....
-ما ضيعتك كان الكرونيكات اللي تقرا فيها...اسكت.
ايا سكتنا والدهليز ما حبش يوفى...تعبت قلت نستغل الظرف:
-عبدو...حملني..تعبتني راك مالبارح...راني عروسة جديدة...ونتمتم وحدي تكب سعدها...
-سمعتك راني...وطبس علي هزني على ظهرو ويتكلم..
عروسة بنينة ودلولة اما دخلت لسرداب مصايب...
-كلو منك ولا انا اش مدخلني...
-لا يا للا دخلتو بدخلتك لدار بوك...اسمع كلامي بالحرف وطبقو اظلمة...بش نخرجوا ونروحوا... شتروح لداركم كينو لا صار ولا كان..كيف يسالوك قول تلاقيت انت ووحدة مالبنات اللي حرقوا معاك وضيفتك وتليفونك تسكر شارج...و ما تزيدش... بش نعطيك تليفون نكلمك عليه بالمساجات تقرا وتفسخ وتعمل اللي نقلك عليه...سمعتني....
-أبك أبك ...هاي خدمة عصابات هذي...
-اشرقت تكبس مانيش نفدلك...حياتك في خطر... انا حاميك وفي ظهرك نفذ اللي نقلك عليه وما اتعبنيش..
بوك عندو مصايب وراه و بش يحاول يسفرك على قريب...واناىخايف لتتورط في مصيبة كبيرة قبل ما تروح...عيش حبي اعمل اللي نقلك حتى تتفض...
-باهي ما تبكيش برك...
-زايد ماسطة وبليدة...
-مش البارح كنت تقلي ما ابنك!!!توة وليت ماسطة؟؟
-هههههههه بليدة...والله بنينة...اهبط يا بنينة خلي ناخو تصبيرة...
-لا مالصباح المبروك انقطع البث....امشي يا غلطة عمري.....
-هههههههه يعطك سخطة بش تقتلني...انا غلطة عمرك؟...اهبط نوريك...
وهبطني فيسع من على ظهرو ولفني بايديه وغطسنا في بوسة طويلة انا نتندم فيها على العسل اللي تسكر بابو هالصباح وعبدو كينو يودع في بيها...همسلي:
-احلى وابن غلطة...ظلمتي...هنيني على روحي...شد التليفون...
-علاه ياخي ماكش ماشي معاي؟؟؟
-لا حبي...بش نخرجك لكرهبة تستنى فيك وحدك... انا عندي ما نعمل...باسني من جبيني بوسة مرصوصة قلبي تسل معاها واحساسي بوجيعة تنخز في قلبي كيني نودع فيه...
-عيش مريتي رد بالك على روحك...ورد بالك تصدق اي حاجة تسمعها علي...الا لو تقالك مات...استحفظ على روحك ما تسمعش كلام بوك ورد بالك من مرتو
خالتي علية اوثق فيها... وشدلي وجهي بيديه يبوس ويعاود تخنقت بالبكا وضميتو لي:
-عبدو شبيك؟؟؟ياخي كهو مانيش بش نشوفك؟؟؟
-ما تبكيش حبي...تو نكلمك وخليك قوية كيما عرفتك
اخرج يلا...
وحل الباب كرهبة واقفة طلعني وسكر علي الباب وانا باهتة دمعي هابط في سكات نغزرلو ويدو تبيبيلي و قلبي بش يسكت...دارت الكرهبة ماشية وعهدي بروحي نغزرلو اختفى....قعدت ندور بعيني ونفركس وفجأة دوى انفجار كبير بعيد قلبي سقط معاه...
الكرهبة عمال وتبعد و النار لاهبة مانيش عارفة بالتحديد وين..اما قلبي عصر علي ووجعني وجيعة حسيت النفس بش يتقطع علي بيها...نعيط عالراجل اللي يسوق:
-بالله اش فمة؟؟هذيكا حريقة في الدار اللي كنت فيها؟؟بربي قلي عبدو لباس؟؟؟
-ما تخافش مدام...كل شي تعرفو في وقتو...وبربي ما عادش تسألني عندي أوامر نوصلك كهو..
سكت وقاعدة وانا نتضمضم ومخي بش يتحرق بالهلواس....زعمة ودعني نهائي؟؟؟زعمة كهو مكتوبتلي ليلة برك معاه؟؟؟هذيكا هي ليلة وفراقها صباح؟؟؟
قلبي دم وما يعلم بحالي كان اللي خلقني...#منو
✴✴✴✴
أنت تقرأ
⛺غربة عشاق⛺
Romanceبيب بيب وسعو?😎💀👿👹رجعتلكم بكرونيك ناار 🔥🔥🔥كرونيك صاروخ 🚀♨قصة عسل🔞🔞😗😘👀 موضوع مشوق 💋👄أحداث جريئة غير متوقعة 👫💏 أفكار غير مألوفة 😥😆😉 الكاتبة متاعها تميزت بأسلوبها الفريد 😘😗 عندها قلم مبدع 😍😋ديما تبحث على المواضيع الجديدة 👍👍❌تب...
