⛺غربة عشاق⛺

👽الحلقة 22...👽

-هههههه...شدني الضحك...باهي اسي عبدو تامر بحاجة تانية...
قرن حواجبو بعنطزة و قحرلي:
-ما تخرج الا ما تتعدى عالديوانة...وزيد ماشي معاك ما نخدم الا ما نتهنى عليك...
تربعت عالفرش طيرلي النوم من عيني نستوي في شعري ونتكلم ونعارك:
-ياخي بانا صيفة ماشي معاي؟؟اش نقلهم كي يسألوني شكونو هذا؟؟؟
والله جاوب بكل هدوء وبساطة وما رفلوش جفن:
-قلهم راجلي...انا راجلك هنا في بلاد الناس...
حليت عيني فيه فناجل مش مصدقة و نحب نستوعب اللي قالهولي ونفهمو:
-ظاهر فيك هبلت انت سايي...اوكي وقفت معاي وعاونتني اما مش لهالدرجة...
-شبي مش عاجبك؟؟كان تحب توة توة نكتب عليك.
-لا هبلت انت رسمي...قلو تكتب علي...جاية هنا بش نعرس و نكرك في روما...بالله خليني نرقد...لا نحمر ولا نغبر اتهنى...
ورجعت غميت على راسي وقلبي يعزق في صدري بش يخرج من بلاصتو مانيش مصدقة اللي هو طلب يكتب علي...نحس في النفس ضياق علي وتخنقت ووجهي احمار تحت الكوات...نفيق كان بالغطا تهز من فوقي...وعيني جات في عينو وراسو وجهامتو بكلها مقابلتني...بصوت راكز ومبحاح كلمني:
-نتكلم بجدي راني...اش قلت؟؟نعقد عليك وتولي مرتي ونحفظك مالدنيا لكل ونخبيك في شوني ونعيشوا عالحلو والمر؟؟؟
نشف ريقي وصوتي لبد في قراجمي ما حبش يخرج... تمالكت روحي و نهدي في انفاسي و توتراتي:
-عبدو بالله اخرج من مخي هالليلة...اش توتى عليك ياخي؟؟؟راني ما جيتش نلوج على راجل نعرس بيه جيت نفض في مشاكلي...
يدو على شعري وسرحت على خدي بملمس حنين خضت قلبي ودمي ومعدتي...كل شي تقلب عندي واحوال...بكشت...هاو يحكي بالرسمي...كمل يتكلم:
-نفضها معاك وناقف في ظهرك وقفة راجل نحميك كيما كنا نكملوا...حتى تتحل في وجوهنا...
-عبدو بربي يزي تو هذا كلام؟؟...ياخي بانا اوراق بش نعرسوا وهكاكا لا اهل ولا امالي؟؟؟وزيد شنوة هالسبب القوي اللي يخليك تقرر قرار كيف هكا؟؟؟هانا مع بعضنا من غير عرس نحاولوا نتغلبوا على مشاكلنا من غير رابط...فاش قام؟؟؟
-قام وقعد...عينيه في عيني...خاطر نحبك...خاطر نعشقك...خاطر ما نحملش دقة الشوكة فيك...خاطر ملي ريتك ارتبطت اقدارنا ببعضها...خاطر نحب نكون راجلك ونحميك و نستحفظ عليك...نكتبوا حتى على ورقة وزوز شهود...المفيد قدام ربي وعبادو مرتي... نوعدك لا نمسك لا نجي على حالك حتى تولي امورنا قانونية ونعقدوا رسمي سوا في تونس ولا هنا...اش قلت؟؟؟
هنا انا تجنيت وهبلت وما فهمتش اللي ورا كلامو:
-لا هبلت انت...نعرس عرفي؟؟؟...هذاكا اللي ما زال... ارقد عبدو ارقد...خلي ليلتك تفوت على خير...
-جاوبني قبل ايه ولاد...وقول ايه خيرلك...
-لا لا لا...هونهم 3لا...
-انت قد ردك؟؟؟....راك تجيني انت وتقلي عرس بي...
-اتهنى ما نجيكش...ملا هبال والله...
وخرجتلو لساني متاع برا زمر...و يا ليتني ما عملتها...
زلزلني ورهوجني...جبدني من وجهي...وغرس فمو في فمي...غدرني...و فش في غيظو وغشو من ردي عليه.. كانت بوسة عقاب ورد فعل عذاااااب...دمرني بيها و شواني وخلاني نضيع ونندم ونتراجع...كانتلي اكتساح عملي فوضى مشاعر واحاسيس كبيرة ناحيتو...ما سيبني كان ما دزيتو نلهث ونقحر...
-عندي قداش شاهيها...وقتلك سما لسانك ما عادش تخرجو...وحط في علمك ماك رفضتني اتحملني واتحمل اللي بش يجرى فيك.. الا ما نخليك تجيني وحدك وتقلي نحبك وموافقة...بوزين الحب وهو داخل بعضو ومفرفش...وغمزني وضحك ورجع لبلاصتو...
خلاني داخلة بعضي مبعثرة...ماني فاهمة شي...نحبو ايه أما علاش قتلو لا...نحبو وما نحبش نعرس بيه...
باقي نتكلم نستفز فيه ونبرد في اعصابي:
-ربي يحبس علينا العقل والدين...ملا عرس في روما...
تلفتلي ويقحر بضحكة على جنب:
-العرض مازال قايم راهو...ما تندمش...
وعض على شفتو اللوطانية يغزل في...خرجتلو لساني من غير ما نشعر رد فعل على دكو...قحرلي:
-نجيك راهو...اش نبهت عليك...
جبدت الغطا وتكلمت من تحتو:برا زمر....نسمع فيه يضحك...مالغزول تخمدت رقدت نسمع فيه يكلم في ما جاوبتوش حتى هزني النوم...
-شوشو...يا جويدة...يا ظلمة...اه لو لعبت يا زهر...هههه
وانا لا حياة لمن تنادي....فقت على صوت احمد خارج ويكلم في عبدو قلو:
-هوكا فلوس تستحقوش حاجة و الدار داركم وتستحق حاجة كلمني...
-عيشو صاحبي...ايه عندي قضية تو نجيك ونتفاهموا.
-باهي نستناك ايا باي...اسمع جيبها تاكل بيتزا...
-باهي تفاهمنا...وخرج.
قمت نتكسل وجات العين في العين:
-صباحو يا الحب...
-يزي عبدو هالصباح...حب هبط عليك مرة وحدة...
غمزني يدكك: والله نحبك نعمبو عمري...نحب في وحدة ما عندهاش مشاعر...قلتلها نعرسو قتلي مهبول..تو براس امك شكون المهبول؟؟؟
-انا...انا اللي نسمع فيك...وقمت للحمام ريقلت اموري...حضرت الفطور كلينا... وقمت نلبس ونحضر في روحي..ما نعرفش علاش أما مخي قلي اعمل عكس اللي قلك لبست خلعة ودجين وكنفارس وحضرت السورية بش نسقطها من فوق حمرت ودبغت وخرجت #منو

✴✴✴✴