⛺غربة عشاق⛺

🎒الحلقة 14...🎒

...جبد نفس اليسير من سيقاروه كينو يطفي بيه في نار قايدة ويستمد في قوتو منو...نفخ دخانو وكمل:
-كانت ضربة كسرتني أما قواتني...لكن لو وقفت غادي عادي اكيد...اما الضربة اللي بعدها قصمتلي ظهري... بابا مرض بالخايب ودخلنا متاهة السبيطارات والدوايات وانا راجل الدار وقفت عاجز وما نجمتش نوفر فلوس الدوا...اللي عنا لكلو تباع...تميزرنا و انا بقهرتي وغصتي في قلبي...الوالد كينو حس وما حبش يطول فيسع ماهز ربي امانتو...(ضرب بايدي عالقاعة...)البلاد اللي تتذل فيها الرجال الرجال اللي تعيش بشرفها لا تسرق لا تنهب...البلاد اللي الجاهل فيها يسوى بفلوسو والمتثقف حتى قيمة وقدر...البلاد اللي تجوع فيها اولادها وترميهم... خليتها بش نصنع من الضعف قوة ونقيم بهاك العائلة اللي خليتها وراي..
تساوت الموت مع العيشة اللي بلاش قيمة واللي تفتقر فيها لابسط ضروريات الحياة...هذي حكايتي وحكاية الاف غيري ومش غريب على راجل انو يحرق بسبب الظروف أما انت ما نعرفش علاش مازلت مش مقتنع بحكاية خروجك بش تعوض امك...احكي هاني نسمع..
تنهدت من عروش قلبي....
-اش بش نحكيلك واش بش نخلي...طفلة وحيدة لا خو لا اخت...امي منظفة غرف في اوتال...بابا حسب ما قالت من مواطنينا بالخارج...سكن في الاوتال جية من جياتو تعرف عليها وعجبتو وعجبها كتبوا الصداق و كنت انا النتيجة...قعد معاها مدة وحبلت هي بي وعلى فكرة هو اللي حب اسم أشرقت لو بنية..رجع لايطاليا على اساس يريقل الاوراق ويرجع يهزها...اما ذهب ولم يعد...ومن هنا بدات رحلة معاناتي...ندور ونسأل على هالشخص اللي ما عندي منو كان الاسم وتصويرة هو وامي...كنت شاكة انو مات ولا تقتل..ما راعني الا انو عايش ومعرس وباولادو في ايطاليا... عايلتو لكل لباس عليهم واخواتو واولادهم...وانا ما يعرفونيش ولا حبوا يستعرفوا بي نتيجة غلطة...ديجا طلق امي غيابي وهي ما تعلمش...الحل الوحيد اني نلقاه بروحي...انا اللي مشيت في العفس...امي ما عادش تنجم الخدم والتطبيس تخدم في الدار حلو وتبيع وتصرف علي على اساس نقرا وننجح كهو..قتلي انساه كيما نسانا حط في قلبك واقرا على روحك...اما انا حاطة في قلبي نطلعو نطلعو و نقلو الكلام اللي واجعني ومعمر قلبي ونرتاح...هذي حكايتي..
-ايه أما انت كنت تنجم تمشي لاك البرامج يلوجولك عليه..مش ترمي في روحك في البحر شوف تخلط شوف لا وتحرق اميمتك بش تقلو كلمتين هذا كان لقيتو صار...
-نلقاه باذن الله...انا مع احترامي لاختيارات الناس نؤمن اللي البيوت اسرار وربي ما قالش بالفضح وكشف دواخل العايلات...نحل مشاكلي بروحي...
-عيشو على اظلمت...والله اسمك يفدد ...نقلك اشوشو..خدك نبوسو هههههه....
-اخييي ملا شوشو اسكت اسكت...عاد جويدة خير..
حس لبرا وعرك تسمعوا فيه...نبهني عبدو بصبعو اسكت معناها...وخرجنا بالسياسة من الخيمة...
-يا جماعة يزي تو الشمة معانا هيا نهبطوا تحت القنطرة و نركحوا جونا بعيد عالحاكم...
سمعنا اك الكلمات...جرى عبدو للصيكان والتورش طفاها وهربنا نتجاراو من غير ما يحسوا بينا...خلينا الدفا في الخيمة وخرجنا للسقنطري و الشجر بش نعديوها ليلة اخرى في العرا...بعدنا عليهم ودخلنا في وسط الشجر...قعدنا تحت وحدة نلهثوا...
-عبدو قلبي بش يطلع...بش نقعدوا هكا ديما هاربين ومتخبيين؟؟؟
-ما عنا حتى خيار...هذيكا النتائج لكل حرقة...
-اي او نموت بسكتة ولا فجعة هكا...
-اتهنى عمر..... طويل...هههههههههههه
ضربتو على كتفو :
-بالله بالله كلاب احنا توة؟؟؟
-والله وضع الكلاب عندهم خير منا ماكلين شاربين دافيين...وانا وياك كالكلاب السايبة هههههههه
سكت شوية عندو الحق في كلامو والله ..قتلو:
-عبدو قرسانة دفيني....
-هههههه وانا شكون يدفيني....اقرب اقرب....
لف ايديه على اكتافي وجبدني ليه ...في قوة زنودو و ايديه دفا غير عادي...قربني منو ندفي في اطرافي بيه...
-عبدو شبيك منفوخ هكا؟؟ياخي نافخ ولا شافط؟؟؟
-هههههههههههه هذي قالتلهم اسكتوا...زارع سيليكون... استهدى بالله يا بنتي بلا قلو نافخ..سبور وبرا كنت نبرد فيه في قلبي...نترانى وكهو....
-يحب يقول الكعابر المصمصمين اللي عند اكتافي حقانيين؟؟..في بالي في الكرونيكات كهو....
-اووو على بابا وعلى قصص اشرقت اللي لحستلها مخها...بالله اسكت خلي نغمضوا شوية لطلوع النهار...
سكتت شوية ومنها قتلو:
-تو عبدو كان يهدوا علينا ويدوروا بيك بش يفكوني مالا تقد روحك؟؟؟
-اشرقت سد فمك...
شوية وحس ساقين جاية تخشخش عالاوراق...تقعدنا فيسع...وقدامنا 3فصايل يقحروا...وعبدو يتمتم:
-يعطك عزا هاك عتبة....
والعينين طالعة هابطة علينا وواحد مالثلاثي قلو:
-اعطينا صاحبتك وبرا على روحك....
ليلة غبرا على عبدو واشرقت...

✴✴✴✴