عشقهُ خنجر في خاصرتي

البارت الثامن والاربعون

_٤٨_

#عشقه_خنجر_في_خاصرتي

#بقلم_أسماء_ديمير_مع_Roro_Rose

تراجع مرض امي والحمدلله ، و تم تاكيد على شفائها بشكل كامل ، بفضل الله سبحانه وتعالى وبفضل قوتها هيه ..

طالبنه بالورث وجان رد تنازلن عنه ماعدكم ورث يمنه انتو ، والورث للولد مو للبنت ..

جلبت بامي وكتلها عوفي ، اني اسدده للدين مادام رجعتي الي سالمه وبصحه زينه كلشي يتعوض ..

وصدك بلشت اسدده الحمدلله ، سنه ونص و كملته ، بالسنه و نص هواي صارت امور بس ماريد احجي بيها ..

ماكو شي تغير نفس الوجوه ونفس الحياه ممله ونفس دنيا ماوكفت ابد ..

مشت دنيا واخذت عمري وياها الي ماشفت منه خير من بنادم ..

يمكن حياتي احسن من بعض الناس ، والله يحبني ، وعشت وشفت هواي شغلات زينه ..

ماريد اصير سلبيه واكول كظيت عمري بالاهات و الحزن وظيم لاا ، عشت وشفت وتعلمت دروس ..

بالاخر كلشي مقدر الي واني راضيه بالي عندي ..

انخطبت كم مره بس رفضت لا شخص مناسب ولا اني الي نفس بعد بالزواج والارتباط ، برغم مرت سنوات على فسخ خطوبتي برعد بس الحال ماتغير وجرح ماشفه ابد  ، ..

سمعت بفرقد تزوج و خلف هم هذا الحجي قبل سنوات بس بسبب بعدي سمعت تالي وكت  ، دعيت اله بالراحه ، سمعت غصن هم تزوجت وما حظرت لا عرسها ولاعرس شدن ..

كطعت عنهم فرد.كطعه ، ونسيت ذيج الجهه كلش ، عدا مرام نوبات اتواصل وياها ، هيه دوم تسال عني ، حنينهو تحن لصحبتنه سوه ..

سنه ٢٠٢٠ نفس ماجانت سنه سيئه على جميع العراقين هم جانت سيئه عليه هم لاحني منا دمع و نوح  …

بدايه السنه المشؤمه ، وانتشار  فايروس كوفيد9 .. انصاب بي جدي ..

انصاب بشهر الواحد ، ضل يصارع ويقاو هو اصلا عنده ضعف المناعه و مرض السكر ، هذا ادى الى انو  انومه مستشفى .

ايام وليالي هو يحاول يجر النفس بس عبث ماكو فايده ، جنت اتكابل اني وخالي عليه ..

يجون ولد خالي يساعدوني هم ، نسبحه و نغسل اله ، ماخذين احتياطنه وكمامات وكفوف ..

بس ماكدرنه عليه لخد ما دخلناه بالمستشفى بالحجر ، بس انضرب جلطه ماكو اي عنايه تشفي الكلب ..

لذلك طلعناه بالبيت  احنه نداري ، و ضل فتره تحت الحجر والمعناه و المداراه  ، وكل اكله نظيف و ادويه طول شهر بالبيت ، تحت الحجر مع هذا ماكدر يقاوم ..

نقلناه للمستشفى باليل  بعد ما ساء وضعه وفقدنه سيطره اني وخالي ، مداراتنه ماجابت نتيجه ، شايلته اني وخالي ، امي بقت بالبيت مابيها تكوم من خوفها وخرعته عليه..