عشقهُ خنجر في خاصرتي

البارت الثاني والعشرون

_٢٢_

#عشقه_خنجر_في_خاصرتي

#بقلم_أسماء_ديمير_مع_Roro_Rose

مرام ..

متربعة وبحضني جيس الكرزات ، وعلول منجضع على رجلي ويكرز وياي ، دنتابع مسلسل حريم السلطان الحلقة المدري شكد ..

والسلطانة هيام واعجابي الشديد بيها !!
امي من تطلع المسلسل من النص لو تطلع لقطة عيب تندار الي ترزلني ،  من تلكيني مركزة كل حيلي ..

فدوة مو على اساس اني ما اعرف كل شي ؟؟

طردت علي وبقيت اني اباوع بس اريدها تسكت مني شلون حلقة هي!!

طلع مشهد كلش واني عيوني مفتحات ومركزة ، وجان يجيني النعال ترس ، من حيث لا ادري وانسد التلفزيون ..

عطت مستنكرة...هاي ليييش يمه؟
-وجع وقز القرط ، هاي شنو هالقلة ادب مو عيب ..

-يمه شكو شبيج ، اشو من باب كلها تريدين تزوجيني ، وتخلصين  ، ومن باب ما تخليني اشوف شي ، وعبالك بعدني بنت نفاس ..تره كل شي اعرف !!

-ولج عيب ...دخيلك ربي وين نوصل كاعدين محاضن وبوس،  وفراش ويطلعوهم بالتلفزيون

عفتها تدردم وتدعي عالطلع المسلسلات التركية وطلعت اهف ...عاد ما شفت اني الاطكع يبووو؟؟؟
لو اسولف الها شفت بالممر وره التنور وعلياء وغافر ..عزاااا !!!

بطلعتي تلكوني غسان وضمياء راجعين من بره اول ، من شافوني ضمياء بنعومة استغربتها سولف وياي
-مرام ..تعاي شوفي غسان شلون اخذ الج هدية..

فكيت عيوني وحلكي ، وسالتهم بخوف هاا ، صدكوني خفت هالاثنين ما يطلع منهم شي الزين ابد  ..

-خير لشنو هدية؟؟ ...هااا يعني قصدج لعيد ميلادي !!ما يحتاج اقصد مشكورين ما تقصرون ..

ضمياء:اي عيني تذكر عمي الله يرحمه من يذكرج وكال اني بمكان ابويه واجيب الها ...

هو ساكت واكف وراها ، وهي تحجي جنت اتمنى لو صدك هالكلام !!

بس اخويه واعرفه مثل ما اعرف نفسي ...اخذت منهن الهدية والتفتت لغرفتي ماشية ، صاح ورايه غسان انداريت الهم ، لكيت ضمياء تاشر اله يحجي بشي..

امتنعت من درت عليهم كبل وابتسمت بوجهي ، هو كمل كلامه ..

...محتاج اسحب شكم فلس منج ، يعني قرضة اردهن الج ..

-هااا؟؟اي تدللون ابشر  ..

ضمياء:تعرفين عيوني انتي احنا هسه دنبني ، وخطيه الولد كبروا وينامون ويانا بالغرفة ، كلت اله نستعجل ، حتى هم مناك غدير يصير اله مجال بالبيت يتزوج ، وانت ضامتهن مو بحاجتهن وكلها شكم شهر ونردهن ان شاء الله!!