هزيت عيني و غزرتلو نلقى العين في العين بكل جرأة و قوة وعنف خدو يرعش مالغش...غضب هادر متاع راجل مرتو تتخطب قدامو وما ينجمش يرد الفعل بأي طريقة...عينيه تأمر في اطلع هزيت روحي بكل ليونة استأذنت طالعة ومرت بابا تقول:
-حشامة هي...
وبابا يقحرلها والجو متوتر بيناتهم...طلعت وخليتهم وبابا واصل داخل هو والرجال لبيروه...دخلت بيتي بدلت حوايجي و اتكيت نقرا في مساجات عبدو ونعاود كيني قصة حب فيهم وهو ما كان نبز وعرك...
قعدت برشا نتقلب مالغش و التوتر و المفاجآت اللي صارتلي الليلة...في تغميضة عيني ترتيحة لمحة خاطفة كالبرق جات فيسع وغابت...لمحة ذكرتني بالغول وين ريتو...ايه ريتو في المجزرة اللي عرضتنا في الغابة انا وعبدو وهو اللي قتل وقضى على الطفلة وجماعتها هو ورجالو....من صدمتي قلبي ضرب ضربة فجعة...تقعدت وتربعت في الظلمة وشعلت الفايوز... يا ناري عبدو اكيد رجل مافيا توة...حليلي واش يستنى في وفيه...يا ناري طريق مسدود نهايتو موت مؤكد ونهايتي ارملة...طفر دمعي وما نجمتش نردو عالمصيبة اللي دخلتها وتفكرت امي زدت بكيت بالشهقة قتلي:"دخلت لمغاغر حنوشة...هنيني عليها وليدي..." اش من هنا ياامي؟؟؟...جيت بش نطلبها مخر توة بطلت...نعلت الشيطان وطفيت الضو ورجعت تمديت...شوية وقت والليل أن أصف والحركة هفتت في الدار والكراهب حسها خرجت ورا بعضها...
نتقلب و انا عالجمر...بعثت مساج لعبدو:
-نحب نشوفك باي طريقة ما كانش تلقاني عرست بسي اخينا...دبر راسك.
كي كتبتها حسيت روحي بردت وهديت...يلزم نفش غيظي ما كانش بش نطرشق...اللي يحب ما يغدرش يصدق فعل وقول...باللي حاولت نطقو شي لا قال ولا عبر كان هو حاميني وانا في خطر...لخطر توة من شكون؟؟؟منو ولا من الراجل اللي معاه ولا من بابا؟؟:
شنوة اللي يلزمني نعملو؟؟؟مش كان نروح وخلي تاكل بعضها خيرلي؟؟؟...
مخي يهز ويجيب واعصابي متشنجة وحس بوانيي الباب يدور..تلفت فيسع نثبت وشعلت ضو الفايوز...
والباب تحل فيسع وتسكر وعبدو قدامي بهاك القحرة و الحاجب المضروب عمال ويقرب وعينيه تلمع في وسط الظلمة...ساكتة وكان النفس طالع هابط وهو كيفي قعد على حرف الفرش و كلمة لا...يفرك في ايديه بعصب وساقو ترعش حتى فددني:
-يزي راك مرجتني...انطق ولا ...
-ولا شنوة؟؟؟ماناش وحدنا وفي فيلة بوك مش بش نتعاركوا...وما نحبش اناقش اصلا اللي صار...قوم بش تمشي معاي البس دبشك...
-لا جبتها قد قد...وين نمشي معاك؟؟؟بجدك تحكي؟؟؟
كيفاش وحراسة وخوضة لبرا؟؟؟وزيد ما نتحركش من هوني الا ما تفسرلي كل شي...راني بش نهبل... ياخي دخلت المافيا بساقيك؟؟؟واعي للي تعمل فيه؟؟؟ما خممتش في؟؟؟؟
لحظات وكنت بين ايديه يعصر في بكل عشق وغش:
-سامحني يا روحي...سامحني على كل شي...رد بالك تظلمني...يجي وقت وتفهم كل شي...مش احنا اللي نختاروا انما ساعات بالفرض نتجبروا على شي لا نحبوه ولا نقبلوه...وباسني بوسة لاهثة ثايرة معبية تشنجات وحتى وجيعة...غاطسة في بوستو بلهفة ومحبة واستسلام وانا اللي كنت ثايرة قبيلة عليه...
وفي وسطها وفي تمبكها حاجة تغرست في يدي كيف دقة الابرة ويدو كبست على فمي بش عيطتي ما تخرجش وانا عيني محلولة فيه بمفاجأة وفجعة...وعهدي بروحي وعيني تسكرت على كلمة سامحني...
قداش تعدى وقت وشنوة اللي صار ما نعرفش... علاش وكيفاش ما فهمتش...مدهشرة وراسي يدور...
مازلت نسترد في وعيي ونحاول نسترجع الذاكرة ونفهم اللي صار...راسي يترنح رزين...شعري هابط على وجهي مخبل...فمي مربوط مكبوس ورزين...ايدي وساقي مربوطة بسلاسل حديد كيف الأسرى متاع بكري...حوايجي مبدلة مانيش في بيجامتي أما بحوايجي اللي نعرفهم...بعد ما دورت عيني على روحي وبدني....هزيت راسي بش نعيش مصيبة عمري
على كرسي مقابلني الراجل الغول....وواقف وراه راجلي...عبدو...بكل غطرسة وعنطزة...نحب نفهم انا فهموني...شنوة اللي صار واش معناها؟؟؟...تكلم الغوريلا:
-مرحبا بيك عنا...يسلم عبدو نفذ المهمة بنجاح...جابك لينا بش نفدي ثاري من بوك اللي قتلي بنتي...و نبتز ادريانو المعجب بيك...ونضرب عصفورين بحجرة...
انت عنا حتى يصير اللازم ونتسلم المطلوب...عبدو اطلبلي بوها...نتبع فيه بعيني طلب والصوت عالي:
-الو...
-اهلا...بنتك عنا...وتعرف المطلوب كانش يوصلك راسها كيفما قتلوا رجالك بنتي...وحدة بوحدة والبادي اظلم...
-سمعني صوتها بش نتأكد...
شاور لعبدو قربلي ورخف الرباط...بكل غل وحقد تكلمت...
-بابا حية ما تخافش...
نسمع في شهقتو والتليفون تقص و عبدو رجع الرباط ورجع لبلاصتو...زاد طلب ادريانو و يغلوا بالطليان ولا همني...مانيش مصدقة...في كابوس...سكرت عيني ما نحبش نشوف ولا نسمع...عرس بي وغر بي وبامي وانا ببهامتي نتبع و قال شنوة قال قلبي وحب وسامحني...مانيش مصدقة...راجلي سلمني ليهم بروحو وجابني بايديه....من هول الصدمة كنت واعية لحظات وفقدت وعيي قدامو وقدام الغول اللي تابعو...#منو....
✴✴✴✴
أنت تقرأ
⛺غربة عشاق⛺
Romanceبيب بيب وسعو?😎💀👿👹رجعتلكم بكرونيك ناار 🔥🔥🔥كرونيك صاروخ 🚀♨قصة عسل🔞🔞😗😘👀 موضوع مشوق 💋👄أحداث جريئة غير متوقعة 👫💏 أفكار غير مألوفة 😥😆😉 الكاتبة متاعها تميزت بأسلوبها الفريد 😘😗 عندها قلم مبدع 😍😋ديما تبحث على المواضيع الجديدة 👍👍❌تب...
