روحت عديت مدة بدني تاعب ومريض...جاتني شهريتو كيما قال مديرو أرملة الرائد عماد الدين...
رجعت نقرا في الجامعة و سجلت في صال سبور بش انحي الزايد، مشيت لمحامي عايلة بابا و تسلمت ورثي...تقلبت عالدنيا وعالهم و عالرجال زادة...ريحة الذكر ما عادش نحبها تدور بي...في ليلة ونهار صبحت بشهرية معتبرة و بشركة و دار وكونت معبي اما امي ما تعلمش...خرجنا مالحومة مشيت كريت بحذا دار عبدو نشم في الريحة على اهلو وحومتو و جماعتو...
احلام و سلمى...ريتم خذيتو وتعودت عليه سبور قراية دار..ساعات نمشي للشركة اللي لاهي بيها عمي الصغير نطل ونتفقد نعرف فلوس تتصبلي كل شهر في الكونت وكهو...تعدات مدة طويلة نسبيا اشهرة تناسيت وما نسيتش نحاول نضيع وقتي اكثر ما يمكن في القراية وطاقتي نحطها في السبور...نروح مهدودة نسهر شوية مع نجوتة ونرقد ساعات على بلاصتي...ليلة من ليالي قمت راسي يوجع وجيعة قوية مشيت نفركس في الدوايات اللي عنا شي ما لقيت...مازال الوقت مش مخر برشا قلت نمشي لاحلام نشوف تعطينيش حاجة تهفت الوجيعة حتى لغدوة وانا نتجنب في مقابلة حماتي اللي كي تراني تدور وجهها كينها لا تعرفني...لفيت روحي بجلباب ورميت فولارة ومشيت بيناتنا نهج من شباكي نرى دارهم...شقيت الكياس ووقفت ندق...نسمع في شكون من وراه قلتلها انا...جاوبتني بربثة بهتتني...
-اشرقت توة؟؟؟شبيك؟؟؟ ...
-نفركس على دوا...حل...
بطات بش حلتلي مربوثة وداخلة بعضها..اول ما دخلت عرضتني ريحتو اللي مخزنتها وما فارقتنيش..
-نشم في ريحة عبدو....
لكلكت وقتلي:
-صلي عالنبي...الله يرحمو...
-اللهم صل عالنبي...ممكن خاطر راسي يوجع في حالة عندكش حاجة كالمونت لغدوة الحي ماك تعرف الفارماسي متاع الليل بعيدة...
-باهي استنى نجيبلك...هوني استناني...
بهت عوايدها ايج وادخل و تبدا تقرق بي...ندمت على جياني...ندور في عيني في الصالة وانا واقفة نغزر لبلوزون رجالية مرمية على الدوفون...استغربت هزتني ساقي بش نمشي نشوفها....هزيتها وريحتو سطعتني منها....ضميتها لي بالقوي فيها ريحة عبدو و احلام جاية تزرب في يدها الدوا....تعيط:
-نحي من يدك.... وفكتها....
-وه شبيك احلام؟؟؟...بلوزن عبدو؟
-شبيك ياخي....ماو قلنا الله يرحمو...اش عندك فيها متاع شكون؟؟...
استغربت عمرها ما كانت معاي هكا....البلوزون دافية متاع عبد كي غير نحاها...شكون الراجل اللي بش يجيهم؟؟؟ما يزورهم حد في العادة...وزيد الريحة....
يا ربي راني دخت...والله بش نهبل...نرتاح شوية ونعاود نخوض....شنية الهدرة هذي؟؟؟زعمة كان عبدو حي بش يخبيوا علي؟؟؟وعلاه؟؟؟ يشوفوا في محروقة عليه و ضيعت حياتي؟؟؟؟ زعمة؟؟؟؟
روحت شربت الدوا وندادي ولا جاني نوم...ندور ونلقى روحي نعس ونبتبت على دارهم....الليل فات شطرو وهوما ضوهم يشعل مش عوايدهم...قول انا مش عوايدي نسهر...طيبت قهوة خليتها تغلي ورجعت نطل....كرهبة كلها فيمي ركب فيها درا شكون وديمارت ذكرتني بالكرهبة اللي ركبت فيها مع عبدو كينها هي...حليت الباب وخرجت بش نشوف...خلات كان الدخان وراها وبابهم مسكر....ووووه علي راني على ابواب هبلة نمشي نرزرفي لروحي بلاصة في الرازي من توة خير...قعدت واقفة مشوار ودخلت نلقى القهوة فاضت وريحة القاز مالية الدار....طفيت ولميت الجوية وانا نستغفر ونعاود....ثمة سر مخبينو علي كي تطربق السما عالوطا...يلزمني نعرفو وما نبرد الا ما نفهم... طلبت احلام،:
-احلام شكون جاكم وخرج من عندكم توة؟؟؟
-يزي اشرقت ياخي تعس علينا...
-لا مش نعس...اما انت ماكش قدقد ودرا اش فمة؟
-ما فمة شي يا بنتي...جانا ضيف ومشى على روحو
-وشنوة هالضيف انصاص الليالي وانتوما عيلة نسا..
-اه ما نسمحلكش بديت تخلوض انت....صلي عالنبي يهديك رانا باقي مراعين حالتك النفسية...
-شبيني جيتك نشكي ولا مهبولة؟؟؟ايا بالسلامة.
وعلقت وانا مخي واقف...والله ثمة إن...هذي مش احلام اللي نعرفها...زعمة شنوة لحكاية كلاتني بالحس ودورتهالي؟؟؟شنوة اللي مخبينو علي وما يحبونيش نعرفو؟؟؟...ليام طويلة والزمان كفيل بش يطلع الحقايق وشي ما يدوم على حالو...وياخبر النهاردة بفلوس بكرة يبقى ببلاش....هكا نحدث في روحي و مانيش عارفة اللي الخبر بش يطلع بي انا في حد ذاتي و شخصيا....#منو
✴✴✴✴
أنت تقرأ
⛺غربة عشاق⛺
Romansaبيب بيب وسعو?😎💀👿👹رجعتلكم بكرونيك ناار 🔥🔥🔥كرونيك صاروخ 🚀♨قصة عسل🔞🔞😗😘👀 موضوع مشوق 💋👄أحداث جريئة غير متوقعة 👫💏 أفكار غير مألوفة 😥😆😉 الكاتبة متاعها تميزت بأسلوبها الفريد 😘😗 عندها قلم مبدع 😍😋ديما تبحث على المواضيع الجديدة 👍👍❌تب...
