تعامل المجتمع مع الخطوبة عجيب غريب مريب، المفروض أنا كإنسانة مسلمة فرصتي إني أعرف الشخص اللي هكمل معاه بقية عمري هي الخطوبة، لكن التعامل اللي بنلاقيه إن الخطوبة دي فترة الأهل بيلحقوا فيها يجهزوا عيالهم مش اللي هيتجوزوا دول يشوفوا إنهم مناسبين لبعض ولا لأ، يعني المفروض شخص أول مرة أشوفه في حياتي أو كنت أعرفه معرفة سطحية يبقى لمجرد إنه اتخطبنا بقا هو المصير خلاص! معلش هو أنا كفرد مسلم المفروض بتعامل طبقاً لمنظومة ديني ايه فرصتي فإني أعرف شريك حياتي غير في نطاق الخطوبة؟ وفسخ الخطوبة عدة مرات طبيعي جدا زي اللي بيرتبطوا بيرتبطوا عدة مرات لأن هكذا تسير الأمور، ويمكن تكمل من أول مرة، فمش مشكلتي أنا إني أتعامل مع الخطوبة بالشكل اللي المفروض تكون عليه، مش بالشكل غير المنطقي اللي المجتمع فارضه وبيحاسبني عليه! ماهو لو الطبيعي إني ارتبط زي منا حابة واللي ألاقيه مناسب هو دا اللي هيكون خطيبي يبقى ماشي لكن دا لا هو الطبيعي ولا حتى المجتمع سامح بيه بس بيعاملنا على أساسه! لأ وكمان عدد المتقدمين هو اللي بيحدد إذا كنت بتتنك وبتشرط أو لا مش إذا كان الشخص مناسب أو لأ، لا هي بالعدد فلو قليل يبقى ما صدقنا ولازم نتنازل عن مبادئنا، ولو كتير تبقي بتتشرطي على ايه، وكأني أنا اللي بتحكم في ماهية اللي بيتقدم، وكمان بقى الأفدح اعتبار استحقاقي لزوج محترم طبقاً لمعايير مادية بحتة، فلو الزوج معاه فلوس وشكله مقبول ودكتور معناه إني لو أقل منه في حاجة من دول يبقى هو يستحق حد أحسن أو أحمد ربنا إنه رضي بيا، وهكذا بقى الاستحقاق بيكون على المنصب والفلوس والجمال، فلو بنتي جمالها مش مبهر تبقى متستحقش أصلاً حد محترم ودا أحقر شيء أهل يقدر يعملوه في بناتهم، يعني في فرق بين إن الفرص تكون قليلة بسبب معايير مادية وبين إني أشوف إن الشخص دا ميستحقش أصلاً، فلما حد يشوف بنته متستحقش فتبقى نتيجة طبيعية جداً المهازل اللي بنشوفها في منظومة الجواز الخربة بتاعة المجتمع الواطي دا.
أنت تقرأ
رقائق 2
Nezařaditelnéمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
