⛺غربة عشاق⛺

💜الحلقة 28...💜

...كملت نهارين في الكلينيك وخرجت جاني هو خرجني...ركبني في كرهبتو ووصلنا للقصر اللي على بابو اتهنتلت توة قاعد يتحل على مصراعيه قدامي والحرس اخرين مش هوما اللي عملوا في نهارتها ما سألتش ولا يهمني...دخلت الكرهبة شقت جنان هبال ووقفت على جنب نافورة...هبطنا الخدام مسنترين واقفين قدام الباب شدني من يدي ودخلنا مالباب الكبير...ريت صالونات برشا أما ما ركزتش خاطر العينين اللي قاعدة تغزرلي وتستنى في نوصل مهمشتني...زدت كبشت فيه واحنا نمشيوا في اتجاههم وقفنا بحذاهم قلهم:
-هذي اشرقت...تسمع هاي هاي...هذا خوك ادم وهذا زاك وهذي سيلينا...وهذيكا مرتي مونيكا...كلهم كوم وعينين مونيكا كوم...قابلتني بالنفور والصد وقابلتها بالقوة و التحدي...ظاهر بش تكون بيناتنا اشواط وبيلنتيات وصحة للرابح...ايا فك علي ناخذ حاجتي ونحل الابواب اللي مسكرة ويرحم ربي...سلام بارد كلي متاع ماخذة في الخاطر وعيط لرئيسة الخدم بش تطلعني لبيتي.مرا كبيرة محلاها تونسية زادة اسمها علية طلعتني وهي ترحب بي:
-مرحبا ببنتي...نورت اميمة...تفضل بيتك وارتاح لمنبعد...وخرجت...
دورت عيني في البيت...صالون صغيرة متحفنة في كوان...بيت نوم كبيرة مضخمة ومنها باب صغير يحل على بيت بانو تدوخ....عبارة دار مستقلة بذاتها ناقصة كوجينة...شخت عالبيت دوشت و بدلت بلاكار معبي بالحوايج قياسي وتمديت نرتح...جاني سي لطفي الوالد الله غالب مازلت ما انجمش نقولها...قلي اللي شوية وقت بش تتريقل اوراقي نحاول ندخل في جو عايلتو ولو ناوية نخرج نعلمو ونخرج كان بحراسة...
اصعب الامور بداياتها..وهكاكا كانت البداية تعامل محترز بيني وبينهم مع برود لكن من دون مشاكل ونتصورو بتنبيه منو...جابلي اللي تعمل سوان والحجامة و الي تعلم لغة عطاني كارطة كرهبة وشوفور ...لكن كانت كلها عطاءات مادية ما لبتش في جانب خاوي فارغ يستنى اش يملاه...ما ننكرش استمتعت بالرفاهية و ما قلقونيش الجماعة لأنهم عايشين كالاغراب حد ما يلوج على حد...مدة قصيرة نسبيا وتاقلمت مع الوضع...لكن عبدو سيطر علي في اليقظة وفي المنام...مشكلتي كي جيت ما نعرفش البلايص والدار اللي مشينالها ما نطلعش ويني قداش من مرة نخرج ندور ندور في الكرهبة ونروح ما نفهم شي..حتى خرجت مرة ندور والحراسة وراي و التقيت صدفة باحمد فين يخدم...سالتو عليه قلي ما جاش عندو مدة وهو بيدو متحير عليه زدت دخلت بعضي وقلبي واخزني وما قايلي خير...قعدت نتردد على احمد باقي عندي امل ونحسو هو الرابط اللي بش يوصلني ليه....وشي لا حياة لمن تنادي...تقريبا شهر او اكثر شوية نهارت اللي نادالي ولد بكار للبيرو متاعو دخلت شاورلي وقلي اقعد...قعدت مقابلتو مدلي اوراق وباسبور حليتهم لكل عليهم طابع طلياني... يعني اموري لكلها قانونية وورا اسمي اسمو في كل ورقة...انا نثبت ونورق وهو قلي:
-ايا مبروك عليك...امورك لكل مريقلة توة...السبت الجاي حفلة كبيرة على شرفك ونكون قمت باللازم معاك بعدها تروح ما عندك ما مقعدك وقت حاجتك تكلمني نبعثلك بش تجي...تسلم رزقك في تونس واخدم على روحك وانا نتابعك هنا...
حسيتو نكدلي فرحتي وطيرهالي...ما نروح إلا ما نشوف عبدو ونطمان عليه....قتلو وانا قايمة:
-نروح وقتما يظهرلي...
-حضر روحك حفلة يجيوها كان الطبقة الراقية لذا من غير ما نوصيك ...و نحي التجلطيم ما يمشيش معاي راهو قاعد نعديلك بهواي راهو...
خرجت وخليتو...قلت نستغل الوقت بش نخرج ونشري حاجات نروح بيها ...اكيد ناويلي على مرواحة ما ثمة شي يربط بيناتنا الجسور لكلها مقطعة وهو كينو يؤدي في واجب وكهو مش بتمام رضاه انما فوق من قلبو...اش عندي فيه خذيت حاجتي و ووفيت اما الفراغ اللي في قلبي واحساسي بالنقص والحرمان ما عوضهوليش ولا ملاه...لحظات نحس قلبي يرف كيف يشوفو يقطعو هو بحزمو و قوتو ويزيد وحشي لنجنوج و عبدو قلبي بش يتقطع من تفكيري فيه...
استعديت وشريت برشا حاجات حتى اللبسة للحفلة..
قمت نهارتها الصباح دخلت علي خالتي علية جايبتلي باكو كبير:
-صباح الخير يا عروسة...هدية بوك للحفلة...وشوية اخرى جايتك الحجامة وما تابعها...قوم دوش وحضر روحك الماكلة تو تجيك هنا...
نتثاوب:-عيشك خالتي علية...حتى انا ما نحكي في هالدار معاك انت...تقول دار مهجورة ما عدا كلمتين تقول مغصوبين بش يقولوهم وقت يتلموا عالعشا.
-بنيتي كل ناس وبلاد وارطالها اش عندك فيهم...هيا قوم ونوصيك رد بالك مالمناظر اللي بش تجي للسهرية...اتبسم ودور من بعيد لبعيد ما تورطش روحك مع حد عيش بنتي....خليك نظيفة...
بهت والفضول خلاني نكبش ونسالها:
-علاش خالتي علية؟؟؟فسرلي.
-بنيتي يقطعني ويقطع لساني اللي ما يهنيش... احسبني ما قلت شي و قوم حضر روحك....
وهربت فيسع وخلات مخي يخدم طول النهار وانا نحضر في روحي....اش تحب تقول معناها هو مش نظيف ومعارفو زادة؟علاه فاش يخدم بالضبط؟
زعمة اللي بالي بالكم؟ليام تو تبين كل شي #منو

✴✴✴✴