⛺غربة عشاق⛺

🍯الحلقة46...🍯

...وصلت لمقر الإدارة وقفت التاكسي وهبطت...مالباب وقفوني:
-تفضل مدام اش حاشتك؟؟
لميت روحي وتقويت وتكلمت:
-انا حرم الشهيد الرائد عماد الدين سالم...
-الله يرحمو عاش راجل ومات راجل...
كينو يحب ياكدلي اللي هو مات، بلعت ريقي بالسيف فشلني من أول ضربة...
-نحب نقابل مديركم...
-بخصوص شنوة مدام؟؟مش بالساهل بش تقابل... يلزمك مطلب وتعلم الموضوع ونردو عليك بالموافقة ولا الرفض...
-نحب نعرف راجلي مات بلحق ولا؟؟
حل عينيه باهت في وجاوب بنبرة سخرية:
-مدام ظاهرلي جبنا جثمانو و اتمد قدامكم و هزيناه في دفينة تليق بيه...عيش اختي برا روح و صبر روحك نعرف الشي صعيب...
طبس راسو متأسف...حسيت روحي على ابواب هبال ومع تأكيدو باقي رافضة ولا مستوعبة....درا كيفاش جات لمخي حاجة غايبة علي وناسيتها من مخي..قتلو
-كيف مات وين فلوس عشاه؟؟...وين شهريتو اللي لازمها تجي لارملتو؟؟؟
هنا حسيتو تلكون وما لقى ما يجاوب...فيسع لقف روحو وقلي:
-مدام ما عنديش فكرة...اللي نعرفو تقعد الاجراءات اشهرة بش تتحول شهريتو ليك...على كل اللي انجم نعاونك بيه اكتب مطلب وضح طلباتك ووصلو لمكتب الضبط تو يكلموك...
دورت راجعة على جرتي والدمعة تحرق نقدم ونوخر لاهان بي نروح ونأيس ولا هان بي نقدم و نعارك...
ما نجمتش نروح هكاكا خطفت الدورة ورجعت ندز ونعيط على طول صوتي:
-نحب نقابل المدير...نحب راجلي وحق راجلي...
انا ندز وهو ما يدزوا اما كرشي كانت فارق ما نجموش يزيدوا يقدموا على تمرميدي اكثر...جلبة وحس وعياط وصل للادارة لفوق وجاء الأمر بش ندخل...لمعت عيني حققت حاجة علقل دخلوني لبيرو هاك الراجل لكبير رجال بشلاغمها تقردفلوا وانا نتنتها لبرا بش نشوفو قلي :
-تفضل بنتي...رانا مراعين ظروفك وحالتك النفسية...
-بربي خوذني على قد عقلي...راني ريتو اما توريست وبرا...بالله طفي ناري...راجلي وينو؟؟؟
-يهديك...ودار جا بجنبي يربت على كتفي...الله يرحمو راهو عز بينا لكل...لكن هذي بلادنا ويهون الغالي والنفيس في خاطرها...بوك ضرب عليه رصاص ورجالنا تكفلوا بالباقي...تعيش وترحم...
-سامحني رجالكم في معركة هكا يدخلوها بلاش انتيبال؟؟؟ باهي وزيد لو بلحق مات ويني شهريتي؟؟
-عبدو كلا ضربتين مش في صدرو...وحدة منهم قاتلة  عيش بنتي صبر روحك راجلك تحت التراب والشهرية توصلك الشهر هذا الحي إجراءاتنا طويلة...
وصلني للباب نجر في ساقي جر...خرجت هايمة مخي يعاودلي في سيناريو موتة عبدو...كيني معاه وبابا كرطش عليه...وجعني راسي وحسيت روحي مزنزنة والتصاور ما حبتش تغيب من مخي...يصورلي فيه دم سايل ملوح عالارض...روحو مفارقتو...عاودت عشت لحظات موتو كيني معاه وصورتو ملوح ودمو يجري ذبحتني كيني نار وقادة تاكل في من داخل...وصلت لاقصى نقطة ثورة مخلطة بغل و ووجيعة ودم وضعف...بركت عالارض نصيح ونضرب في وجهي الجرح تحير من جديد و الوجايع قصمتلي ظهري... جراوا اك الزوز الواقفين بباب الادارة شدوني من ايدي وانا نعافر وندز بقوة ما نعرفهاش في هوما يشدوا وانا نتسيب منهم نخبش و نعض وتضرب ...سايي احساس بالموت زارتني...عهدي بروحي نغزر وبين ايديهم ودخت...
قداش تعدى وقت ما نعرفش...المفيد نحل في جفوني ثقال في بيت سبيطار اكيد...لا كلينيك...
بيت وحدي...سيروم معلق...مديت يدي لكرشي المكعبرة صغيرونة ما لقيتهاش...جسيت جسيت شي نضرب في الصونات جاتني فرملية:
-لباس مدام...حمد الله عليك..
-اش جرالي؟؟؟بنتي...؟؟؟
وجهها صفار وقتلي لحظة تجيك الطبيبة...خرجت ورجعت مع زوز طبة...طبيب نفسي و طبيبة نسا...
فهمت منهم اللي تعرضت لجلطة بسبب طلوع الدم وبيها خسرت بنتي...سمعتهم ما رديتش الفعل وما انجمش نرد...اكثرش من هذا؟؟؟البو الراجل البيبي؟؟؟
اش عندي نعمل ولا نقول؟؟؟البكا ما يرد شي خسرتو..
السكات خياري الوحيد...والمخدر حلهم هوما...زرقولي تخدرت وقعدت هكاكا نقوم نغزر ونعاود نغفى...ليلتها الوقت مخر اكيد والحركة بايتة مرهوجة كيني شميت ريحتو مالية البيت....وكينو شدلي يدي يبكي ودموعو سايلة عليها و يقول سامحني...كينو باسني من جبيني وعدى يدو على شعري...كيني نحلم في حلمة مزيانة و راقدة و تبسيمة على فمي كيني استرديتو...فقت الصباح نسأل جانيش حد قالولي كان امك وزوز بنات اللي هوما خوات عبدو...ايست سايي مشات بنتي و
معاها خسرت آخر نقطة ضواية في أشرقت...خسرت روحي....ودفنت ضعفي ووجيعتي بعدما قعدت مدة وارتحت وخرجت....خرجت اشرقت أخرى دفنت قلبها وودعت الحزن و قادمة على حياة مليانة معارك....
استعدوا وانا معاكم...نشوفوا ظلمة الجويدة اش تعمل؟؟؟....#منو
يطلع منها اسيدك اه...كان وحدة اخرى راهي انتحرت هذي قامت تعارك...يعلم ربي اش بش تعمل وهاني معاكم لا تنسوني...

✴✴✴✴