⛺غربة عشاق⛺

🔔الحلقة 3...🔔

...النفس تسحب منا...بكشنا الكل...البنات تطرشقنا بالبكا...راجل مات قدامنا في عرض البحر....عبدو اللي كان خانق الحراق على كلامو سيبو...جو متوتر....اللي ما بكاش عينيه زغللوا بالدمعة....حسينا وجيعة كبيرة....قلوبنا تشقت...تكلم الحراق الله لا تربحو:
-الله يرحمو...سالم وعلي هزوه بش نرموه في البحر...
خلي المركب يخف....
شهقت فرد شهقة....عيني خرجوا من بلايصهم:
-يا شومي...ترميه للحوت ينهشلو لحمو؟؟؟
قحرلي يسكت في:
-لا تو نوصل بيه للطليان ندفنو غادي ولا نتشد بيه...
بلعت السكينة بدمها....البنات بداو يصيحوا وهو عيط عليهم:
-ما نسمع حس حتى وحدة...مات الله يرحمو...لا نجم نوصلو ولا نردو لتونس...هنا يترمى هذا ما كاتبلو...يلا ارموه....
رجال باكشة مكتفة ايديها...جروه وهزوه منا ومنا....و رموه...الما طشنا...لكلها تبكي...بسكات...بغصة....دموع سايلة....ذنبو في كرايمنا....يتلوح في قلبو لا غسيل ولا كفن ولا عزا....شوية والديه عليه....
حسيت روحي بش نهبل....اول مرة نعيش لحظة الموت...ما تربطني بيه حتى صيلة....لكن قلبي رعش ووجعني عليه....شدتني حالة هستيريا....ما نعرش على روحي كيفاش تنطرت نبكي ونرعش  للحراق....نشرع ايدي ونصرفقو بكف بالغدرة....نصيح:
-لعنة الله عليك....لاك عبد ولا تجي راجل....مات وما كرمتوش....الله لا تربحك...فلوسو نار  في كرشك...ربي يخلص...حسيبك ربي....
هز ايدو بش يردلي الكف....ويعيط:
-سكت فمك ولا والله تو نرميك وراه ونخلطك عليه....وشدوني رجالو....لحظةشدلو عبدو ايدو و كبس عليه وكان فاصل بيني وبينو...
-سيبها...الراجل وسكتنالك....اماهي لا....ريض خلي نوصلو رايضين....
قحرلي وجاوبو:
-معلم خذيت بخاطرك....رصها بجنبك خلي نكملو اللي كتب....
كركرني وراه وانا نتملص...ويتكلم راص على سنيه:
-فمك ما عادش تحليه لترصيلك في كرش حوتة...يا معلم مسترجلة...اسكتي خلي نوصلوا بخير....
جيت بش نرد....حط ايدو على فمي وكبس علي...سكتني من غير ما يلذلي....وقعدنا شادلي جنبي ما سيبنيش....غزلني..أما ما عندي ما نعمل....
نغزرلها كيفاش تتكرم على الراجل وعطاتو كف لا يقرا ولا يكتب...شخت عليها اصل....مرا بعشرين راجل....وجعني مأمون....لكل وجعنا....اما الحالة اللي نحنا فيها ما عناش حتى خيار....الله يرحمو....عرفتها خلات على راسها....لكلنا تحت رحمتو....من غير تخمام لقيت روحي نهدي فيه ونكركر فيها....احتمال انو يردلها الصرفاق برمية في قلبو واردة....نجر فيها وراي وهي ولا حبت تسكت....رصيتها وسكتها بالسيف....ومر الوقت ثقيل....حتى الليل ليل...واحنا فوتنا شطر الثنية....نصبروا في ارواحنا حتى نكملوا اللي ما زال...انفاس متوترة....اعصاب متشنجة...ضغط كبير....قلوب مغلغلة....كينو الطقس حس بينا....بدت المطر تنكت....اللي هذا لف على روحو وغطى راسو...زادت قوات المطرة....تنفخنا...اللي يفرك في ايديه واللي ينفخ يدفي في روحو....هي لبدت وبات حسها...حاسها ترعش بجنبي....سخفتني....مديت ايدي ولفيتها على اكتافها نلز فيها لي بش تدفى....قحرتلي....شفرتها مبلولة وشفايفها ترقل....غزرتها معبية لوم وغش ونطرة...بردتلي قوايمي...ندمت وهبطت يدي فيسع...
المطر ولات تجبد بالقوي...والظلام داير بينا...ما تنفسنا كان وقت تكلم الحراق:
-رانا دخلنا المياه الاقليمية الطليانية...ندخل شوية اخرى وتترموا في البحر ندور ونرجع....
استعدينا...الفلوكة مازالت شاقة البحر....وحس بابور وضو تشبر فينا...وصوت بالبوق:
-وقف وسلم روحك....
والحراق يعيط:-لوحوا ارواحكم في الما....فيسع....
معاكم ربي....
طف...تنطرنا لكل...جاب ربي حاضرين....كل واحد شق ثنية....صوت البابور يقرب....و الفلوكة رجعت بش تخرج من ماهم قبل لتتشد....واحنا 19 راجل ومرا في قلب البحر....ذراعك يا علاف....شوف نوصلوا شوف نتشدوا ولا نموتوا...

✴✴✴✴