⛺غربة عشاق⛺

😺الحلقة 15...😺

...كنت نفدلك على عبدو ونتبولد ما تصورتش اني تصير بالرسمي حكاية كيف هكا...وقفت وراه نرقل بكلي ونتمتم:
-عبدو بالله لا تخليني...انفخ بونياتك و كولهم بطريحة كيما في الافلام...بالله ماك بطلي المنقذ...وووه علي ولا والله مشيت فيها...
جاوبني راص على سنيه يتكرم علي بالغزول:
-يعطك هدة في فمك اسكت خليني نتصرف...
وقعد يستدرج فيهم بالحديث...
-نعطيكم اللي عنا لكل وهي لا...
قتلو وانا نوشوش في وذنو من تالي:
-علاه تعطي فيهم تي اضرب ازاح...
نفخ بعصب وقلي:
-يا بنت الناس رانا في بلادهم...تحبنا نتورطوا وياكلنا الحبس....
-ووه ابعد مالا خنضرب انا...ما نخافش ما دامك معاي.
-فمك تخيطو ولا وحق ربي نخليك ليهم...
-تفدلك انت...
-جربني....
سكت ولاخرين قاعدين يتفاوضوا فلوس ولا انا أما كبيرهم مصر قلو:
-هي وفوقها اللي عندكم لكل ما عندكش خيار ولا نقتلوك وناخذوهم بسهولة...
نحس في عروقو نفرت وهو اللي كان هادي أو يهدي في روحو...نفخ يستعوذ مالشيطان...كبس بونيتي ونسمع في عظامو كي تطرشق بالوحدة...نفض رقبتو وعدى ابهامو على خشمو وقلي بالقوي بلهجة متاع عصب ومتاع واحد جاب اخرة صبرو:
-من وراي ما تتحركش...سمعتني...وخر لتالي...
وخرت وقلبي يرجف....نراجع في كلامو عندو حق... تبلى بي ووحل وحلة المنجل في القلة...ركبني رعب مش عادي...هو وحدو مقابل ثلاثة رهوط...ندعي في ربي يفرج كربنا...داروا الثلاثة بيه كي كلاب الدم وشمروا على ذراعاتهم...وانطلقت حرب طاحنة بينو وبينهم وانا فرايجية...كل مرة قلبي يسقط نقول عبدو ما عاد تقوملو قايمة...كلا بيه ودمدموه أما ما خلاش حتى. هو بونية و ساقين وراس...زوز مرخوفين فيسع ما طاحوا بمفعول المتكيفينو...أما الراس متاعهم كاسح هو اللي طوّل مع عبدو...جبد موس من جيبو وبدا يلوح فيه قدام عبدو.... ترعبت نلوج في حاجة نعاون بيها....ضرب الضربة سمعت حسها في الهوا شلط عبدو اكيد اللي ترهوج مالضربة...يلزمني نتصرف تلفت لقيت حجرة باهية هزيتها و نجيه على غفلة ضربتو بيها على راسو طاح ما في عينو بلة.... عبدو ولى يعيط علي:
-تي علاه؟؟...اش ضربك في بوه؟؟تو كان يموت نوحلو في بلاه...
-تو نخليه يقتلك مالا...لباس انت؟؟؟
رميت اك الحجرة وجريت نتفقد فيه...نرعش بالخوف
بلوزونتو تحلت من شيرة زندو...انا نفركس فيه وهو قام يجبد في:
-اجري...يلزمنا نبعدوا من هنا باقصى ما عنا من جهد ما كانش وفينا....
رجع لهاك الخيمة لمها وطرنا...عطينا على ساقينا حتى ولينا نلهثوا...هو يجري وانا وراه يتلفت لحظة اثنين يعيط بش نخلط عليه...جريت جريت حتى تعبت وما عادش في...قعدت في القاعة نرد في النفس و عبدو يعيط...جا يجر في وراه ويدو ما سيبتش يدي...
-يزي يزي...والله بعدنا بلقدا...
-اسكت قريب نوصلو لمحطة التران...نباتو قرابي منها حتى يطلع الصباح بش نركبو...
نتبع فيه ونكوع...ساقي عملوا نبابل ماء مالتعب والجري لين ما عادش نحس بيهم...واخيرا بانلنا ضو المحطة...جبدت نفس وبركت:
-يزي عبدو سايي بيلت والله...ارتاح ياديني ملك الموت يعطي راحة....
-اللي يعرفك انت هههههه اتخذت على راسو....مع حديدة الجويدة مش هتقدر تغمض عينيك...
-اممممم...الدك ما عطيت منو لحد....تراه خليني نشوف الضربة....
نحيت البلوزون...اللي لابسو لكل تحل بالموس وتحتو باين جرح كبيررر...حطيت على فمي وشهقت فرد ضربة:
-عبدو كتفك مشقوق....اوووه يا ناري....كيفاش توة يلزمك طبيب...
-اسكت بلا قلو طبيب...ابرة وغرز وتوفى الحكاية...
حليت عيني نغزرلو مش مصدقة...
-تحكي بجدك؟؟انت بش تغرز لروحك؟؟؟
حل عينيه في بلمعة انذار وأمر:
-انت بش تغرزلي يا جويدة...
وخرت لتالي هاربة ونغزرلو باهتة ونكذب في اللي سمعتو:
-تي تي...تي انا عمري ما خيطت سوريتي بش نخيط لحم...عيش خويا ما فيهاش لعب الامور هذي....
بصوت امر ونافذ ولهجة صارمة:
-انت بش تخيطلي ما نجموش نمشيوا لطبيب نتشدوا رانا ونلبسوا تهمة...يلزمك تعمل قلب وتخيطلي سينون الجرح يتعفن و يعملي سخانة وندوخلك حتى نموت....انت حرة القرار ليك....الابرة في الصاك والهيكل معاي تحسبا لحاجة هكا....وما تنساش البريكية بش تحمر الابرة وتعقمها....حدود الكرة عندك.
....قلبي يدق بش يخلع صدري ودموعي تتسابق لعيني بش تخرج وانا نحرك في راسي بلا....رافضة اني نعملها....
-ما عنديش قلب....والله ما انجم يا عبدو....والله نموت فيها....علاه يصير فينا هكا علاه؟؟؟؟
-مكتوب يا ظلمة....والله عقدني اسمك ماارزن ملايكتو...ايا اتكبس...
-وتفدلك....منين ليك هالقلب....
-قتلك رميتو في قلبو....وزيد معاي عتبة ما شاء الله مازال يجرى فينا يا كبدي...
-والله في بالي نفدلك ياخي طلعوا كالجنون اسم الله لعظيم...اما بيناتنا طلعت كي بطل الكرونيكات لكل.... خرجت منهم بالطبيعة بفضل مساعدتي....احم احم..
-قتلت الراجل وتقلي بفضلك....اسكت اسكت راك نحس ووحلت فيك....باقي يدكك وانا واحلة

✴✴✴✴