رقائق 2

فتاة تحلم أن تعمر الأرض

فتاة تحلم ان تعمر الارض و ان تكون نصرة الإسلام و المسلمين :) ماذا عليها أن تفعل ؟

ج / سؤال جميل نختم بيه القعدة دي.

اللي عليها تعمله أنها تبطل تحلم أنها تعمر الأرض وتكون نصرة للإسلام والمسلمين :) ، آه والله :)

الموضوع دا بقى أشبه شيء باليوتيوبيا أو الكارما ، أن الإنسان يحلم ، ويحلم فقط ، أحلام ضخمة جدًا محتاجة شغل كبير قوي ، وبعدين يقعد يتفرج على حلمه الجميل كل يوم ويغذيه بتصورات رومانسية عن الحياة بعد تحقيق حلمه ، بينما هو عاجز حتى عن وضع الخطوات الأوليّة لحاجة زي دي.

ماذا عليها أن تفعل؟
تركّز في دايرة تأثيرها ، الدايرة دي = هي طريقها لدخول الجنة مباشرة.
كام شلة بنات محتاجة واحدة وسطيهم تأمرهم بالمعروف وتنهاهم عن المنكر؟ صعب تكوني إنتي؟
طب الأمة مش محتاجة بنات بارة بوالديها؟ ، محتاجة ، صعب تكوني إنتي؟
الأمة مش محتاجة بنات تقدم نموذج للحياة بحجاب؟ ، محتاجة ، صعب تكوني إنتي؟
طب كام بنت محتاجة بنت زيها تستشيرها ويكون عندها عقل ومعرفة تسمح لها بتقديم المشورة السليمة بدل ما بنعاني من الموضوع دا ، صعب تكوني إنتي؟
طب بلاش ، أرحامك محتاجين حد يتعاهدهم بالزيارة في زمن الجفاف دا وللا لأ؟ ،
طب بلاش ، الأوراد اليومية والأذكار؟
حتى الهوايات ممكن تكون بوابة لربنا ، حتى العادات.

وصل المقصود؟ ، بلاش أحلام ، نشتغل على دوائر تأثيرنا : صحابنا - أهلنا - معارفنا - شغلنا ... ونشتغل على نفسنا ، ودا قدام ربنا : كفاية جدًا جدًا!

لو واحدة من صاحباتك بقت أقرب لربنا انهاردة منها إمبارح بسببك : دا نصرة للإسلام والمسلمين.

لو أمك باتت راضية عنك وسعيدة ، دي عمارة وأي عمارة.

لو واحدة من صاحباتك كانت في مشكلة ، وإنتي انتشلتيها منها ، دا سبب كافي لرفع درجتك في الجنة..

لو يومًا بعد يومًا تزدادين علمًا وثقافة ، دا شيء ممتاز..

لو فقير انتفع من صدقتك إنهاردة ، فدا إنجاز عظيم.

لو ولد صغير اتعلم منك سورة الفاتحة ، فدا باب حسنات لا ينقطع ..

النبي يقول : "أحب الأعمال إلى الله ، سرور تدخله على مسلم" هكذا.. إنجازات في دوائر التأثير ، دي مش حاجة قليلة ولا أحلام تافهة!

كلنا جميعًا عندنا أحلام أممية ، عالمية ، وكبيرة ، بس الكبير ما بيبدأش كبير ، الكبير بيبدأ من كلام خديجة لرسول الله صلى الله عليه وسلم : "والله لا يخزيك الله أبدًا ، إنك لتصل الرحم، وتصدق الحديث، وتحمل الكل، وتقري الضيف ، وتعين على نوائب الدهر" ..

إنجازات صغيرة مش بحجم النبوة وقيادة الأمة بعدها ، بس هي دي اللي صنعت دي :)

وهكذا : التركيز على دوائر التأثير ومناطق الفاعلية اليومية والحياتية عمومًا هو الطريق للنفع العام بعدها.

وكان من دعاء النبي صلى الله عليه وسلم : "اللهم اجعلنا هداة مهتدين"

الغازي محمد