كنت كل مرة يكلمني عمي محمد نمشي للشركة نصحح شوية اوراق ونمشي على روحي زيد يمدلي رزمة فلوس يقلي عمولة متاع ىصفقة نهزها ونمشي شايخة...عايشة متنعمة لا ذل ولا حاجة لحد...خوفي كان من ناجية كان تشدني بالكمشة ما سمعتش كلامها أما انا تمرمدت وتعبت و ترملت على صغري وفقدت بنتي يزي ما تعبت وما تعبتها...حكمت عليها ما عادش تخدم اما هي شي كل ما تلقى ضريبة تخدم وما تفلتش تقلي :
-في الحركة بركة وانا ما استانستش ناكل ونرقد وهذيكا شهرية راجلك ما عنديش فيها دخل...دفنت صغرك وضيعت شبابك علقل نموت وانا متهنية عليك.
نستلطف انا ونسكت...الكونت قاعد يزيد وانا دوبي دوب شهرية عبدو الزايد لا لاني نفرنق ولا نخبي عايشين مستورين انا وياها...
بعد هاك الليلة قل كونتاكتي بأحلام قلت نبعدهم خير كانش بش نهبل بلحق...غطست في القراية قريب امتحانات نحضر وكابسة روحي وجايبة ما عندي نحب ننجح ونخرج أستاذة لغة فرنسية...وكلمة استاذة مقترنة عندي بعبدو وقت يعرف بروحو استاذ بطال سيناريو مخدوم والراجل ماشي يخدم على روحو وانا كالبوهالي...وعالبوهالي ياما عالبوهالي... كي نتذكر ندوح راسي...أكبر كذبة عشتها في حياتي...
اما مانيش عارفة اللي اللي جاي أكبر وأكبر...
نهار نعدي في الامتحانات كلمني عمي قبل لندخل:
-شوشو صباح الفل.
-صباح النور سافا؟؟
-الحمد لله نسأل عليك شنوة مريقلة؟؟؟
-لباس هاني نعدي وربي يسهل...
-باهي ربي يوفقك...اسمعني عنا اكبر صفقة استيراد مواد تجميل هيا ايجاني بش تصحح ماك عارفة ما تمشي اليمنى واليسرى كان بيك...
-باهي نكمل ونجيك.
-اوكي نستناك...باي
وعلق دخلت نعدي مريقلة سلمات تعدى...خرجت حليت التليفون كلمت نجنوج هنيتها علي خاطر خليتها داخلة بعضها كل يوم هكاكا تقول هي اللي تعدي...وزيد الصباح قبل ما نخرج قتلي:
-بنيتي قلبي مقبوض ملي قمت استغفرت صليت دعيت ربي يفرج علينا...
-صلي عالنبي نجنوج...هيا تمشي تعدي في بلاصتي..
-موش وقت فدلكة...بنيتي رد بالك على روحك وخمم قبل ما تقدم على أي خطوة...
-لباس نجوتة ما تخافش بحول الله مربوحة..
وشديت تاكسي للشركة...وصلت دخلت سلمت وانا ماشية في ثنيتي نسمع في توتويت ولا هاممني...
دخلت لعمي فرح بي جات القهوة وقاطو وقعد يهر علي شوي في هاك قاطعتنا في هاك ما تحبناش ارمي اللي فات وراك وادخل في عائلتك الظفر عمر ما يطلع ماللحم...وانا داخل منا خارج منا وينكم وقت البرد كلاني...ايا الحاصل حلقت شوية ترشفت قهوتي ومدلي الوريقات صححت كيفما العادة من غير ما اناقش ولا نثبت الشركة شركتنا ناكلوا منها لكل... كملت المشوار وروحت ولا على بالي ونسيت الموضوع جملة...فاتوا ايامات كملت الامتحانات وراكشة في الدار لا نمشي ولا نجي ونخدم عساس على دار حماتي اما حتى اثر وحتى شي جديد...قلقت قلت نخرج نعمل دورة في البوتيكات نكسر الروتين عشية مالعشويات خرجت درت دقدقت سويقاتي...
شريت لي ولامي ولبنتي اللي فقدتها...ريت الحوانت متاع حوايج الصغار ما نجمتش نشد روحي...نكذب كان نقول قوية ونسيت...شريتلها روبة بصباطها بقرابطها...نحمل فيها ونبكي وختمت بيها المشوار ومروحة مغرب...شديت تاكسي مروحة وصلت لراس الحومة وانا هابطة يلكفتوني زوز عضرطة ويركبوني في كرهبة وانا نتملص وفمي مسدود...ما فهمت شي...
وصلنا لبلاصة ما عرفتهاش...دخلوني لبيرو و ايدي مربوطة بالمونوت...خلاوني شوية ويدخل ...ايه هو دخل...شبيه عبدو...واقف قدامي بصماصمو بوهرتو بزينو...ابو عيون زرق....لميت فمي المحلول وتكلمت:
-شكونك انت وشبيكم جايبيني هنا؟؟؟
جاوبني بكل حزم (وركزولي عليها)...
-الرائد عماد الدين سالم...انت متهمة في قضية غسيل اموال....#منو
✴✴✴✴
أنت تقرأ
⛺غربة عشاق⛺
Romanceبيب بيب وسعو?😎💀👿👹رجعتلكم بكرونيك ناار 🔥🔥🔥كرونيك صاروخ 🚀♨قصة عسل🔞🔞😗😘👀 موضوع مشوق 💋👄أحداث جريئة غير متوقعة 👫💏 أفكار غير مألوفة 😥😆😉 الكاتبة متاعها تميزت بأسلوبها الفريد 😘😗 عندها قلم مبدع 😍😋ديما تبحث على المواضيع الجديدة 👍👍❌تب...
