- طيب أنا مش هبقى موجود الفترة الجاية.. هقفل الفيسبوك وكل السوشيال ميديا في رمضان.. دي فرصة بتيجي كل سنة مرة والواحد مش مستعد يضيعها في مباركات وكوميكس ومسلسلات خايبة وحاجات مالهاش لازمة..
- وقت رمضان ثمين جداً.. الدقيقة فيه تفرق معاك.. النخعي رحمه الله كان بيقول : " صوم يوم من رمضان أفضل من ألف يوم ، وتسبيحة فيه أفضل من ألف تسبيحة ، وركعة فيه أفضل من ألف ركعة "..
- النبي صلى الله عليه وسلم لما كان يستقبل شهر رمضان كان يقول لأصحابه "قد جاءكم شهر رمضان، شهر مبارك، افترض الله عليكم صيامه، تفتح فيه أبواب الجنة، وتغلق فيه أبواب الجحيم، وتغل فيه الشياطين، فيه ليلة خير من ألف شهر، من حرم خيرها فقد حرم"..
- الواحد بيعك طول السنة ودا الشهر الوحيد اللي بنتعبد فيه بما يرضي الله.. فـ مش عايزينه يروح مننا في تفاهات.. الربع ساعة اللي هتقعد تتصفح فيها ريڤيوهات المسلسلات ممكن تصلي فيها ركعتين قيام.. النص ساعة اللي هتقعدي تتفرجي فيها على طريقة عمل الكنافة بالمانجة "اللي عمرك ماهتعمليها"، ممكن تقرأي فيها جزء قرآن..
- رمضان فرصة عظيمة لأي حد عايز يتوب ويبدأ صفحة جديدة في حياته.. فرصة للي عايز يواظب في طاعة أو يبعد عن ذنب.. اللي عايز يبدأ يحفظ قرآن أو يواظب على الصلاة في المسجد هيلاقي ربنا بيعينه وكل اللي حواليه بيشجعوه.. اللي عايز يبطل يسمع أغاني هيلاقي كل اللي حواليه أريدي مابيسمعوش أغاني.. حتى سواق الميكروباص اللي كنت بتسمع معاه الأغنية ولو قولتله اطفيها أو وطي الصوت يشتمك، هتلاقيه من نفسه مش بيشغل أغاني في رمضان.. اللي عايز يبطل سجاير فـ حقيقي مفيش فرصة أحسن من رمضان يحاول فيها..
- مفيش مبرر يا صديقي إنك تفضل فاتح انستجرام وسناب شات والحاجات دي.. ولو على جروب الدفعة أو جروب الشغل اللي بتفتح عشانه فيسبوك، فـ ممكن تعملوا جروبات واتساب وتنزلوا عليها الحاجات المهمة عشان مايبقاش لكم حجة تفتحوا بيها.. الفيسبوك دا سئ جداً وبيسرق الوقت من غير ما تدري.. تفتح تشوف حاجه على جروب الدفعة تلاقي نفسك قعدت بعدها ساعة تتصفح!
- مفيش حاجه هتفوتك لما تقفل الميديا شهر.. نفس الكوميكات بتاعة كل سنة، ونفس الأخبار، ونفس الرسايل، ونفس المسلسلات، ونفس البرامج.. مفيش حاجه جديدة هتفوتك..
- ابعدوا عن الميديا.. ابعدوا عن التليفزيون.. ابعدوا عن أي حاجه تلهيكم عن العبادة في الشهر دا.. رمضان يومه مزحوم أريدي وبيخلص بسرعة.. مش مستحمل منك تحشيه بتفاهات.. استغلوا كل دقيقة في رمضان.. محدش ضامن ييجي عليه رمضان تاني..
- إن شاء الله نتقابل تاني في العيد.. وبإذن الله نكون ساعتها راضيين عن نفسنا وعن تعبدنا في رمضان.. وتكون أحوالنا اتصلحت وربنا هدانا ..
- *الواتساب موجود لو حد احتاج حاجه ضروري..
أنت تقرأ
رقائق 2
De Todoمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
