رقائق 2

التاثير قد تم

التأثير قد تم

*️⃣ لما قريت من شوية تصريح مندوب الأمم المتحدة بشأن اليمن اللي قاله فيه إن 5 مليون يمني على بعد خطوة واحدة من المجاعة.. افتكرت فيلم وثائقي قديم بخصوص الإعلانات والدعايا...
*️⃣ الفيلم كان بيتكلم عن مدى قوة وتأثير الدعاية وإنها تقدر تجبرك عالشراء وليس تقنعك بالشراء؛ بتبرمج مخك وعقلك الا واعي وهتشتري يعني هتشتري... المهم في جزئية كان في دكتور جامعة بيشرح حاجة وبعدين قال إن قوة الدعاية وصلت لمرحلة إن معرفتك هى بتعمل ايه مبقاش ليه فائدة... يعني انتا عارف إن الممثلة أو الممثل اللي بيشرب المشروب الغازي دا أخد فلوس؛ وإن الساندوتش شكله في الحقيقة مش كده... بس بتلاقي نفسك عاوز تشتري برضك.
*️⃣ وللتوضيح عشان مرة كتبت النقطة دي؛ المقصود مش إنك لو بتكره الفراخ فتشوف اعلان كنتاكي فتنزل تشتريها؛ انتا مش المستهدف؛ المستهدف شخص ممكن ياكل عادي كنتاكي وزاكس وكنساس وتشكن فيلا وغيرهم؛ فالدعايا ممكن تخليك تروح لواحد منهم.
*️⃣ المهم يعني عشان مطلعش من الموضوع وابقى لاحقاً اكتب بوست عن الدعايه وإزاي بتبرمجنا؛ فالمحاور سأل البرفسور دا سؤال وقاله طيب ايه الحل... قاله متشوفش الإعلان؛ لإنك مجرد هتشوف الإعلان فـ "التأثير قد تم".
*️⃣ كونك عارف هيخليك مرة تقول لنفسك اعقل؛ اثنين ثلاثة اربعة؛ بس في مرة هتضعف وتروح تشتري... وهما عارفين دا وعشان كده بيغرقوك بالدعايه ويخلوك تشوف الإعلان 100 مرة؛ عشان يضمنوا إن عدد ظهور الإعلان ليه ومحاولته التأثير عليك يفوق عدد المرات اللي نفسك هتقولك اعقل ما انتا عارف إنه فوتوشوب وفي الحقيقة مش كده.
*️⃣ طبعاً هتقولي ايه علاقة دا باليمن؟ في الأسبوع الأخير كان اللي ماسكين الريموت مشغلينه على أفغانستان؛ يلا كلنا نتكلم في أفغانستان وأصحابي يقولوا لي اكتب عنهم... ايه أخبار حقوق المرأة؟ طيب حقوق الإنسان؟ طيب زراعة المخدرات والأفيون؟ طيب التماثيل والآثار؟ وووو
*️⃣ طبيعي وخبر الساعة وعادي الكل يتكلم فيه؛ لكن اللي ماسك الريموت بقاله سنين ولا مرة داس لك ON لأخبار اليمن وعلى طول عاملها Mute... اسأل نفسك تعرف أي شيء عن اللي بيحصل هناك؟ تعرف أخبار الكوليرا والمجاعات اللي حصلت هناك؟
*️⃣ ولا الهوا محدش يعرف؛ وأدي الأزمة وصلت إن في 5 مليون إنسان يمني داخلين للمجاعة؛ ومش معنى دا إن مفيش مجاعة؛ موجودة ومن سنين؛ عارفين الصورة القديمة بتاعة الأفارقة اللي المجاعة مدمراهم والهيكل العظمي ظاهر؟ في زيها بيحصل في اليمن من سنين.. ولناس عرب زينا ومسلمين زينا... لكن اللي ماسك الريموت دايس "ميوت".
*️⃣ حتى أنا رغم إني عارف الموضوع دا وإن الاعلام بيقولنا يمين يمين شمال شمال أو زي ما بحب أقولها "يقول شي على طول نمشي ومنتكلمشي"... برضك حصل فيا نفس الموضوع؛ برضك نسيت أخبار اليمن رغم إني كذا مرة كتبت عنها؛ فلما جه تصريح مارتن جريفيث بتاع الأمم المتحدة لقيت نفسي بقول "يااااه اليمن؛ نسيتها خالص؛ هو ايه اللي حصل الأسابيع الأخيرة هناك".
*️⃣ أتمنى متخادعش نفسك وتقول؛ أصل المواضيع هناك متكررة ومفيش جديد وطبيعي الانسان بيتابع الجديد... لإني لو سألتك طيب قولي القديم؛ قولي أي شيء حصل هناك آخر 3 سنين؛ اتحدى إن 90% أو أكثر من اللي هيقرأوا البوست ميعرفوش... فإحنا مش بنتابع اليمن  عشان أخبارها مفيهاش جديد؛ احنا مش بنتابع أخبارها أصلاً.
*️⃣ اه قبل ما انسى؛ أنا مش بقول مين الصح ومين الغلط في اليمن؛ عشان الخناقة متقلبش سنة وشيعة؛ أنا بسأل بس هل تعرف ايه بيحصل؟ ولا انتا ممكن تبقى عارف خبر لوفاه شخص من الجنس الأبيض؛ لكن إن في بتاع 15 مليون مسلم يمني تحت خط الفقر المدقع؛ دا خبر منعرفش عنه شيء.
للأسف التأثير قد تم؛ ورغم إني عارف اللعبة بس برضك حصلت فيا 😞😞😞 للأسف حصل فيا برضك واتخدعت برضك