⛺غربة عشاق⛺

💜الحلقة 29...💜

...ما جا الليل إلا وانا حاضرة في ابهى صورة...روبة بلون ذهبي مشقوق صدرها شوية و شطر ظهرها عريان مسنترة وعلى بدني وتتحل من لوطة...طالون وبوشات بنفس اللون...ماكياج ظلال غامقة لامعة على عيني اهداب طويلة مقلوبة...و روج بلون الشكلاطة (نوتيلا تفكرتك هنا...)..لميت شعري شوية منو عالي والباقي هابط يغطي ظهري ...ولقيت مع باكو الروبة كوليي فينو و براسلي لبستهم و قعدت نستنى في وقت الهبوط...وقت بعثولي هبطت الدروج وانا نتمايل في خيلاء سعيدة بلي وصلتلو واني حققت غايتي...
الصالونات محلولة على بعضها...على طول الحيوط بيفي داير انواع وأشكال ماكلة...و خدام تمشي وتجي وكل مرة يدخلوا ضيفان...العايلة لكل تستقبل في ضيوفها...كل مرة نتنقل لحلقة والوالد يعرف في بيهم.
حتى شميت ريحة نعرفها...ريحة قلبي والفها وبدني يتخدر بيها...ريحة سكنتني وما فارقتنيش...تلفت نفركس وين...وجات العين في العين والقلب دق والرموش رفت والساقين رعشت...كبشت في اقرب ايدين لقيتو زاك سألني لباس قتلو براسي ايه...
قبل ما يخلطلنا جرات سيلينا وتعنكشت فيه بالبوس والاحضان وانا نغزر وباهتة...جابتو تعرف فيه بينا:
-بابا...نعرفكم بعبدو صديقي رجل اعمال تونسي جا في صفقة وتعرفنا وانا استدعيتو..
رحبوا بيه لكل وسلم عليهم...وقت وصلت يدو ليدي سرى كورون في بدني وتكهربت من لمستو...لمسة توحشتها عندي قداش عليها وفقدتها... كبس علي بش يكسرها سليت يدي منو بالسيف...ومخي بش يتحرق وقتاش ولى رجل اعمال ومنين عرفتو وكيفاش؟؟ اش جاب عبدو ليها؟؟....مالا هو صديق للة العين اختي...احساس بنار تحرق وهي تدور معاه ولا كينو يعرفني ولا راني من حلقة لحلقة وهي مكبشة فيه كالعلقة...وقف مقابلني تقول يغزل في وهي ضربة ثنين تتشعبط فيه بش توشوشلو يضحكوا ويجبدها بيدو من حزامها...واقف بكل هيبتو...بهاك العضلات المصمصمين كيفما نقول انا وبش يطرشقوا مالسورية...الضربة اللي في حاجبو تلمع من بعيد تهدد في...يقحرلي وأنا ولا على بالي بيه أما القلب يعلم بيه كان ربي...دمي يغلي في عروقي غليان نحسو كان يطش عبدو يحرقو عالمنظر والهيئة اللي نشوف فيه فيها...اه من صدرو مفتول العضلات واه من طولو واه من عيونو اللي تقدح نار... حسيت روحي نفور ويلزمني نبعد من قدامو استأذنت للحمام...نمشي نزرب والطالون بش ينقب القاعة مالغزول وعدو طيحني كل مرة نعفس بيه على روبتي..ما صدقت دخلت رميت البوشات وحطيت ايدي منا ومنا على اللافابو ونتنفس بالقوي نعبي في رواري بش انجم نواجه...الباب تحل ما هزيتش راسي كان وقت دار بالمفتاح وايدين قوية جبدتني ولقيت روحي في حضن عبدو.....عينين تقدح نار و ايديه لافها علي قريب يعصرني:
-اه اظلمة لقيت عيلتك القورة ووليت توريست زادة انت معرية وتدور في وسط الرجال عريانة؟؟؟
-اش دخلك في ؟؟برا للبقة اللي لاصقة فيك وتتضيحك انت وياها ملي دخلت...
زاد كبس علي بش يقطعني في زوز وانا نتملص...لفلي ايدي ورا ظهري والشرر طاير من عينيه:
-انا راجل ما يعيبني شي..انت مرا وعربية...سماك ما تفهمش ماشي في بالك بعدت عليك بش تعمل في خلاها ما والاها...يبطى اجويدة...
وعض على شفتو بغزول ولمعت عينو وتنهد من عروش قلبو:
-ومحمرة...هاو سما الحمير بش تمضمض عليه...
وغرس شفايفو في شفايفي في بوسة قضت على دفاعاتي وسلمت من شوقي ولهفتي ليه...بوسة مسح بيها اثار الروج و حير المخبي ربي قلبي...بوسة ما كانتش بغش ولا غصب انما بلهفة ومعزة ووحش...
ما سيبني كان التمهيدية:
-توحشت سماك ها ظلمة...
والباب دق...سيبني وقلي:
-بش ندخل التوالات اخرج انت غدوة نراك بأي طريقة وين احمد...فهمت؟؟
قتلو براسي لا و جريت للباب بش نحلو وهو اتخبى... طرت وخليتو بغزولو وطلعت الدروج نجري لبيتي ونتبسم من هبالو...ترميت على فرشي كيني كنت في حلمة...شوية وقمت عاودت الروج ورجعت للجماعة...
كيف شافني الوالد هابطة جاني وشدني من يدي و صفق بش يشد انتباه الحاضرين:
-مرحبا بالناس لكل...استدعيتكم لكل اليوم بش نعرفكم على بنتي الكبيرة أشرقت...بنتي من ام تونسية زادة...الحفلة على شرفها وهي نجمتنا الليلة افرحولي بيها...
صفقوا الناس لكل وسلموا وانا ما هاممني كان اك العينين اللي تبرق من تحت حاجب مضروب...عينين اسرتني وتنبه في من بعيد...وانا كيف نرى البقة لاصقتو نعمل بلعاني...جانا راجل كبير صاحب الوالد يسلم علينا ومعاه ولدو اسمو ادريانو اللي مد يدو يستدعى في لشطحة...الموزيكا علات وكوبلوات هبطوا يشطحوا...وصلني الإنذار من بعيد وانا عاملة مغناني...قبلت وهبطت نشطح معاه سلو...حاسة روحي كيني اميرة هاربة من حكاية للواقع..الضو هدى ونقص...وكل مرة نلقى روحي نشطح مع واحد...حتى لقيت روحي بين ايدين نعرفها وصدر هو الأمان بالنسبة لي من دون الناس لكل...وشوشلي: هاك حصلت وجيت بين ايدي...والله يا جويدة لو ما تتهد وتستوي خطك الا ما تشوف مني الويل...#منو

✴✴✴✴