عشقي ٣ (My Love 3)

الحلقة العشرون

مشفي اوبروي

مكتب ارثر

ما ان انتهي من افاقته ، اخذ ينظر حوله حتي وقعت عيناه علي ارثر ...

عاطف : دكتور ارثر ، ايه دا انت جيت معايا هنا كمان ...

ارثر : هنا فين يا حبيبي ...

عاطف : في الجنة ...

ارثر : الجنة ، لا يا عنيا احنا في المستشفي ...

لينتبه ما ان وقعت عيناه علي شيفاي الواقف خلف ارثر ، ليبتلع ريقه بصعوبة ...

عاطف : يعني انا لسة عايش ، انا ما موتش ...

ارثر : اه يا حبيبي لسة ما موتش ، بس يا ريتك كنت موت علي الاقل الموت كان اهون من اللي هيحصلك ...

عاطف : ليه هو فيه حاجة اقوي من الموت ...

ارثر : ايوة فيه ، اللي هيعمله بابا فيك ، والله هتوحشني ...

وقبل ان يتحدث ايا منهما ...

شيفاي : خلصتوا ...

ارثر : اسف يا كبير ، الضحية جاهزة وتحت امرك ، تحب ندبح الاول والا نشفيه الاول ...

عاطف "بصدمة" : تشفي ايه يا جدع انت ، هو انا خروف ...

شيفاي "بحدة" : بس ، ارثر مش عايز اسمع صوتك ...

ليومئ له براسه ...

لينظر الي عاطف ...

شيفاي : وانت ، تحب عقابك يكون ازاي ...

عاطف : شيفاي باشا اللي حصل مني مش كان قصدي بيه اهانة لحفيدة حضرتك علي قد ما هو ...

ليقاطعه بحدة ...

شيفاي "بحدة" : ايا كان قصدك مش عايز اعرفه ودلوقتي اتفضل رد عليا تحب عقابك يكون ايه ...

عاطف "متنهدا" : اللي حضرتك شايفه انا متقبله ...

شيفاي : تمام ...

ليتركه ويتجه ليجلس علي كرسي المكتب واضعا قدما فوق الاخري ...

شيفاي : وعقابك انك تعتذرلها ...

عاطف "بذهول" : ايه ، اعتذر ولمين لحتة بنت لسة ما طلعتش من البيضة ، لا اسمحلي انا لا يمكن اعتذرلها ، انا اشرفلي اقدم استقالتي علي اني اعتذر ...

ارثر : بابا يا ريت حضرتك تشوف حل غير دا ...

ليضرب المكتب بقوة بيده...

شيفاي : وانا مش هقبل بغيره ، المفروض بدل ما يعترض انه يحمد ربنا اني اكتفيت باعتذاره ، انا كل ما افتكر شكلها وهي داخلة عليا وهي منهارة من العياط بسبب اللي عمله الحيوان دا ...

ارثر "باستغراب" : داخلة عليك منهارة ، ازاي يا بابا وحضرتك كنت في القصر وماسة من اول اليوم وهي هنا ، يبقي ازاي دخلت عندك وهي منهارة ...