رقائق 2

مش لازم تبان الاجمد في القاعدة

مرة كنت مع واحد صاحبى عنتيل لغات وبيتكلم إنجليزى وألمانى زى العربى ما شاء الله .. وبالصدفة المكان اللى كنا هنقعد فيه كان فيه حد من زمايلنا موجود ( وهو ميعرفش عن صاحبى إنه شاطر فى اللغات أو بيحب يتعلمها ) ..

وفى خلال القعدة زميلنا اللى قابلناه ده قعد يحكيلنا عن كورس الإنجليزى اللى لسه بادئ فيه وإنه ازاى مبسوط إنه بيحاول يطور نفسه .. وبدأ يستعرض علينا حاجات من اللى اتعلمها ( وهو مكنش بيقولها بأحسن شكل يعنى ) ومع كده صاحبى معلّقش عليه إطلاقا ولا عرّفه إنه مخلص الكورسات دى ولا أى حاجة !!

بالعكس جه عند كام كلمة وقاله دى بتتنطق ازاى تانى ؟ وبدأ يقولها وراه عشان زميلنا بتاع الكورس ده يحس إنه بيعلّمه ، ووقفه عند كام كلمة وسأله عن معناها والولد كان مبسوط جدا يعنى ... بعد ما مشينا بقول لصاحبى أنت ليه عملت كده ! يعنى لا علقت على غلطاته .. وسألت فى حاجات أنت أساسا عارفها كويس ومش محتاجها

قالى: " مش لازم دايما تبقى أجمد واحد فى القعدة " ،
لو علقتله على حاجة هيحس بإنه مش كويس كفاية .. وفى نفس الوقت ده مش هيفيدنى بحاجة ، غير إنه مغلطش فى قرآن يعنى ومع الوقت هيعرف الغلطات اللى نطقها بس ملهاش لازمة يعرفها من دلوقتى فى الأول كده ....

كلامه على قد ما كان بسيط على قد ما فرق معايا جدا ، قد ايه ناس بتبدأ فى مجالات جديدة وبتحاول تتعلم ، بس بتقف بسبب تعليقات سخيفة من ناس ياريت عندها علم بالشىء ده حتى ! ، أو بسبب تجاهل متعمد أو سخرية كل ما الشخص ده يحاول يحكى عن حاجة هو عملها ، وعينيه بتلمع فى الحكاية كإنه إنجاز عظيم، ومع ذلك حد بيقابله بجملة سخيفة أو باعتراض غير حقيقى ميخصّوش أساسا زى إنه ده مش وقته تتعلم ده ، أو أنت فاكر آخرتها ايه وغيره من الكلام اللى ميخصش حد غير المُتعلّم ذات نفسه وهو أدرى بيه ..

ياريت تشجّعوا البدايات ، وتشجّعوا فكرة التعلم نفسها رجاء ، لأن كلها دايرة وبتلف وترجع حقيقى ، وكما تدين تُدان .. أنا لغاية النهاردة بفكر قد ايه الولد ده كان مروح مبسوط ازاى من نفسه ، وكمل فى الكورس بنفسية عاملة ازاى .. ويا عالم هو فين دلوقتى بسبب الموقف البسيط اللى عمله صاحبى ده معاه ! ... ❤️⁩

" فليقل خيرًا أو ليصمت " ..
" مش لازم دايمًا تبقى أجمد واحد فى القعدة " ..
Cpd