عشقهُ خنجر في خاصرتي

تكمله البارت الثامن والعشرون

_٢٨_

#عشقه_خنجر_في_خاصرتي

#بقلم_أسماء_ديمير_مع_Roro_Rose

شدن:

من اول ليلة عرسنا واني حطيت بنفسي لظلم نفسي

....اول ما فوتني بالغرفة راح هو بالهول تارك الي الغرفة بحالها ، عود بيت اهله ومفرغيه النا عرسان،  وانطوني وصلة البياض بايدي ، وامه توصي بيه عليه ..

وعمتي وجدتي تكلي اذا ما كدر انت ساعديه ،  واني بس اهز براسي مكيفه فرحانه ببدلتي ،  وغرفتي وبيتي ورجلي!!!!!...

اخوانه كلمن عزل ببيت ،  والبيت ضلت بي امه واخته بس يعني البيت النا اني وهو بس ...

هو بنظري شي كلش جبير ، عمتي زينه وكلت احطهم فوك رمش عيني ، ما اقصر باي شي ان شاء الله ....

ما صار النا عرس مثل البقية ،  بس اللي كدرت افرح بي من بدلة ، وحفلة بسيطه هو ما سوى شي جبير ، اصلا مريض اسم الله على عمره ...

زفه وهلاهل واني فرحانه ، جوه بالبيت وهمه بره واسمع اخواني اللي زفوه شكد حلوة لمتنا الله يديمها ولا يحرمني من احد منهم....

دخل هو وامه من الباب وهي توصي بينا على بعض وخلتنا وراحت ..

خجلانه منه مثل كل عروس ، ومع كل هذا اني كنت فرحانة حسيت حصلت الاريده واحبه ،  لاول مره بحياتي ..

احنا عشنا حياة كاملة بحبسة وحرمان ابويه ،  وبعده فراس وطبعه الصعب خلونا باشبه بالسجن ،  وجان غدير اكبر امل الي ، والامل هذا خلاني بالغرفة وطلع !!!

هو لسه على عكازة وما اعرف شلون ندبر امرنا حيل حايرة جنت؟؟؟ومن طلع حرت اكثر ..

  بقيت سهرانة كل ظني يجيني ، ما تعبر لعقلي الصغير اكو رجال يعوف مره متحضرة بالكامل اله وعروس ويهمل ليلته الاولى!!

هاي التعودنا عليها لازم ياخذها من ساعتها ، لان يضلون يحجون عليه ،  لام فرقد سواها وابوي من عرف طين عيشتهم وضل لحد هاليوم يعيب عليه ضعفه ويه ايمان ..

واني ادري احنا بسبب اصابته يجوز نتعطل !! افكار تاخذني وترد بيه ..

غفيت بعد مده انتظار مو قليلة ،  وما وعيت بعد للفجر كعدت للصلاة ، توضيت بالحمام الغرفة وصليت وكملت ودعيت الله يسهل النا ...

طلعت ارد اشوف وين راح عني ، لكيته نايم بغرفة امه ، مقرفص وبملابسه القاط بس ذاب الرباط ،  انقهرت عليه يمكن لان مريض ياخذ راحته بالنوم وحده ويجوز مستحي مني ..