عشقهُ خنجر في خاصرتي

البارت الاربعون

_٤٠_

#عشقه_خنجر_في_خاصرتي

#بقلم_أسماء_ديمير_مع_Roro_Rose

ايمان ...

ضل واكف كبالي ، بعيونه زعل ، دنج راسه متحسف ، الطيبون للطيبات ست ، وهم ماجانو طيبين ولا نفسهم نظيفه ، شر ونزاح من دربه الله وكيلج ..

درت وجهي ولاحت دمعه بعيوني ، حجيت بهدوء معاتبيته جنت تعرف موو يوم الاجيت لهنا وحالتك تعبانه جنت تعرف ...

رفع راسه عليه مدمع ، حتى لو حجيت الج ست ما راح تصدكين لان ماعندي دليل ، اني هم سمعت وجذبت الي كالو بس يوم شفتهم بعيوني صدكت ..

جنت ناوي اكلج بس من شفت لمعه عيونج بطاري خطيبج ماردت اكسر ضحكتج ، ماتجرات الله يشهد ،

نزلت دموعي بهدوء مانطاك كلبك تكسر فرحتي وانته غريب ، ليش لعد هو كسرني وكسر كلبي ويدري بيه احبه وروحي من دنياا ..

رفعت اديه امسح بدموعي اشهك شلون هانت علي ، شلون نطاه كلبه يقهرني ويصدمني ..

رد عليه كتلج شر ونزاح ، احمدالله ماخلفت منها وخليت هيج انسانه تصير ام اطفالي ، ونفس الشي الج ، الله يطيب جروحج انشالله ..

مارديت علي ، وجوده فتح جروحي وغمقها ، عفته ومشيت اجر بذيال الخيبه ، لمن وصلت لشارع اني ميته بجي كل الي يشوفني يوكف يباوعلي بستغراب .

دموعي وحسرتي نفسها ذيج الدموع ذبيتها على حسام ، وعود كالي اني غير ، والله صدكت يابن الناس ، جرحك غير ، اذيتك غير ، خذلانك غير عن كلهم ..

مشيت بشارع مادري وين وجهي بس المهم امشي اريد الحركه داخل روحي تخف ..

لحد ما لكيت مسطبه يكعدون عليها الي ينتظرون سياره ، اخذت جهه وكعدت صافنه بفراغ ..

فكرت اترك الدوام واعوف الشغل ، بس وين اروح وين اكظي وكتي ..

شسوي اكعد بالبيت راسي وراس جدي وامي ، هو اني شعندي بهل حياه غير شغل و البيت ..

وبيش فلحت اصلا ، شو لا زواج لا خلفه ولا حب ، الشي الوحيد لحد هسه ساندني شغلي ..

سيارات تفوت من يمي ويوكفون يصيحون فلان مكان عمي ..

تصعدين يبااا ..

مانداريت انشغلت بالتفكير ، حتى ذيج الي الطعنتني اجت بالي ، ليش ماستحت مني ليش ماخجلت ليش مابررت الي ..

لهل درجه اني صحبتي هيج رخيصه مو مهمه عدها ، شو شلتها بماي العين والله حتى زعلها جنت احسب اله حساب ، يوم الي كالت محتاجه جنت مستعده اداين وادخل نفسي بدين في سبيل هيه ما تضرر وماضوج ..

بيش قصرت ؟؟!

قصرت لو اني غشيمه ؟! والغشيم مايعيش بينهم ....