- من زمان وفي خلاف وعدم قبول بيني وبين الجماعة بتوع "إحنا بنتكلم كلام علمي بعيداً عن الدين".. وعلى رأسهم طبعاً أحمد الغندور "الدحيح"، وإيمان الإمام "الإسبتالية".. ودا عشان انا عمري ما اقتنعت بوجود تفسيرين متضادين لناتج واحد..
- مثلاً كل فترة لازم واحد منهم يطلع يتكلم عن نظرية التطور ويقعد يحزق ويجيبلك دليل من الشرق ودليل من الغرب عشان يثبت صحتها.. وفي الآخر لما الناس تقوم عليه.. يقولك "أنا مش شيخ عشان اتكلم عن الدين.. انا بتكلم من منظور العلم"..
- وكنت دايماً بستغرب ازاي واحد يؤمن بفكرتين مالهمش أي علاقة ببعض وناتجهم واحد.. يعني ازاي تؤمن إن سيدنا آدم اتخلق من طين، وربنا نفخ فيه من روحه، وخلق من ضلعه السيدة حوا، وبث منهما رجالاً كثيراً ونساءً.. وفي نفس الوقت تؤمن إن الإنسان أصله قرد ولا بكتيريا زي ما طلعت أختنا إيمان الإمام قالت من فترة!
- الموضوع مش مقتصر على نظرية التطور.. الدحيح اتلكم عن حاجات كتير بيحاول يوصل بيها إن في عيوب في خلق ربنا.. زي ما اتكلم عن الـ Blind spot قبل كدا وقال إن دا ديڤو في عين الإنسان..
- فـ الحقيقة أنا شايف إن أفكار الدحيح مش كويسة، وبيرمي سم في العسل وبيضل الشباب الصغيرين خصوصاً اللي علمهم قليل..
- يعني مثلاً لما يكون واحد ميعرفش ايه هي الـ Blind spot أساساً ويسمعها أول مرة من الدحيح، أكيد هياخد كل كلمة بيقولها على إنها حقيقة مسلم بيها.. خصوصاً إن طريقته لطيفة ومشوقة ولما يتكلم تحب تسمعله..
- ويا سلام لو الشاب دا علمه الديني كمان قليل.. دا بيبقى زبون زي العسل.. عشان مش بس بيقبل الكلام العلمي عمياني.. لأ دا كمان ماعندوش مشكلة يشكك في الدين لو لقاه بيتعارض مع العلم..
- هو الحمدلله إن في ناس عندهم علم بيتفرجوا عليه بعين الناقد وبيردوا عليه بالدين والعلم والمنطق.. منهم الدكتور إياد قنيبى اللي واخدهم كلهم غسيل ومكوا على اليوتيوب.. لكن للأسف برضو هما صوتهم أعلى وعندهم متابعين أكتر..
- المهم يعني إن الدحيح مش مكتفي بتضليل الشباب دينياً.. وحالياً أخد الموضوع لمنطقة تانية وراح اتعاقد مع شركة إماراتية مطبعة مع الكيان المحتل وداعمه لمنصات تانية بتروج للتطبيع..
- وقبل ما حد يقول إنه ممكن مايكونش عارف إنها شركة مطبعة وبتاع.. خلونا نتفق إن أحمد الغندور مش عبيط وعارف كل حاجه كويس، وقبل ما بيخطو خطوة بيدرسها كويس وبيبص على المصادر بهخهه..
- وخلونا نتفق برضو إن الناس دول مش أغبيا ولما بيحطوا فلوس بيبقوا عارفين بيحطوها فين.. والدحيح منبر أكتر من رائع لمخاطبة الشباب وحشو دماغهم بالأفكار اللي هما عايزينها.. فـ مش بعيد كمان شهرين تلاتة "مع الهجوم الجاي على الأقصى" تلاقي الدحيح طالع يتكلم عن السلام والتعايش.. وبعدها يقولك إن بني إسرائيل هما سكان فلسطين الأصليين عزيزي المشاهد..!
- المهم يعني #قاطعوا_الدحيح احتياطي لحد ما أحمد الغندور يعيد حساباته..
#قاطع_الدحيح
#الدحيح
د. محمد فهيم
أنت تقرأ
رقائق 2
Randomمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
