⛺غربة عشاق⛺

📯الحلقة56...📯

...بعد منامة وراحة نفسية حسيت اني خفيفة ريشة ناعمة دافية ضرب في مخي فلاش رميتي في البحر والبرد شهقت وحليت عيني نلقى روحي في الفرش في الباطو عبدو راقد بجنبي...الغطا فوقنا هزيت نطل نلقى روحي حوايجي مبدلة ولابسة من غير هدوم وهو بجنبي في خلعة و سروال نوم...اه شومك اظلمة!!بدلك وبيتك عندو وانت ميتة مع الموتة...يعطك عزا راك مصطكة تجي تطبها تعميها...تلفت للغول اللي بجنبي مخدر بالنوم شعرو مفرفش طوال لحيتو بدات تهيج وجهو تاعب حتى وهو راقد مش مرتاح...يدي تسللت بالسيف مني لا شعوريا تتلمس في قسمات توحشتها قد صبري في الدنيا حتى كرهتها...ملامح قد ما طردتها من ذاكرتي ساكنة في معربدة مولولة تهزني وتردني تخليني شبه فاقدة للوعي...تسللت صوابعي تسرق في لحظات متعة من لحيتو لخدو لرموشو لشعرو وانا مسحورة ملهوفة فانية في حبو... لا لا نكرهو كره عمى...حل عينيه ويدي اللي كانت سارحة فيه دزتو وتنطرت نعيط:
-اش جابك في فرشي واش جابني ليك؟؟؟
يتكسل ويتبسم في تبسيمة مكر معناها راني فايق بيك وجاوب بكل هدوء:
-مكافاتي خاطر نقذت مريتي لعزيزة وما خليتهاش تموت...نشفتلك وبدلتلك ورقدت نتنعم بالدفا اللي تحرمت منو...-وصوتو رق وحن لهثني-ولو اني لتو محروم نغزر للماء وما نرواش...نقرب للدفا وما ندفاش...رمى الغطا وقاملي وانا نسيت اللي لابسة ومانيش لابسة...واقفة قدامو في روبة نوم قصيرة بروتال نوار مهدعة كل شي فيها على برا...وهو عينيه زغللت وانفاسو حدت وتوترت ويتكلم وعينيه بش تنقبني طالعة هابطة تاكل في ماكلة...ضميت ايدي لي فيسع غطيت صدري بعد تفكرت نصي اللوطاني لكلو عريان نجري للغطا ونتلف بيه كان عيني تبرق في الضو الخافت....كمل هو يضحك:
-هههههههههههه كي عفاريت الساعة 6...ملا حالة فيك والله كي تغطس في وسط عشرين الف غطا نشقو ونجيبك منو....تعرف جويدة محلاك زدت ادورت وتمليت...لحقيقة شاهيك علخر....نموت ونرجعك لي...
اما هاني صابر ميسالش....
تقول عامل علي مزية فورلي دمي نطرت الغطا بش نطلع راسي ونعيط ونشير بايدي...يد شادة بيها شطر الكوات ويد نعارك بيها ونصفي تعرى...هههههههههههه مجنونة نسمع فيه كي قالها...
-مسكين تصبر ولا تقضى...ما منيش رجا راهو... ابعد... ما كملتش كان قدامي وقص على كلامي لوالي يدي اللي مطلعتها و صبعو على فمي يسكت في:
-ماكش بش تتعلم ظاهر فيك ولا تفهم...تطييح القدر معاي لا...مش انا اللي تكلمني هكا...راجلك راني حبيت ولا كرهت وبعد وما نبعدش...لا بش نزيد نلصقك اكثر.
تحبش نجربو ونوريك:؟؟
بلعت ريقي بالسيف...وضع مريب لحقيقة ومتاع سفالة...-هيييهيييي كيما يضحكوا اك الجماعة- ضو هادي وصوت الموج والباطو يتهادى يدوح بينا وفرش وانا وهو قدامي قد قد...جبد الغطا لفنا بيه الزوز و سكر عليه بيد من حديد...لاصقتو قول لابستو و تبسم داهية وقلي :
-تحرك تراه ووريني روحك واش تنجم....لحد الساعة ما تقويتش عليك وما شفتش وجه الغول كيما تقول انت وجنتي علخر....يلا حديدة...
