⛺غربة عشاق⛺

🔰الحلقة 31...🔰

...ما لقيتش ما نقول ولا نرد الفعل...اكيد بدني فاضحني وكاشفني...ريقي نشف و ما لقيتش ما نعدي وهو واقف قدامي وايديه محوطيني منا ومنا... دغدغتني انفاسو و خضت بلهاثو و ضعت بغزرة عينيه اللي اسرتني...ولقيت روحي نقرب منو و نلف في ايدي على رقبتو و نعنقو ونلزو لي بقدر الحب اللي يعتصر في قلبي من داخل:
-توحشتك حتى انا...وخفت عليك المدة هذي لكل...
يدو تبعد في شعري ويهمسلي:
-ما تخافش علي...برك ردلي بالك على روحك...انا وراك ديما...ايا اعطيني مصروفي قبل ما نمشي...
-ديما بدكك وبلادتك....
-ملي بعدت علي فقدتك ونسيت الدك...نسيت اني حي...بلا بيك شي ما يسوى....
الباب دق وخالتي علية توشوش :
-هيا وقيت بش تخرج...
مازلت ما فهمتش...وعبدو غدرني ببوسة طويلة وصلت لأعماق قلبي في لذة تبرد عالقلب ...لقاء بين شفايفنا لاول مرة من غير دفاع ولا تملص...الحب يتكلم وحدو...ما بعد كان وانا نلهث بش نرد النفس...
حط جبينو على جبيني وعينيه مغمضة:
-نستناك يا الحب غدوة....ما توخرش علي...
وبعدني عالباب وخرج وخلاني هايمة ضايعة في دنيا اخرى....ما نعرفش بانا طاقة وانا قدرة بدلت حوايجي ومسحت مكياجي و تلوحت على فرشي نسترجع في ذاكرتي وصوابعي تمشي وتجي على شفايفي مش مصدقة اللي صار لكل...ضعت في تفكيري وفي احلامي حتى هزني النوم....
قمت الصباح نتكسل كيني بايتة عروسة والفرحة معمرة قلبي ودياري...فرحة نخاف كيف نعيشها واحساسي بأني ممكن نفقدها في اي وقت يداهمني نطردو ونرجع لاحلامي...دخلت خالتي علية علي، جيت بش نسألها كيفاش دخلت عبدو وعلاش وهي فاهمتني شاورتلي بصبعها وقتلي:
-بنيتي من غير ما تسألني ما عنديش جواب لاسئلتك توة...قوم حضر روحك وافطر النهار تناصف...
وخرجت وخلاتني باهتة والف سؤال وسؤال يدوروا في مخي...دوشت براحتي و لبست حوايج مستورة ماني نعرف الجرومة اللي عندي يعمل بعمايلو كان يرى لحمي عريان...لبست بيل ازرق ودجين وسبادري وجيلي طويلة شوية ولميت شعري لفوق وحطيت كسكات هزيت صاكي وهبطت فطرت وخرجت الوجهة رستوران اللي يخدم فيه احمد...الحراسة وراي وانا مخي يبيع ويشري كيفاش بش نهرب منهم وهوما زوز زنوس اللطف تقول غولة...هبطت مالكرهبة للرستو وهوما وراي وقفوا عند الباب...احمد غزرلي وتبسم وشاورلي قعدت على الطاولة شوية وجابلي بيتزا ومعاها ورقة الفلوس ما نجمتش ناكل مسقمة وهو شاورلي للورقة متاع الفلوس...ما فهمتوش وهو شاد صحيح هزيتها ومنها قلبتها نلقى مكتوب:
هز ساش التوالات تلقى ساشي البس اللي فيه واخرج امشي لاخر الشارع ما تدورش لا يمين لا يسار تلقى تاكسي تستنى فيك تو تهزك  للدار...
ووه حسيته روحي تقول في افلام بوليسية...دزيت الكرسي وقمت وهو ما تلفتولي...طفيتهم ودخلت التوالات...سكرت على روحي وهزيت غطا الساش... نلقى ساشي فيه جلباب وخمار ونقاب لبست وخرجت حتى صاكي علقتو تحت الجلباب لا يعرفوني بيه... نمشي وساقي مخبلة خوف لا يفيقوا بي ونتشد بالكمشة...قعدت نمشي لا تلفت لا هكا لا هكا حتى لقيت التاكسي واقفة شاورلي بش نطلع ركبت وتنفست وانا قلبي يخض خضان من داخل...نثبت في الانهجة بش نطلع البلاصة مرة اخرى...وقفنا قدام باب البابلي طلعت ديراكت للدار في الطاق الرابع...مازلت بش ندق والباب تحل ويجبدني نجي في حملة عبدو.. دز الباب بساقو وانا في حملتو ما سيبنيش..في وذني:
-اهلا بمريتي...واخيرا شرفت وصبري قريب يوفى...
ايج نقعدوا...
الوسطية مزينة تهبل وعلى الطاولة خبزة قاطو طاقين عليها عريس وعروسة وطبق حلو و قازوز...ضحكت انا وقتلو:
-عرس شكون تحضرولو؟يطلعش احمد شيعرس؟؟؟
يهزلي في النقاب ويوخر في الحجاب لتالي ويقلي:
-لا حبي عرسي انا وياك...
تكبست وتسنترت في قعدتي:
-يزي عبدو...مش وقت فدلكة سألتني قبل وقتلك لا
-الوضع مش نفسو و يلزمك توافق ما عندكش خيار...
يلزمك تكون على ذمتي بش نمنعك من برشا حاجات واهمها اي راجل منهم يحاول يدور بيك...الروبة في البيت لداخل...والحجامة عدها جاتك...البس وقد روحك مادام العدل جا والشهود...وازرب روحك الوقت مش في صالحنا...
-عبدو فهمني...علاش هذا لكل واش فمة؟؟؟وانت منين ليك وكيفاش؟؟؟تطلعش وليت غبار بالله طمني.
-يا بنتي ما تسأليني والله ما عاد وقت نكملوا الاجراءات ونحكوا...
-يا ولدي ما نعرسش لا اهل لا امالي شبيك ياخي؟؟؟
مانيش هاربة عليك وما فماش علاش هالزربة...
-ظلمة ما تنرفزنيش...ما انجمش نقمر بيك في وسطهم افهم راك في خطر...وبشكون حاشتك انت؟؟ تحب امك تحضر لحظة....وجبد تليفونو كمبوزا الرقم وانا نغزرلو باهتة .. هزت ناجية الصوت بالقوي:
-الو...عالسلامة وليدي...
تبسم ورد:عالسلامة خالتي ناجية...هاي معاك...كلمها...
-الو امي قص-اسمعيني يا بنت الحلوف مشيتلهم بساقيك...اما ربي ودعاي ما يمشوش خسارة....اسمعي كلام عبدو واللي يقلك اعملو حتى تروحي بخير وبعد ثمة مفاهمة معاك...عبدو هنيني عليها ماني ميمتك#

✴✴✴✴