قعدت مبهللة مشوار وعيني عدها خرجت من وجهي وفمي محلول طاقة...مانيش مركزة مع التهمة بقدر ماني مركزة على شخصو...يعني هو حي وما ماتش ابو عيون زرق...يعني انا مش ارملة يعني كنت عايشة كذبة بالرسمي....شدتني هستيريا متاع ضحك والدموع تجري مانيش مصدقة...وقفت وقت ضرب عالطاولة بكل جهدو ضربة رعبتني...الضحكة بلعتها والدموع شاحت...نطقت نحب نتأكد:
-الرائد عماد الدين يرحمو عاش راجل ومات راجل...
-غالطة حي يرزق وقدامك...
-ما نعرفكش...راجلي تفاصيلو اخرى...راجلي دفنتو كيما دفنت بنتي ودفنت حياتي...
بلع ريقو بالسيف وعينو لمعت...مهمه و تكلم:
-مدام انت متهمة.... قصيت عليه بسخرية:
-المدام هذي مدامك حي مرتك على ما نعلم...تفضل كمل بش متهومة....
-أنت متهمة في قضية غسيل اموال...
-هههههههه اتهم باللي تحب...تحبش قتالة ارواح تحبش سارقة تحبش دروغ....اللي تحب...اللي تعمل مبروك...استوات عندي....اللي ريتو يزيني....
عينيه لمعت بدمعة وخرج يجري مالبيرو ولا هاممني...
ماعادش يهمني توة الضربات ياسر وانا طاقتي لكل هدرتها من كثر همي...ما عادش عندي طاقة لا بش ندافع ولا نتكلم ولا نعارك....طبست راسي وعيني موالاة والمونوت كابسة علي حتى ايدي حمارت.... ايييه هذي اخرتها اظلمة...ظلمتيها على روحك وقعدت اشربي...ما سمعتيش كلام أمك كولي.... كنت نعارك في روحي واحساسي بالنقمة والغل على هالراجل كبييير...عيشني كذبات مش كذبة وهدلي حياتي وقصملي قلبي...شرخ كبير شي ما يلمو ولا يصلح اللي فات...حياتي ادمرت بسبب راجل عرفتو نوع واكتشفت انو نوع اخر...ظلمني على طريقتو وظلّم حياتي...شنوة اللي بش يجبر كسري ولا يبري جروحي؟؟؟ واش بش يداوي ولا اش بش يخلي؟؟؟
يا لندرا بش يمسح دمعتي وينسيني في موتو ويقلي هاني عايش راهي كانت منامة خايبة؟؟؟ ولا بش يرجعلي بنتي اللي كان هو سبب مباشر في موتها؟؟؟ استغفر الله هذا ما كتبلي ربي وقضاؤو وانا راضية بيه...قعدت نبكي ونستغفر و ما عندي حتى ملجأ كان دمعي...
عماد:
نعرف اللي بكلكم متغششين وماخذين موقف مني... و برشا تساؤلات وماكم فاهمين شبيني هكا ولا علاش؟؟
تو تفهموني...خرجت فاير من عندها نرجع في دموعي بالسيف...لولا الكاميروات اللي تراقب راني حضنتها وبستها ومسحت دموعها...استسلامها قهرني وانا نعرف متأكد اللي هي مظلومة وخاطيها خاطرها ظلمة عداوها عليها...ولو كنت معاها ما كان يصير...لكن مهمتي ويلزمها تكمل للاخر و تقتضي اني نعمل هكا...
دخلت لرئيسي المباشر وحييتو ووقفت والكلام يتلجلج على لساني...جايتني رزينة أما شي اقوى مني:
-سيدي اعفيني من بحثها...عملت المطلوب والمهمة نفذتها بحذافيرها للاخر رغم ما فيها من ظلم لمرتي ولي ولعايلتي...نعرف الدنيا تهون قدام بلادي و التضحية واجبة في سبيل ارضي...اما ما عادش انجم.
مرتي في حالة ومسلمة قتلي التهمة اللي تقولوها مبروك...سامحني سيدي اما ننسحب...حتى لو بالاستقالة...
قرار صعيب وكلام اصعب اما يراودني خاصة من وقت رمات بنتنا...كرهت الخدمة و روحي طلعت...
نضيع انا ونرضى الموت ولا تجرى حاجة لاشرقت...
جاوبني:
-ما تتسرعش ويهزك الانفعال...نعرف شي قوي اما نعرفك قوي وقلبك حديد...نعفيك من استجوابها اما عليك بالبقية نحب يتشدوا الروس الصحاح اخوات لطفي ويقروا بالجرم...ما تنساش هي في الميزان...
ربي يعينك ...
خرجت وانا قلبي يعصر علي رجعتلها للبيرو وخطواتي مترددة...راني القوة اللي عندي لكل تضيع قدام عينيها...نصطنع في الشدة والحزم اما من داخل ما يعلم بي كان اللي خلقني...نلقاها راسها بين ايديها المربوطين زدت تشويت،حليتلها المونوت وانا على ركايبي قدامها...غزرتلي بلوم وقهر ونفور غزرة قتلتني خلاتني نتراجع و نوخر...وتكلمت:
-وعلاش تحل؟؟؟خليتني مربوطة؟؟؟انت ما خليني شي ما عملتوش...قتلتني بالحياة...خليتني نبكي على راجل ميت وهو حي...خليتني نعاني وحدي وما سخفتش...خليت كرشي تكبر وانت مش بجنبي...حتى طرف الأمل كي شفتك محيتو...حتى بنتك قطعة منك ماتت وانت سبب..خنقتها قبل ما تخرج للدنيا وما عطيتناش فرصة بش نعيشوا ونتنفسوا...وجاي تقلي الرائد و تهمة....اتهم منا لغدوة....استوات عندي...مشاوا الغاليين ماىعادش يهم...راجلي الله يرحمو وبنيتي عصفورة جنة...يا ظالم يجيك نهار والحبل اللي لفيتو علي يخنقك...حسيبك ربي...
سكرت وذني و خرجت....اقوى كلام سمعتو...سكاكن تقطع في...كيفاش بش نصلح اللي فسدتو؟؟؟ خدمتي هدت حياتي...منين بش نبدا واش بش نصلح واش بش نخلي؟؟؟؟...خارج وهي قوات في العياط:
-يا ظالم يجيك يوم...برا شوف حوايج بنتك وحس بالقهر والظلم....حسيبك ربي...
هربت مالبيرو هروب واعصابي مدمرة ودخلت لعمومتها المشدودين حتى يقروا...صفنت على ذراعاتي و حقها حقي نجيبو منهم ثاني ومثلث...
دخلت عليهم مغلغل وقلبي معبي واش بش يفرغو...
خلط علي زميلي يجري و يجبد في:
-عماد لا ما تغلطش...عماد...#منو
✴✴✴✴
أنت تقرأ
⛺غربة عشاق⛺
Romansaبيب بيب وسعو?😎💀👿👹رجعتلكم بكرونيك ناار 🔥🔥🔥كرونيك صاروخ 🚀♨قصة عسل🔞🔞😗😘👀 موضوع مشوق 💋👄أحداث جريئة غير متوقعة 👫💏 أفكار غير مألوفة 😥😆😉 الكاتبة متاعها تميزت بأسلوبها الفريد 😘😗 عندها قلم مبدع 😍😋ديما تبحث على المواضيع الجديدة 👍👍❌تب...
