عشقهُ خنجر في خاصرتي

البارت الثالث

_٣_

#عشقه_خنجر_في_خاصرتي

#بقلم_أسماء_ديمير_مع_Roro_Rose

صفنت هذول امبينين جاين وناوين شر من كبر اي والله ، شبيهم وياي اكو واحد يحجي هيج جفت ..

كعدت يم بيت خالي صافنه خايفه من تاليها ، حاجيت مره خالي فشلانه ، خاله خابري امي شوفي شكوو ..

جان بوقتا بس تلفون الارضي موجود ، دكت عليهم محد يرد ، تالي دزت ابن خالي يشوف شكو ..

ساعه ورجع كاللها هذول عمام ايمان جايبن ويتنهترون ، شلون بنتج تفتر بالدوائر وسفور والرجلين طالعه ، أدري ماتعرفين تربين احنه نربيها ..

هزت اديها مرت خالي هم عوزه والله يدخلون ، شلهم دخل خالها حال خلق الله ، عليهم بناتهم هيه يادوب بنت عمهم وماعايشه وياهم ..

حجيت اني : وجع بكلبهم ، فوك ماسوولي فضيحه بنص االشارع ، وضربو موظف وياي  وبهذلوني كبال العالم ..

التفتت :-  هاااا ياموظف هذاا  ..

بلعت ريك ، درت وجهي ، خرب اي والله ..

حجت مرت خالي يا ولج صايره عركه شنوو احجي ..

رديت اي والله خاله ،  تكامشو همه وموظفين وياي ، اجو سحلوني من باب الدائره ، كووه مروه يردون يصعدوني للسياره ، شافوني موظفين وياي اعيط وتدخلو يفزعون  ..

نوب تكامشو وياهم وصارت مضارب وتدخلو الامن ..

لطمت خالتي على خدهااا ياافلك طرهم اي والله هذول فلا يستحون صخام ..

- حجت ولك امشي احجي لابووك شهل حجي هذا نوب رادو يخطفون البت ..

- لا خاله كالو بيبتج تريدج ..

- يا شدراج مايجذبون ، رادو يسون بيج مكسوره ويشمروج ..

فهيت بوجها هااا ..

- اي والله عزاا يردون يخطفون البت ..

دزت ابن خالي صدك عليهم،  وينقل لامي الحجي ، ضليت يمهم لليل ودزو علي خالي وامي كالو خلي تجي راحو لبيتهم عساهم كلعه ..

دخلت لبيتننه امي عصبيه وتغلط ، ماحاجتني بس نزلت عليهم من الحجيه لعمي ثامر راس البلا الي داز ولده علينه ..

شنوو عرفه ولفه يدخلون بالبت واذا بنت عمهم مالهم شغل بيها ولا كلمه ..

جدو حجه على كيفج عفاف بابا ..

عاطت شنو على كييييفي مدشووف شلون مصخوها نوب سوو للبنت فضيحه بنص شارع ادري شنوو تيهه هيه ..

حتى اني خفت منها دخلت للغرفه ابدل وارتاح وهيه وخالي ضايجين ..

غيرت ملابسي وهيه على نفس الحجي وضوجه ، جدي خابر عمي ابو محمد يعاتبه ..