ساعات بحس إن اللي اخترعوا جو حقوق المرأة وسترونج أندبندت ست والجو دا هما رجال أعمال... لا هما بتوع مرأة ولا هما برضك بتوع مليطة... رجال أعمال.
*️⃣ تعالى يا ست الكل اشتغلي يلا عاوزين القوى العاملة عددها يزيد؛ ولما يزيد العرض يقل السعر... فكده هندفع مرتبات أقل. وخاصة إن الستات حول العالم بتقبض أقل من الرجالة.
*️⃣ مبروك انتي اشتغلتي... طيب بصي هو انتي بدون شغل كنتي آخرك تخرجي مرة أو اثنين في الأسبوع؛ لكن دلوقتي هتنزلي كل يوم... عاوزة هدوم كثير بقى عشان انتي مش زي الرجالة المعفنين ممكن ينزلوا يومين ثلاثة اربعة بنفس الطقم... يلا اشتري هدوم كثير خلينا نبيع.
*️⃣ مبروك عليكي الطقم الجديد بس هو انتي هتنزلي بشكلك كده؟ مش شايفه آنسة مين دي فاكره نفسها أحلى منك؟ يلا اشتري ميك أب واشتري أكسسوارات وروحي كوافير واصرفي.
*️⃣ انتي متجوزة؟ طيب أكيد صعب الأطفال مع الشغل.. عندنا حضانة أهي ودي العيال فيها طول اليوم وكل يوم..
*️⃣ العيال كبروا على الحضانة؛ ما أنتي مش فاضية تذاكري لهم؛ دا لو أنتي وابوهم أصلاً بتفهموا.... يلا مدرسين بقى يربوا لك العيال...
*️⃣ في أجازات ومش عارفة تتصرفي في العيال مع شغلك؟ طيب ما تشتركي لهم في أي شيء أو توديهم النادي يلعبوا وأهو بالمرة يصرفوا شوية. دا وقت الأجازة يعني 3 شهور مخنا فيه مفروض ميتعلمش شيء بل يلعب ويصرف فلوس.
*️⃣ على فكرة الرجالة بتتحرش بيكي في المواصلات... طيب هنعملك مواصلات للمرأة وكافيهات للمرأة وأحزاب للمرأة وجمعيات وأي شيء نقعد نخدم عالموضوع دا... وممكن برامج تليفزيون وأطباء نفسيين. عاوزين نشتغل.
*️⃣ وبصي بقى عادي جداً ترجعي من الشغل تعبانه وتطلبي تيك أواي... ايه المشكلة يعني... يلا عاوزين نشغل مطاعم.
*️⃣ ايه دا التيك اواي خلاكي تخنتي 🤔؛ برستيجك قصاد زميلاتك؛ يلا بقي رجيم وجلسات تجميل وشفط ونفخ وفحت وردم 😁 اهو نطلع بمصلحة.
*️⃣ صحة عيالك باظت بسبب ان محدش مهتم باكلهم ومتسابين للشارع 🤔 ؛ يا ستي متضايقيش نفسك امال دكاترة التغذية اتخرجوا ليه.
*️⃣ وبرضك عادي انتي مرهقة طول الأسبوع فتجيبي ست يوم الجمعة تنظف لك الشقة... مهو انتي مش الشغالة اللي جوزك اشتراها هتشتغلي طول الأسبوع ويوم الجمعة تنظفي الشقة... لازم ترتاحي زيك زيه.
*️⃣ على فكرة جوزك هو الملزم يصرف عالبيت وعلى فلوس المدرسين اللي بييجوا عشان انتى مش فاضية تعلمي عيالك وفلوس التيك اواي عشان انتى مش فاضية تطبخي وفلوس الست اللي بتنظف عشان انتي مرهقة مش فاضية تنظفي... انتى مش فاضية أنتي بتشتغلي عشان تجيبي فلوس... هتقولي لي اعمل ايه بالفلوس... تصرفيها على نفسك.. اشتري موبايل جديد وكومبيوتر وعربية وذهب وياقوت ومرجان وأحمدك يا رب 😂 المهم تصرفيها عشان ترجع لنا تاني.
*️⃣ اوووه جوزك مش مستحمل وخناقات معاكي... في داهية مش عاوزينه دا هما 225.9 ألف حالة طلاق في 2019 ؛ عادي يعني تكوني منهم؛ اه لو رجعنا دستة سنين يعني 2007 نلاقي الرقم 77.9 ألف حالة بس... لكن عادي طز... انتي استقلي ببيتك وجوزك يشوفله بيت... عندنا شقق كثير يلا بقى.
*️⃣ فتحس الموضوع بيزنس صرف؛ انشطة اقتصادية ضخمة شغالة وعايشة عالمرأة. بس طبعاً مش هنقولها كده عشان متزعلش... احنا هنوهما إن دا لمصلحتها... زي الفأر اللي يحطوا في برطمان كله أكل... الفأر مبسوط وبياكل لمصلحته وفعلاً الأكل لمصلحته فعلاً... لكنه مش شايف إنه بياكل وبيحفر وبعد شوية هيكون وقع جوا البرطمان وبقى خروجة منه مستحيل... هيقعد يفكر أنا عملت ايه غلط؛ مش هيلاقي خالص وكله كان صح... وهنا قمة الصياعة
*️⃣ انك تخلي الآخر يشتغل لمصلحتك وهو مقتنع إنها لمصلحته هو... هنا هيشتغل بتفاني وإخلاص.
*️⃣ مش حابب أخش أكيد في هري فيمينيست؛ لا سني ولا لياقتي ولا حالة ضغط الدم عندي تسمح لي بالهبل دا... لكن فكر كده في لعبة بحبها... اسمها لعبة ايه السبب؟
*️⃣ ليه الستات عاوزين يبقوا سترونج أندبندت وومن؟ عشان في ظلم بيحصل... طيب ليه في ظلم؟ يعني مين اللي بيظلم؟ الرجالة... طيب مين اللي ربي الرجالة دي؟ محدش... رجالة في شغلها وستات مش فاضية تربي ومشغولة برضك فسايبين العيال يربيهم الإعلام والصحاب والشارع والمدرسة... فتخرج عاهات والعاهات دي بقى تظلم المرأة... فبدل ما نصلح المشكلة دي لا نزودها ... فنرمي أطفال أكثر؛ فيخرج عاهات أكثر... فنيجي هنا نقول شوفتم كان عندنا حق بقى لما قررنا نهتم بنفسنا.... يعني من الآخر عملنا المشكلة لنفسنا وقعدنا نشتكي من نتايجها. وطبعاً هلاقي اللي يقولي يعني الرجالة كيوت... هقولك يا أهبل كيوت ايه ما أنا قايل عليهم عاهات بس انتا عشان الفيميزنم وهرمونات الاستروجين عندك عالية فمشوفتش دا.
*️⃣ طبعاً بتوع إنتا ضد عمل المرأة بشكل مطلق ودائم وانتا رجعي ووو... هقوله ألف سلامة عليك وربنا يشفي كل البهايم ويسيبك أنتا لوحدك كده.
أنت تقرأ
رقائق 2
Acakمقولات، حكم، خواطر، نصائح، عادات، عبادات، علوم .. الخ كل شيئ اعجبني لم تكتبه يدي ، أضعه بين أناملكم 💙
