رقائق 2

بادر

لو حد مستني المجتمع يتغيّر.. فالمجتمع مش هيتغيّر لوحده.. هو بيتغير لما تتغيّر أفعال وسلوكيات ومفاهيم الناس عن القضايا المختلفة.. الناس دول إللي همّا إحنا.. أنا وإنت وانتي وأي وكل حد عارف إن ده واجب ورسالة بيقدمها لو مكنش بدافع الدين.. فهيبقى بدافع إن أسراب الجراد كلها جراد وممالك النحل مفيهاش غير نحل.. محدش يفكّر نفسه إنه نحلة وسط الجراد وإنه أحسن من باقي الأسراب..

لو مش عاجبك سلوكيات ومفاهيم المجتمع عن الجواز مثلا .. لازم تقدّم بنفسك نموذج مختلف يغير الصورة دي عند الناس.. لازم تقدم بديل صالح يحل محل الشكل الفاسد.. مش عاجبك التحرّش؟ ساهم وادعم الحملات المجتمعية إللي بتحاول تنضّف المجتمع من المرض ده.. مش عاجبك وعي الناس وبتعاني من جهلهم أو تجهيلهم.. وعّيهم.. اشرحلهم وفهّمهُم وافتكر دايما إن يمكن ربنا بعتك عشان تكون وسيلة ليهم وربنا هيستخدمك استخدام الأنبياء والرسل..

لو في حاجة واحدة مخلياني واثق من كلامي.. هتكون إن المجتمع مش هيجبرك ولا هيقدر يضربك على أيدك عشان تعمل حاجة مش عجباك.. مش هيضغط عليك تعمل زيّه أو تمشي ورا عاداته الغلط بالعافية .. المجتمع مش قانون ومش أوامر ومش قوة لا إرادية يعني بتسيطر علينا .. المجتمع أفكار والناس هي إللي بتحرّكها أو.. الناس هي إللي بتتحرك ليها.

المُبادرات مُعدية.. والسلوكيات السويّة بتلفت انتباه الناس.. وعشان كده نشر الامثلة والنماذج إللي تشجّع الناس يقلدوهم هو في حكم الواجب والمسؤولية على كل الناس.. الناس شبعت تخويف من الجواز ومشاكله وفضايحه ونهاياته من كتر المآسي إللي شافوها وشبعوا تخويف من عمل الخير إللي بيرموه في البحر ومش بيحسنوا لحد عشان بيخافوا شر إللي بيحسنوا إليهم.. بيخافوا فبيتصرفوا غلط أكتر فتحصل أزمة ثقة أكتر وأكتر في إللي حوالينا والصحاب والزمايل والجيران والمجتمع والناس..

المجتمع إللي بيحركه الخوف بيكون مجتمع عنيف على فكرة.. ولمّا بيخاف مش بيسلم.. ده بيستوحش ويخرّج أسوء ما فيه من خوفه .. صحيح مجتمعنا مش متدين بطبعه بس بيخاف من الدين بطبعه.. مجتمعنا بيخاف من كلام الناس.. مجتمعنا بيخاف من كل حاجة جديدة وبيتمسك بالقديم.. ليه منطمنش الناس بالدين؟ ليه منخليش كلام الناس على الحلو بس.. ليه منقدمش الجديد بأجمل صورة ليه؟

إنت بتمثل دينك.. وبتتكلم مع الناس.. وتقدر تعرض الجديد في أجمل صورة ليه..
ليك دايرة تأثير.. مهما كانت صغيرة مش مهم.. مسيرها تكبر..
ومسير المجتمع يتغير بدواير تأثير كتيرة من ناس تانية..
بس لو مفيش نموذج.. مفيش ناس.. مفيش دواير تأثير مفيش تغيير..

كُن أنت النموذج!
ولو مش هتقدر.. ادعم النماذج إللي تعرفها..