عبدو:...مخي واقف شكونهم واش يحبوا مني...هزوني وانا نعافر ولا فهمت شي...قعد باب دار الناس مشرع وانا خرجت لا يعرف علي شي والظلمة متاعي لا تعرف عليج ولا نعرف عليها شي...نسأل ونعتمد:
-شكون انتوما اش تحبوا مني؟؟؟؟
حتى اجابة...دخلوني لكرهبة كحلة بلارها فيمي وربطولي عصابة على عيني...ثنية طويلة نسبيا... ساكتين ولا تكلم واحد فيهم بش نفهم شنوة اللي يدور في جنبي...تعدينا بسكة متاع تران نسمع في حسو ونواقيسو...و بعد قنطرة خاطر حس ماء يهرهر تحتنا...وبعد ريف حس حيوانات علالش وبقر...يعني خرجت مالمدينة لمزرعة تقريبا في بلاصة بعيدة... الكرهبة شدت فران ووقفت...حس ساقين تجري حوطتنا...هبطوني و دخلوني ما نعرفش وين... قعدوني على كرسي و ربطولي ايدي لتالي هيئة متاع استجواب...ما فهمتش شنوة اللي عملت حتى لو كان عالحرقة راني تشديت وبعثوني...شنوة هالغموض وانا وين وعلاش جايبيني؟؟؟؟الاف الأسئلة تدور في مخي نفركسلها على اجابة في إنتظار اني نشوف ونرى اللي داير بي...نحاولي العصابة رمشت عيني برشا بش نجمت نرى والعتمة اللي كنت فيها...شعل ضو جهرني قدامي تقول كتيبة عسكرية مدججة بالسلاح دايرين بي واقفين وقفة عسكر في انتظار قايدهم...أبي الحرقة يعاقبوا عليها هكا؟؟؟؟ضحكت بتمقعير...واضح وضعية كبيرة اكبر من توقعاتي...
شوية وقت ودخل زميمهم قردفولوا لكل...راجل كبير ابيض احمر شعرو مزينو الشيب وموهرو...مكستم مزين صباطو يلمع لمعان قعد قدامي وحط يدو على ركبتو جلب نظري خاتم كبير في صبعو شكل جمجمة ما نعرفش وين ريت كيفو...مازلت نخدم في مخي ونتعسر بش نتذكر وهو تكلم:
-منين جبت تليفون جاك؟؟؟
باقي ما فهمتش والامور مش واضحة بالنسبة لي... ضيقت ما بين عيني وتكمش جبيني نحاول نستوعب:
-اما تليفون واما جاك؟؟؟
حك لحيتو وتبسم بتمسخير :
-مازلنا متربيين معاك ومضيفينك...التليفون اللي كلمت منو صاحبك بش تقلو هاني وصلت وجايك..
هنا فهمت سايي...فلاش باك:
وقت رجعت للعركة والكرطوش والمجزرة اللي رجعنالها في الغابة انا وظلمتي ومشيت نفركس وهي وخرت ترد...الراس الكبير اللي مات لصفر كيما قالت جويدة لقيت تليفونو مطيش بجنبو هزيتو مع جملة حاجات قلت تنفعني...وهو اللي طلبت منو أحمد بش نقلو قريب نوصل وهو بهت وقلي فيسع خذيت نومرو طلياني....توة فهمت واستوعبت....عيني تحلوا على وسعهم...يعني انا بين ايدين المافيا و دخلت على خط تصفية الحسابات...قلبي تهز وتنفض...يا بوقلب جيت بش نحسن وضعي ظاهر في بش نروح في صندوق عالسريع...بلعت ريقي بغصة...وهو باقي يراقب في حالتي وقلي:
-تذكرت توة؟؟؟ايا هات اش عندك....
-لحكاية وما فيها...انا حارق من تونس...اول ثنيتي غابة عرضتني فيها عركة وبنية تقتلت و مجرمة ماتوا ومجموعة كملت قضات شورها ومشات...انا في حاجة التليفون لقيتو هزيتو ما عندي حتى علاقة...
-البنية اللي تقتلت بنتي و التليفون اللي هزيتو متاع ذراعي اليمين...واحنا متابعينو....أيا هات اش عندك بالتفصيل الممل خير لك...
-شوف نقلك انا ما نتهددش وما فماش علاش اصلا... اللي ريتو قلتو...
شاورلهم براسو بمعنى افرحولي بيه...لحظات وكان المسدس على جبيني و خدم الزناد...
-اللي قلتو هو اللي ريتو...ودليلي في جيبي...انا صورت لحظة الجريمة من بعيد تنجم تتأكد بروحك.
-فركسوه وطلعوا التليفون...
اللي بجنبي مد ايدو طلع الزوز تليفونات اللي لقيتو وتليفوني...وقت دورت اشرقت بش ما تراش خرجت تليفوني وصورت فيديو للي ريتو احساسي قلي تلقاه اكيد...
مدهملو..حل تليفوني ورمالو تليفونهم...دخل للقالوري وفيديو وحل اخر واحد...تفرج وعينيه دمعت اكيد لحظة راى بنتو تموت....نزل عليه بالقوي وسكرو ورماهولو...سكت مدة يكالمي في روحو:
-ماكش وحدك فمة شكون معاك وحاضر عالجريمة شكون؟ محملو انت وشطر وجهو ظاهر...شكون؟؟؟
ايوااش...وصلنا لمربط الفرس اشرقت بش نقول عليها مستحيل نموت ما تتمسش زميت فمي بهدوء تكلمت:
-وحدي ما معاي حد...
تلفتلهم بأمارة ريقلوه...تبسمت بهزء...ما يعرفش معنى الرجلة...
-كي تعمل الحكمة...وحدي...
-تو نشوفو...
وخرج وخلاني بين ايدين جزارة...واتحلت ابواب حرب في وجهي...انا الخاسر في النازلة...نموت وحدي ولا يمس واحد منهم شعرة منها...ما كنتش نتصور جرد تليفون يوصلني لهكا...بهامة مني و نخلصها وحدي...هي لا لا لا...نحاولي الرباط بش يبدلوا البلاصة وما صدقت تحليت ودارت بيني وبينهم حرب ذكرتني بارك الحوم جماعات جماعات لكن هما برشا وتكتلوا علي وانا وحدي...لول اللي ضربتو فكيت سلاحو وانا لاول مرة نشد سلاح ونضرب عشوائيا...حليت ابواب جهنم على روحي...ودخلت ابواب المافيا من اصولها... تورطت و دمي مهدور لا محالة...نموت ولا يوصلوا ليها...تذكرتها احلى حاجة صارتلي وابن مرا هدت أسواري...يا رب تعيش و توصل لهدفها....وسكرت باب الذكرى على احلى صورة صورتها...وانا في مواجهة الموت...#منو
✴✴✴✴
أنت تقرأ
⛺غربة عشاق⛺
Romanceبيب بيب وسعو?😎💀👿👹رجعتلكم بكرونيك ناار 🔥🔥🔥كرونيك صاروخ 🚀♨قصة عسل🔞🔞😗😘👀 موضوع مشوق 💋👄أحداث جريئة غير متوقعة 👫💏 أفكار غير مألوفة 😥😆😉 الكاتبة متاعها تميزت بأسلوبها الفريد 😘😗 عندها قلم مبدع 😍😋ديما تبحث على المواضيع الجديدة 👍👍❌تب...
