- التبرع بالدم من أعظم الصدقات المهجورة.. صدقة مش هتكلفك أي حاجه غير شكة إبرة و 10 دقايق من وقتك.. هتعوض شوية الدم اللي فقدتهم بعلبة عصير وشكراً على كدا.. لكن الكيس دا هينقذ حياة واحدة نزفت وهي بتولد.. هينقذ حياة شاب عمل حادثة ونزف.. هينقذ حياة راجل كبير هيخش عمليات طوارئ وهيحتاج كيسين دم..
- المهم إن محدش بيقدر قيمة كيس الدم إلا اللي اتحط في موقف إن حد قريب منه محتاج فصيلة معينة ومش لاقيها.. أو اللي شاف واحد بيعيط وبيترجى حد يتبرع لحالة تبعه عشان هيموت أو عمليته هتتأجل أو.. أو.. لو ماجبش الأكياس المطلوبة..!
- وعموماً يا شباب التبرع بالدم هيحسن صحتكم.. نخاع العضم بتاعك بيجدد كرات الدم الحمرا وبيطلع خلايا جديدة صحيّة لما تفقد كمية معينة من الدم.. عشان كدا تلاقي كل الرياضيين بيتبرعوا بالدم أو بيعملوا حجامة كل فترة..
- طبعاً كلنا عارفين إن الهيموجلوبين لما يقل بيعمل أنيميا ومشاكل.. طاب تعرف برضو إن الهيموجلوبين لما يزيد بيعمل مشاكل؟ كل ما الهيموجلوبين يزيد بتزيد لزوجة الدم وبتبقى معرض لجلطات، وفي دراسات بتقول إن الهيموجلوبين لما يزيد بيخليك معرض لسرطانات الدم..
- وعموماً هتحس الفرق دا بعد ما تتبرع.. أنا لما بروح اتبرع بلاقي هيموجلوبيني داخل على 17 وشوية.. اللي هو جسمي لو بيتكلم هيقولي أرجوك فضي شوية دم.. وفعلاً بعد ما اتبرع بحس بالفرق وبلاقي نفسي أنشط بكتير..
- غير تحليل الهيموجلوبين، بيتعملك تحاليل فيروسات، وكل دا مجاناً.. ولو لاقدر الله عندك فايرس C ولا حاجه بيبلغوك..
- مش عايز أقعد أعدلك الفوايد اللي هتعود عليك عشان مانخرجش عن نية الصدقة، ويبقى عمل خالص لله.. لكن القصد إن التبرع بالدم مافيهوش 1% ضرر عليك عشان الناس اللي بيخافوا يتبرعوا عشان مفكرين إنهم هيتعبوا..
- الموضوع مكسب لكل الناس، ومع ذلك الناس مش بتتبرع ودايماً بنوك الدم محتاجه..! انزلوا اتبرعوا يا جماعة.. وانت رايح الشغل النهارده عدي على أي مستشفى واتبرع.. واحفظ اليوم اللي اتبرعت فيه، وكل 3 شهور انزل اتبرع في نفس اليوم، واحتسبها صدقة جارية.. وصدقني مفيش صدقة أعظم من دي..
- ربك كريم بيُثيب على شق تمرة.. على حجر تزيحه من الطريق.. على بسمتك في وش صاحبك.. على حيوان عطشان تسقيه.. ما بالك بـ كيس دم ينقذ حياة بني آدم!
#ومن_أحياها
أنت تقرأ
رقائق 2
Randomمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