بديت نفرفط بش نتحلحز زدت ضربت لصقت في عضلاتو ولوحة صدرو واكتافو...والاحتكاك ولد شرارة النار اللي هاربة منها...ولمعت العيون وتدفقت الانفاس تنفث في نيران العشق وغيبت الذاكرة...رفرفت شفايفو على وجهي وانا مخدرة نستطعم في لذتها تمسح في وجهي...سكات ما فيه كان لهاثنا...ضاعت اللغة وضاع الكلام وانا تقريبا مسلمة...نستنى فيه يرجع لشفايفي و نسترجع لحظات حميمة ونادرة معاه كانت سبب في حمل وخسرتو(هههههههه نكدية إ سنية عارف...تذكرتك الله غالب شي يجري في دمي) وكنت للحظات مستعذبة قربو شايخة قول مزطلة (هههههه سامحوني في الكلمة اما تعبر على حالتها)
ونهز ركبتي العريانة لاصقة في ساقيه ونقمر ونجيبها قد قد بعد ما حددت مكان القتال...جات مع شفايفو اللي قربت لشفايفي ولصقتها....مالحرارة عضني:
-والديك مش بش تشعف....ااااي...
رميت الكوات وطرت الدوش سكرت على روحي وهو يتوحوح نسمع فيه ويسب...شوية وجاني قلي من ورا الباب:
-اقعد فم حتى تجمد بالبرد بالنويزات...والله ما نربيك من جديد...يا ظلمة..
وحس ساقيه يدور في البيت وسكر علي من برا حط المفتاح وخرج...قندت...دخلت دوشت وتلفيت في المنشفة وقعدت...وليت نرعش...نقرس ندخل الدوش ونخرج حتى قريب نبقبق مالماء وما حبيتش نرخ و نعيطلو وهو هذاكا اش يحب...قندت علخر درا كيفاش في البرد اذاكا مخي خدم وما تجمدش توة ساعات تعدات وانا مطيشة لا دق ولا سأل ولا كلمني...مع البرد حسيت اطرافي فاشلة وسخانة طلعتلي...نرعش ونلوج على شكال كنت شادة بيه قصتي بش ما تهبطش على عيني..لقيتو شديتو نرعش وندز بيه في المفتاح...واخيرا حسو طاح وشرنن في القاعة حليت السكارة متاع الباب وخرجت نجري...لبست حوايجو هو خلعتو طويل يدلدل ومراولو وسروالو...لكلهم كبار علي وطايحين اما انا اعطيني ندفى...سني تضرب في بعضها وانا كالفلوس ننكت ونرعش...#
بقية الحلقة 56:
من شدة رعشتي طاقو دخل بعضو وتفرت منو سروالو فيه سنتيرو ولاصق فيها غمد الفرد...طبست نهز فيه حسيتو مليان...حليتو ولقيتو في وسطو وخطرتلي وقتها هذاكا اش قلي مخي والسخانة بالظاهر اثرت في...هزيتو وطلعت في اتجاهو... في مخي نهددو يرجعني قلي يا بوهالية راجل متراني بالسلاح بش يخاف ولا يتهدد بيه!!!...وقتها انا بدني تاعب ومخي تاعب هذاكا اللي جاء لبالي...يلزمني نهرب منو ونبعد بالطرق لكل...طلعت واجهني واقف يتكيف وشاد الدفة ...جو معتم مظلم والبحر هايج...
انا حافية وندعثر في سروالو الوافي علي....
من غير ما يتلفتلي قلي:
-قديت روحك...نعرفك تنجم...نستنى فيك وسيب اللي في يدك تكتو تغلبك ما تنجمهاش....
والله لا رمش حتى وهو يتكلم وانا نغزرلو على جنب..
زايد معناها....بعد ما كنت مصوبتو ليه دورتو لي لقلبي بالتحديد...
-مش ليك لي...يا ترجعني منين جبتني يا نقتل روحي!
تلفتلي وعينيه محلولة مش مصدق...قام داخل بعضو
-اشرقت مش لهالدرجة...سيب اللي في يدك راهو مش متاع لعب...والله معمر...
بكل جرأة وقوة وحزم نتكلم:
-نعرف...وانا نقصد كل كلمة قلتها...سيبني وبرا عوم بحرك...
وقف وربع ايديه:
-جرب انزل تراه كانك بقلبك...
رعشت ما تصورتوش يسلم ويدفعني بش نعملها... طبست بش نرى وين حاطتو قلت نطيح شوية تجيني اللطف علقل كان نزلت...ظاهر عارفني وفاهمني نهدد بالفارغ...على تطبيستي لقيتو شادني ونتفارعوا انا وياه عالفرد....في غمرة عركنا وفراعنا...
تنزل على الزناد وما نعرفش انا ولا هو نزل...وخرجت الكرطوشة....وعينيه تزعزعت وقلبي خض...وحصل ما لم يكن في الحسبان...#منو

✴✴✴✴