دزني وندزك والسلاح بيناتنا ومعروف الحديد يزيد...
نتفارعوا هو يحب يفك الفرد وانا نجبد بش نتيري ومش عارفة على شكون عليه ولا علي، وفي تمبكها تخرج تزغرط وما نعرفش شكون نزل عالزناد انا ولا هو ولا شكون تضرب انا ولا هو...نثبت نحب نتأكد وهو كيف كيف...عينينا محلولة على اخرها مالفجعة والخوف لنفقدو ولا يفقدني ...الزوز في نفس الاتجاه ونفس الخوف...نتكلم مفجوعة وقلبي يدق بش يخلع صدري ويخرج بالخوف:
-عماد...لباس؟؟مش فيك؟ اه بجاه ربي اتكلم...ما فيكش دم؟؟لا لا مش فيك...تي اتكلم...
عيني تاكل فيه ماكلة ويدي تجس فيه في كل بلاصة ونرج فيه بش يتكلم والسلاح ملوح وهو رامي القاتلة لا كلام لا سلام...نخض فيه بش يتكلم وهو طايح ممدود وانا مطبسة عليه نرج ونفركس في بدنو وهو نفس طالع هابط ولابد...
-تي اتكلم...يا راجل....شبيك بكشت؟؟؟
عيني تعباوا بالدموع و الفجعة قتلتني...هزيتلو راسو لحضني نفركس تطلعش الضربة غادي...وانا نغنغ ودموعي ضببت عيني:
-عبدو ولا عمدة ولا اللي هو...بالله تكلم والله لا نقصد راني...بجاه ربي انطق وقلي انت لباس...بالله لا تخليني كيفما خليتني قبل وخلاتني بنتنا...-نعنق فيه ونعاود ونغرد على ايامي و عليه وهو ثرنتو لابد ومستحلي ولد...-مش قلت ماكش مخليني وبعد وما تبعدش علي؟؟؟...عبدو كلمني...
بدا ينين و يخرج في الصوت بالسيف وانا عميت وصميت:
-جويدة...نحبك...قبل لنموت قلي كليمة تبرد قلبي...
زدت في النويح من مخي التاعب ودموعي سبالة:
-بالله لا تخليني ماني مريتك...عبدو والله نحبك ونكذب كان نقول نسيتك ولا كرهتك...صحيح عذبتني وتعبت من جرتك برشا...اما الفايدة كي انت رجعتلي تقوم تمشي وتخليني؟؟؟؟
زاد ضمني ليه وحوطني بايديه وبدنو يرعش بالضحك
-هههههههه جويدة حصلتك...لا دم ولا تضربت...واخيرا نطقت...كان نعرف بش نجيبك راني مثلت عندي برشا عليك...يخليلي حبك...
حاصرني بين ايديه وانا مازلت انغنغ نكمل في طرف الدمع اللي ما زالوا...ونضرب على صدرو:
-ما امسطك والله فجعتني...مالا الكرطوشة كيفاش؟؟
-هههههههه تو نشوفها وين جات...هات السلاح وقوم(ايا هاني طمنتكم...فجعة بلا وجعة...يزيهم خلي يرجعوا لبعضهم فديت منهم...واستناوني في حكاية روووعة)...
بعد تعب وفراق ووجايع...تلمينا بالاحضان...بوس وتعنيق متاع وحش ولوم....دخلنا للبيت وهو محملني كينا ما صدقنا تصالحنا...اتكى وحطني عندو فرغنا قلوبنا...بين تنهيد و دمعة تلمع وفرحة منورة وجوهنا وتبسيمة فرحة مرسومة رقدنا متهنيين...كانت نومة فرحة وتراضي بعد فرقة وبعاد...قمت كيني في حلمة نحب نتأكد اللي بالرسمي هو بجنبي...اطمنت عليه راقد بحذاي وجهو منور دافي...هبطت مالفرش ماشية للحمام ياخي ساقي مست الماء...ما صدقتش الشلاكة منفخة...ترعبت رعبة هي بيدها...نحرك في عماد:.
-عماد قوم...ماء...ماء يجري في الباطو...
تنطر من بلاصتو يثبت شعل الضو يلقى الماء يجري تحتنا...خرج يثبت وانا وراه السطح مازال ما وصلوش خاطر البيت لوطة هي والكوجينة في السطح...
-ظاهرلي الكرطوشة صابت بلاصة مالباطو و هذا ماء البحر بش يغرقها...ارتحت جويدة ؟
-وانا وين نعرف ومنين في بالي ؟؟يزي بلا فدلكة ماسطة...
-يا شومي كي رجعنا لبعضنا بش نموتوا في غرق البحر؟؟!!!
-ماهو من زهري المنحوس....وانا من نهارت اللي ريتك وانا من مصيبة لمصيبة....
-عبدو تحكي بجدك؟؟؟
-مانيش عبدو يهديك لتوة مصدقة؟؟؟عماااااد.
-عماد ولا اللي هو...كيفاش في هالحكاية مش وقت مناقرة...
-ماهو مخك المسكر خليت ماء الدوشات محلول هانا عمنا في الماء....
نتلفت نفركس حاجة نسخطو بيها على ما طلعهالي وانا من فجعة لفجعة معاه...جاني يجري عنقني يضحك وانا نتكرم بالغزول...
-وعالبوهالي ياما عالبوهالي.... ههههههههههههههه
تمشيش تعاودلي ضربة كيما المرة لاخرى...لحقيقة نحب نطمن على مستقبلي قضيت عليه ولا مازال يخدم على روحو ومريقل؟؟؟
وباقي يدكك...ضربتو ببونيتي على كتفو وهو باقي حاصرني ويمرغ في وجهو في رقبتي...
-اركح عاد ...ما نفدلكوش ياخي؟؟؟اما بالرسمي نحب نطمن على روحي...ما لقيت وين تضرب كان غادي؟؟؟
-اشتهيت نعملك عاهة مستديمة...
-تطلع انت خاسرة في النازلة....
-غزرة منك وضمة تكفيني....
-والصغار كيفاش بش نجيبوهم؟؟؟يلزمنا نعوضوا ما فاتنا....أما انا طلعت هداف بريمو...من ليلة جبتها قد قد...
-يزي ما تفكرنيش...
-بربي لا تبكي...حاشتي بيك هكاكا اقعد هكاكا تتبسم الدموع لا لا لا.....
طرشقنا بالضحك الزوز وغطسنا في حبك درباني... وحش شهور و عذاب فراق فديناه في ليلتها....#منو
✴✴✴✴
أنت تقرأ
⛺غربة عشاق⛺
Romanceبيب بيب وسعو?😎💀👿👹رجعتلكم بكرونيك ناار 🔥🔥🔥كرونيك صاروخ 🚀♨قصة عسل🔞🔞😗😘👀 موضوع مشوق 💋👄أحداث جريئة غير متوقعة 👫💏 أفكار غير مألوفة 😥😆😉 الكاتبة متاعها تميزت بأسلوبها الفريد 😘😗 عندها قلم مبدع 😍😋ديما تبحث على المواضيع الجديدة 👍👍❌تب...
