⛺غربة عشاق⛺

💙الحلقة 26...💙

...ما نعرفش قداش تعدى وقت وانا ملوحة دايخة ولا اش جرالي ولا كيفاش ولا علاش...حليت عيني نلقى روحي في بيت كينها بيت في كلينيك مجهزة بماتريال طبي انواع واشكال...انا ممدودة على سرير ابيض ولحافاتو بيض والبيت دافية دفا ما تستحقش معاه غطا...تقعدت نثبت انا وين وكيفاش جيت وشكون جابني؟؟؟..راسي دار ووجعني رجعت اتكيت في انتظار نشوف شكون فاعل الخير اللي لقاني وهزني للطبيب يكثر خيرو...حس الماكينات والهدوء مسيطر عالوضع خرجني من الحالة اللي انا فيها... زعمة شكون جابني وكيفاش لقاني؟؟؟ نعصر في مخي وشادة جبيني بيدي نعدي فيها عليه ونعاود ثماش ما نتذكر حاجة ولا نلقى انديس...وفعل التذكر يهزني لعبدو البي خليتو وراي وندمت و يهزني للبو اللي ما عرفنيش ولا تحركتلو شعرة كيف شافني... لامي اللي خليتها وراهو وصلها جواب اللي انا حرقت.. توة محتاجة ليها برشا...محتاجة لحضنها يدفيني نشكيلها من راجلها ولا طليقها...كانت ديما تقلي اللي خلاك خليه وانا بفورة دم الشباب والاندفاع نهارك ونقلها لا يا ليتني سمعت كلامها ولا جيتو ولا تحقرت ولا تقهرت يا ليت اللي جرى ما كان...لكن في وسط هذا لكل صورة عبدو تبرز وتلمع كاحسن حدث معرفتي بيه واحلى راجل عرفتو في دنيتي...تبسمت للذكرى ودموعي لمعوا بش يخونوني ويخرجوا وقت تحل الباب ودخل طبيب تبسملي وقلي:
-حمد الله على سلامتك...
-يسلمك دكتور...اش جرالي؟؟
-لباس ما تخافش...ارتاح ويلزمك برشا راحة تعرضت لصدمة عصبية حادة...لباس تاخذ الدوا وترتاح ما يلزمكش تتحرك ولا تتوتر...مالبارح وانت دايخة...
حليت عيني مالفجعة...
-وه من امس وانا راقدة هوني؟؟؟
-ما تتفجعش مدموازيل اش قلنا راحة نفسية اهم من كل شي...ارتاح يعيشك...
-شكون جابني بربي خلي نشكرو...
-تو يجيك شوية اخرى...ارتاح وكول وبعد تو يجيك.
وخرج...وووه علي عبدو من امس ما رجعتلوش ولا قتلو حتى ولو خرجت بغش وقررت نفارقو اما راهو في حالة خاصة انا حارقة لا اوراق لا شي...الصبر للعالي...اتكيت سارحة بخيالي من جديد وجات الماكلة جابتلي ممرضة طبق مدتو بتبسيمة ومشات...ما عينيش أما كليت شوية...وحطيتو على جنب وتقعدت نثبت في السيروم قريبش يكمل خلي نمشي على روحي والباب تحل وعيني جات في عينو...عين خضرا بنتها عيني عليها مرايات نظر وشعر اكحل توتة ما شابش و كوستيم وريحة تعطرق....ايه هو عرفتوه؟؟؟
السيد الوالد...للحظات تعلقت عيني بعينيه و دمعي نفر ما نجمتش نشدو ولا نكبحو او نسيطر عليه والكلام والعرك اللي محضرتو لي سنين وسنين تبخر... نبكي وساكتة وما نجمتش حتى نغورلو.... تكلم اخيرا وسمعت صوتو...صوت ليه رنة خاصة ولكنة مخلطة ووقع كبييييير على قلبي:
-اش جابك يا اشرقت؟؟؟؟علاه جيت وخليت امك؟؟؟ علاه قمرت بحياتك وجاية حارقة؟؟؟
غزرتلو بلوم وغش كبير ولساني تطلق بشهقة:
-جيت نلوج على راجل خلاني في كرش امي وما يعرفنيش...راجل لا سأل علي ولا فركس علي ولا همو في...جيت نلوم وجيت نعارك وجيت ناخذ حقي...
تبسم تبسيمة ما فهمتهاش أما ما ابنها:
-والله وطلع عندك لسين وتعارك وتحب على حقك... اناهو الحق اللي تفركس عليه....
كان ينتظر اجابة مادية أما مانيش خصيصة ليه صدمتو وقت قتلو:
-حقي فيك...حقي في السنين اللي عشتهم بلا بو....السنين اللي عديتهم نعارك ونقص كل لسان يتكلم علي بسوء ويقول بنت حرام وغلطة....وخنقتني العبرة وغصة وحلت في قراجمي....حقي في اني نراك وما تضمنيش وما تقولش بنتي....عمري اللي تعدى وانا لا حن ولا كلمة بابا....انت وينك وقت البرد كلانا والجوع عمانا والحاجة قتلتنا و العرا فضحنا؟؟؟؟....عايش في العز حتى الذكرى ما تذكرتنيش....
-قلبك معبي ونعرف....اما انا ممنوع مالرجوع لتونس وظروف كبيرة ما انجمش نحكيها خلاتني نبعد ولا نسأل...والحقيقة جيانك يزيد يصعبها...ارتاح وبعد أو نتصرف يلزمك تروح وتو نتفاهموا وما نبعدوش على بعضنا....
صدمة عمري...راجل يحكي كينو على بيعة وشرية...
-مرواح ومانيش مروحة الا ما تعلن للناس الكل اني بنتك و نورق وناخذ حقي في كل ما تملك وقتها نروح...
قحرلي وضيق ما بين عينيه...
-حقك محفوظ في تونس هنا ما عندك شي وما تنجم تعمل شي...
-لا انجم ما دامني بنتك...اللي خبيتو انت سنين نفضحو انا في لحظات...انا ضايعة ضايعة نعلن اللي الراجل الغني اللي لباس عليه انا بنتو ولا هامو في ولا مستعرف بي...قنوات وصحافة واعلام لكل نخليها وخلي يشدوني في الحبس بش تتفضح على قاعدة... خسرت الياسر مش الشوية استوات توة عندي وكيما يقولوا العيار اللي ما يصيبش يدوش...
-انا راني ما نتهددش وحد ما يلوي ذراعي وأنت ما تعرفش انا شكون واش نجم نعمل...
-نعرف اللي ما تنجمش تضرني وان ما تنفعنيش... اش قلت اعم لطفي....
وجعني قلبي كي قلتها...ما صاب راهو جرى وعنقني وقلي بنتي...ما صاب طبطب على ظهري ومسحلي دمعتي ما اكسح قلبو ولا كيني نطفة منو...#منو

✴✴✴✴