عشقهُ خنجر في خاصرتي

البارت السابع .

_٧_

#عشقه_خنجر_في_خاصرتي

مرام:
فكيت رجلي ورجعت داومت اسبوع ، وامتحنا اخر  السنه ..

عادل شفته شكم مره يم مدرستي ..

كانت علاقتنا بسيطه باولها ، يعني تعارف نكدر نسميه ، واني طرت من عرفت هيج شاب يباوع الي ، اصلا كان محط اعجاب البنات هواي ،  انسألت منو واكول ابن عمي ...

طول وكشخه وعيون ملونة ، وعنده سياره رغم صغر عمره ، بوقت ما كان احد عنده سيارة ، هي مو مالته هو كانت لابوه ، و لان اهله حالتهم زينه وهو وحيدهم كل شي متاح اله ..

ويسوقها بداخل المنطقه ويستعرض كدام مدرستنا ،  والبنات عود يجي ياخذ اخواته وبنات عمه !ومن بين الكل اختارني الي!

كنت اطير من اشوفه من دون البنات بسمته الي ونظراته عليه ...غروري يرضى بي !!وافرح بان هو مو الوحيد كنت مرغوبة صوتي وتصرفاتي وضحكتي اكدر اوكع اكبر راس بلفتة واتونس بهاي الميزة ..

""لا تلومون مراهقة هذا اعلى تفكيرها وابعده ...اعذروا سذاجتي لان ادري بنفسي غلطت بس الشي لازم يذكر""

بالبيت على حالي واكثر بعد ما طبت وخلصت هم من محمد وفسخت وارتاحيت ...ضمياء شحعتني حيل من فسخت ونضحك على محمد وشلون انهزم لبغداد ليم جده بعد هالمشكلة ...

مرتاحه ما اشيل الكشاية عن كاع وكله اهتم بشكلي اخلي علياء لو ضمياء ..

يوصون من بغداد الي شغلات من تروح عمة ام محمد وبناتها لاهلها تجيبهن لان كامت تكرهني بزيادة من هيج ضار بابنها وحست بنفسها خسرته

مكيفات شعر وشامبوهات ما كان مثل هسه البنات ما الهن هواي شغلات للزينه واحنا ما نخلي مكياج ولو اني اموت عليه وكلش احب ارتب بنفسي ..

اسوي خلطات بالبيت لبن حامض لوجهي وزيت جوز هند من العطار للشعر اخبل وجهي قالب زبد وعندي خدود متفحات اني شكلي باول الشباب كلش مختلف ...

كان وجهي مليان وحواجبي ثخان وهالشي كلش زاعجني تعرفون كانت موديلات قبل الحاجب عبالك هلال باول طلعته من رفعه وهم دائري يسووه واني حواجبي عبالك سيوف طوال وثخان صح مناسبات وجهي بس شيسكتني يوميه اطير منهن ..

وامي تريد تنهد بيه وتخاف من ابويه مدللني دلال ويكول الهم شحدكم محد يطخها دام اشم هوا الله ...انطاني مجال حيل واني ما احترمت ابد هالثقه لا ابد ولا حفظت كرامة نفسي....

صار عرس اخواني واني رغم كانت الملابس غالية ابويه اشترى الي بدلة لسه اذكرها زين وشكد طلعتني حلوة ..

لونها كان بنفسجي مموج بيها نفشه بسيطه وردنها فوك كتفها وردة تول كبيرة من لبستها افتر بنصهم وهو يضحك من قلبه ..